កណ្តាល ៖ បុរសម្នាក់បានស្លាប់ យ៉ាងអាណោចអាធ័ម នៅនឹងកន្លែង កើតហេតុ និងឯបុរសម្នាក់ ទៀតរងរបួសធ្ងន់ ដោយសារពួកគេ ជិះម៉ូតូបុកគ្នា នៅលើកំណាត់ ផ្លូវជាតិលេខ១ ចន្លោះគីឡូម៉ែត្រ លេខ៥០-៥១ កាលពីវេលាម៉ោង ៥និង៣០នាទី ព្រឹកថ្ងៃទី២០ ខែមករា ឆ្នាំ២០១៥ ក្នុងភូមិគគរធំ ឃុំគគីរធំ ស្រុកកៀនស្វាយ ខេត្តកណ្តាល ។

លោក ព្រំ សំណាង អធិការរង ទទួលបន្ទុកសណ្តាប់ធ្នាប់ និងចរាចរស្រុក កៀនស្វាយ បានឲ្យដឹងថា ជនរងគ្រោះដែល ស្លាប់នៅកន្លែង កើតហេតុមានឈ្មោះ កែវ សំណាង ភេទប្រុស អាយុ៥៥ឆ្នាំ ជាមន្ត្រី អគ្គីសនីកម្ពុជា មានទីលំនៅភូមិសំបួរ ឃុំព្រៃឃ្នេស ស្រុកមេសាង ខេត្តព្រៃវែង ជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1AY-6316 ។

ចំណែកជនរងគ្រោះ ម្ខាងទៀត មានឈ្មោះ យ៉ាន សុខវែង ហៅត្រុញ ភេទប្រុស អាយុ២០ឆ្នាំ មានទីលំនៅ ក្នុងភូមិ-ឃុំ កើតហេតុ រងរបួសធ្ងន់ ជិះម៉ូតូ ម៉ាកហុងដា សេ១២៥ ពណ៍ខ្មៅ ពាក់ស្លាកលេខ ភ្នំពេញ 1AK-9847 ។

តាមសាក្សីឃើញ ហេតុការណ៍ បានអោយដឹងថា មុនពេលគ្រោះថ្នាក់ បុរសម្នាក់ជិះ ម៉ូតូវីវ៉ា បើកក្នុងទិសដៅ ពីអ្នកលឿង ទៅភ្នំពេញ ដោយបើកបរ ខាងស្តាំដៃ របស់ខ្លួន ។ ចំណែកយុវជន ម្នាក់ទៀតជិះ ម៉ូតូសេ១២៥ បើកក្នុង ទិសដៅផ្ទុយគ្នា ពីភ្នំពេញទៅ អ្នកលឿង តែបញ្ច្រាស ពោលគឺបើក ខាងឆ្វេងដៃ ហើយឆ្លងផ្លូវ មកខាងស្តាំដៃ របស់ខ្លួន ។ ពេលកំពុងបើកឆ្លងផ្លូវ ស្រាប់តែ មានរថយន្ត មួយគ្រឿងបើក មកពីក្រោយ ធ្វើឲ្យអ្នកជិះ ម៉ូតូសេ១២៥ គេចមកឆ្វេងដៃវិញ ហើយចូលមកចំណែក ផ្លូវខាងអ្នក ជិះម៉ូតូវីវ៉ា គ្រានោះក៍បុកគ្នា ចំពីមុខពេញ ទំហឹងតែម្តង ។

បច្ចុប្បន្ន សាកសពជនរងគ្រោះ ត្រូវសមត្ថកិច្ចប្រគល់ជូន ក្រុមគ្រួសារយក ទៅធ្វើបុណ្យនៅ ស្រុកកំណើត ហើយម៉ូតូទាំង ២គ្រឿងយក មករក្សាទុកនៅ អធិការដ្ឋាន នគរបាលស្រុក កៀនស្វាយ ដើម្បីដោះស្រាយ តាមច្បាប់ ៕

ផ្តល់សិទ្ធដោយ ដើមអម្ពិល