រតនគិរីៈ ម៉ូតូ២គ្រឿង ជិះស្របទិសគ្នា ដីហុយមិនឃើញ ប៉ះគ្នាដួលលើកំណាត់ ផ្លូវជាតិលេខ ៧៨A បណ្តាលឲ្យ យុវជនម្នាក់ របួសធ្ងន់ កាលពីវេលាម៉ោង ៦ល្ងាច ថ្ងៃទី២ ខែកុម្ភៈ ត្រង់ចំណុច ចំការកៅស៊ូ ស្ថិតក្នុងភូមិកាឡៃ១ ឃុំកាឡៃ ស្រុកអូរជុំ ខេត្តរតនគិរី។ ភ្លាមៗនោះដែរ សមត្ថកិច្ចមូលដ្ឋាន ទាក់ទងហៅ រថយន្តសង្គ្រោះ របស់ស្នងការដ្ឋាន គរបាលខេត្តបញ្ជូន ជនរងគ្រោះ ទៅសង្គ្រោះ បន្ទាន់នៅមន្ទីរ ពេទ្យបង្អែកខេត្ត ។

អធិការនគរបាល ស្រុកអូរជុំ លោក ថាក់ ឡៅ ប្រាប់ឲ្យដឹងថា ជនរងគ្រោះ របួសធ្ងន់ មានឈ្មោះ ស៊ៀវ ធី អាយុ១៨ឆ្នាំ ស្នាក់នៅភូមិ កាឡៃ២ ឃុំកាឡៃ ស្រុកអូរជុំ ជិះម៉ូតូម្នាក់ឯង ម៉ាកវ៉េវ ពណ៌ខ្មៅគ្មាន ស្លាកលេខ។ ចំណែកឯ ម៉ូតូ១គ្រឿងទៀត ជិះម្នាក់ឯង ម៉ាកវ៉េវឆ្លាម ពណ៌ខ្មៅ គ្មានស្លាកលេខ បន្ទាប់ពីកើត ហេតុរួចរត់ គេចខ្លួនបាត់ ។ លោកបន្តទៀតថា ម៉ូតូ២គ្រឿងនេះ ជិះមានទិសដៅ ពីជើងទៅត្បូង ពោលចេញពី ទីរួមស្រុកវ៉ឺនសៃ ខណៈជិះទន្ទឹមគ្នា ហើយផ្លូវជាតិលេខ 78Aនេះ មានសភាពហុយ ទ្រលោម ពិបាកក្នុង ការធ្វើដំណើរ ក៏ប៉ះគ្នា ដួលតែម្តង។

លោកអធិការ នគរបាលខាងលើ បញ្ជាក់ឲ្យដឹង ទៀតថា បើតាមការពិនិត្យ ស្ថានភាព កន្លែងគ្រោះថ្នាក់ ចរាចរនេះបណ្តាល មកពីរថយន្ត ម៉ាកវីហ្គោ ធ្វើដំណើរពីខាងក្រោយ ហើយបើកវ៉ា ម៉ូតូប៉ះដៃ ចង្កូតដួលរួច បន្ថែមល្បឿន បើកចូលទីរួមក្រុង បានលុង គេចខ្លួនបាត់ ។ វត្ថុតាងម៉ូតូ ទាំង២គ្រឿង នេះត្រូវបានកម្លាំង នគរបាលប៉ុស្តិ៍កាឡៃ នាំយកទៅរក្សាទុក ដើម្បីដោះស្រាយ តាមច្បាប់ ៕

ផ្តល់សិទ្ធដោយ ដើមអម្ពិល