ទេព រិនដារ៉ូ ព្រឺសម្បុរខ្ញាកៗ ពេលនិយាយពីប្រផ្នូលមុនអ្នកស្រី ឌឿ ដារ៉ាស៊ី មរណភាព

ទេព រិនដារ៉ូ ព្រឺសម្បុរខ្ញាកៗ ពេលនិយាយពីប្រផ្នូលមុនអ្នកស្រី ឌឿ ដារ៉ាស៊ី មរណភាព

អតីតតារាសម្ដែងជាតួម្ដាយកាចឆ្នាសឆ្នើមអ្នកស្រី ឌឿ ដារ៉ាស៊ី បានទទួលមរណភាពហើយ កាលពីល្ងាចថ្ងៃអាទិត្យសបា្តហ៍មុន ដោយសារជំងឺគាំងបេះដូង។ រឿងដែលនឹកស្មានមិនដល់ លោក ទេព រិនដារ៉ូ បានជួបប្រផ្នូល មុនអ្នកស្រីមរណភាព។ នេះបើតាមសាមីខ្លួនបញ្ចេញឲ្យដឹង។

រូបថត Facebook ឃិត ចិត្រ កូនប្រុសអ្នកស្រី ឌឿ ដារ៉ាស៊ី

តារាសម្ដែងជើងចាស់ រូបនេះ អធិប្បាយថា មិនជាយ៉ាងម៉េចទេ នៅមុនមួយថ្ងៃដែលលោកទទួលដំណឹងថាអ្នកស្រី ឌឿ ដារ៉ាស៊ី មរណភាព នៅយប់នោះលោកសម្រាន្តមិនលក់ទាល់តែសោះ។ បន្ថែមពីលើនេះ លោក ចេះតែនឹកគិតទៅអ្នកស្រី ទាំងគ្មានមូលហេតុ ខណៈលោក និងអ្នកស្រីខានជួបគ្នាជាយូរយារណាស់មកហើយ។

“នៅយប់ហ្នុង មិនដឹងម៉េច…បិទភ្នែកទៅស្រមៃឃើញតែគាត់ៗ ខ្ញុំក្រោកហើយដេកទៅវិញម្តងពីរដង នៅតែស្រមៃឃើញគាត់ទៀត ខ្ញុំឆ្ងល់ខ្លួនឯង ថាម៉េចបានជាអីចឹង។ ស្រាប់តែស្អែកឡើង ទទួលដំណឹងថា អ្នកស្រី ឌឿ ដារ៉ា ស្លាប់ អ្ហូយ…និយាយរឿងហ្នឹង ខ្ញុំព្រឺសម្បុរ!”។ ទេព រិនដារ៉ូ

លោក ដារ៉ូ បន្ថែមថា កន្លងមក លោក និងអ្នកស្រី ឌឿ ដារ៉ាស៊ី រាប់អានគ្នាណាស់ ស្ទើរតែដូចសាច់ញាតិទៅហើយ ហើយនៅក្នុងចំណោមសិល្បករជំនាន់លោកទាំងអស់ គឺអ្នកស្រី ដារ៉ាស៊ី រាប់អានស្និទ្ធស្នាលជាមួយលោកជាងនរណាៗទាំងអស់។ លោក ថា “គាត់ហ្នឹង…ឲ្យតែមានចំណីចំណុកអ្វីឆ្ងាញ់ គាត់យកមកឲ្យខ្ញុំហើយ មិនដែលខានទេ ព្រោះកាលមុននៅផ្ទះជិតគ្នា…ទើបតែក្រោយមកគាត់ដូរផ្ទះទេ ទើបខានជួបគ្នាយូរ!”។

ក្រោយទទួលដំណឹងពីមរណភាពរបស់អតីតតារាសម្ដែងកាចឆ្នាស់ឆ្នើម លោក ដារ៉ូ អះអាងថា លោកបានស្វះស្វែង រកទីលំនៅអ្នកស្រីទាល់តែឃើញ ដើម្បីចូលរួមរំលែកទុក្ខក្រុមគ្រួសារ និងអុជធូបឧទ្ទិសឲ្យវិញ្ញាណក្ខន្ធអ្នកស្រីបានទៅសោយសុខនៅឋានសុគតិភព។ លោក ចាត់ទុកថា វាជារឿងនឹកស្មានមិនដល់ ចំពោះមរណភាពរបស់អ្នកស្រី ឌឿ ដារ៉ាស៊ី តារាភាពយន្តជើងចាស់។

អ្នកស្រី ឌឿ ដារ៉ាស៊ី បានធ្វើមរណភាពកាលពីថ្ងៃអាទិត្យសបា្តហ៍មុនក្នុងជន្មាយុ ៦៧ ឆ្នាំដោយរោគាពាធ(គាំងបេះដូង និងជំងឺពុកឆ្អឹង)។ អ្នកស្រី បានចូលបម្រើវិស័យសិល្បៈអំឡុងឆ្នាំ១៩៩០ ហើយអ្នកស្រីត្រូវបានគេស្គាល់តាមរយៈការសម្ដែង ជាតួម្ដាយកាចឆ្នាសឆ្នើមបានសក្ដិសមក្នុងខ្សែរឿងជាច្រើន។

អ្នកស្រី ឌឿ ដារ៉ាស៊ី មានកូនប្រុសពីរនាក់ ប៉ុន្តែកូនប្រុសម្នាក់ក្នុងចំណោមនោះ បានបាត់បង់ជីវិតច្រើនឆ្នាំហើយក្នុងករណីចោរកម្ម។ បច្ចុប្បន្ននៅសល់តែកូនប្រុសម្នាក់ប៉ុណ្ណោះឈ្មោះ ឃិត ចិត្រ ដែលជាអ្នកចេញមុខរៀបចំបុណ្យសពម្តាយនាពេលកន្លងមកនេះ៕

ប្រភព Sabay

មុន បន្ទាប់

មតិយោបល់