ភ្នំពេញ ៖ បុរសជនជាតិ ជប៉ុនម្នាក់ ជាអ្នកទេសចរ នៅស្រុកខ្មែរ បានបញ្ចប់ជីវិត ដោយលោតធ្វើ អត្ដឃាតពី លើផ្ទះសំណាក់ យីហោ «លីម៉េង» ស្ថិតនៅអគារ លេខ៤៥-៤៧-៤៩ ផ្លូវលេខ៨១ ភូមិទី៧ សង្កាត់ផ្សារថ្មីទី២ ខណ្ឌដូនពេញ កាលពីយប់រំលង អាធ្រាត្រ ចូលថ្ងៃទី២៣ ខែមករា ឆ្នាំ២០១៥។

យោងតាមមន្ដ្រី នគរបាលព្រហ្មទណ្ឌ ខណ្ឌដូនពេញ បានឱ្យដឹងថា មូលហេតុពិតប្រាកដ ដែលបុរសជនជាតិ ជប៉ុនរូបនេះ ធ្វើអត្ដឃាត ដោយលោតពីលើ ផ្ទះសំណាក់ លីម៉េង ជាន់ទី៤ មិនទាន់ដឹងពី មូលហេតុនៅឡើយទេ ប៉ុន្ដែសមត្ថកិច្ចដាក់ ការសង្ស័យថា អាចជាប់ ពាក់ព័ន្ធការ ប្រើប្រាស់ថ្នាំញៀន ធ្វើឱ្យវង្វេង ស្មារតីលែង ដឹងខុសដឹងត្រូវ ។

តាមការបញ្ជាក់ របស់សមត្ថកិច្ច ជនរង គ្រោះឈ្មោះ TSUNEOA SHO TA កើតនៅថ្ងៃទី៩ ខែតុលា ឆ្នាំ១៩៨៩ មុខរបរជា ភ្ញៀវទេសចរ នៅកម្ពុជា កាន់លិខិតឆ្លងដែន លេខ TZ1016732 ដែលបានធ្វើដំណើរ ចូលមក កាន់ប្រទេស កម្ពុជា កាលពីថ្ងៃទី១៦ ខែមករា ឆ្នាំ២០១៥ ។

មន្ដ្រីនគរបាលព្រហ្មទណ្ឌ ខណ្ឌដូនពេញ បានបញ្ជាក់ថា មុនពេលកើតហេតុ ពោលកាលពីវេលា ម៉ោង៦និង១០នាទី ល្ងាចថ្ងៃទី២២ ខែមករា ឆ្នាំ២០១៥ ជនរងគ្រោះបានមក ជួលបន្ទប់លេខ៤១៦ នៅផ្ទះសំណាក់លីម៉េង ដោយស្នាក់នៅ ម្នាក់ឯង លុះដល់វេលាម៉ោង កើតហេតុ ១២និង៤៩នាទី យប់រំលងអាធ្រាត្រ នោះស្រាប់តែ មានការភ្ញាក់ផ្អើល ក្រោយពីគេបាន ឃើញជនរងគ្រោះ ចេញពីក្នុង បន្ទប់ ដើរមកបង្កាន់ដៃ ខាងមុខផ្ទះសំណាក់ រួចហើយឡើង លើបង្កាន់ដៃ លោតចុះមក ក្រោម បណ្ដាលឱ្យ រងរបួសយ៉ាង ធ្ងន់ធ្ងរ ។

ក្រោយកើតហេតុ កម្លាំងសមត្ថកិច្ចមូល ដ្ឋានបានចុះភ្លាមៗ ទៅកាន់ទីនោះ ហើយជួយ ដឹកជនរងគ្រោះ ទៅសង្គ្រោះ បន្ទាន់នៅមន្ទីរ ពេទ្យកាល់ម៉ែត ប៉ុន្ដែជនរងគ្រោះ បានដាច់ ខ្យល់ស្លាប់បាត់ ទៅហើយ ។

មន្ដ្រីនគរបាល ព្រហ្មទណ្ឌមួយរូប បាននិយាយថា បច្ចុប្បន្នសព របស់ជនរងគ្រោះ ត្រូវបានតម្កល់ ទុកនៅមន្ទីរពេទ្យ កាល់ម៉ែត ហើយគណៈកម្មការ ធ្វើកោសល្យវិច័យ សពកំពុងយក ទឹកនោមទៅពិនិត្យ មើលថាតើអាច ជាប់ពាក់ព័ន្ធទៅ នឹងការប្រើប្រាស់គ្រឿង ញៀនឬមួយ យ៉ាងណានោះ ។

មន្ដ្រីនគរបាលរូបនេះ បានបញ្ជាក់ទៀតថា កាលពីប៉ុន្មានថ្ងៃ មុនជនរងគ្រោះ បានទៅគប់កញ្ចក់ សណ្ឋាគារស រួចហើយ ទៅជួលផ្ទះ សំណាក់ផ្សេងទៀត ដើម្បីចង់ស្នាក់នៅ ប៉ុន្ដែត្រូវបាន ម្ចាស់ផ្ទះសំណាក់ ទាំងនោះ មិនអនុញ្ញាតឱ្យជួល ។ បន្ទាប់មកជន រងគ្រោះបាន មកជួលនៅ ផ្ទះសំណាក់លីម៉េង ហើយយប់ឡើង ក៏លោតពីលើ ផ្ទះសំណាក់ សម្លាប់ខ្លួន តែម្ដង ៕

ផ្តល់សិទ្ធដោយ ដើមអម្ពិល