ខេត្តកំពង់ឆ្នាំង ៖ ភ្ញៀវទេសចរបរទេសសញ្ជាតិបារាំង២នាក់ប្តីប្រពន្ឋបានរងរបួស ក្នុងហេតុការណ៏ ក្រឡាប់រទេះ គោដឹកភ្ញៀវទេសចរ មួយ គ្រឿង ខណៈសត្វគោជា កម្លាំងអូសរទេះ នោះបានផ្អើល ។ បុរសជាប្តីមានឈ្មោះ Gilber អាយុ៦១ឆ្នាំ រងរបួសក្បាល ផ្នែកខាងក្រោយ និងប្រពន្ធមាន ឈ្មោះ Marie Lawis Rochard អាយុ៦០ឆ្នាំ រងរបួសផ្នែកឆ្អឹងជំនី ដោយឡែកម្ចាស់ រទេះគោមាន ឈ្មោះញ៉ែម ហ៊ុន អាយុ៤៥ឆ្នាំ មានទីលំនៅ ភូមិអ្នកតាហាង បានរងរបួសស្រាល ។ ជនបរទេសទាំង២នាក់ ប្តីប្រពន្ឋត្រូវបានដឹក ទៅសង្គ្រោះបន្ទាន់ នៅ មន្ទីរពេទ្យក្រុងភ្នំពេញ ។ ហេតុការណ៏គ្រោះថ្នាក់ យ៉ាងកម្រនេះ បានកើតឡើងនៅវេលា ម៉ោង១ និង៣០នាទីរសៀល ថ្ងៃទី១៩ ខែមករា ឆ្នាំ២០១៥ នៅលើកំណាត់ផ្លូវលំ ស្ថិតក្នុងភូមិអ្នកតាហាង ឃុំកំពង់ត្រឡាចក្រោម ស្រុកកំពង់ត្រឡាច ។

ប្រភពពីមន្ត្រីនគរបាលស្រុកម្នាក់បាន រៀបរាប់ថា មូលហេតុបណ្តាលអោយសត្វគោនោះផ្អើល គឺដោយ សារមានក្មេងម្នាក់ បានរត់លេង ដោយបង្វិល សំបកកង់ ពេលនោះ ខណៈដែលរទេះគោ ដឹកភ្ញៀវជាច្រើនគ្រឿង ឆ្លងកាត់កន្លែងកើតហេតុ ស្រាប់តែសំបកកង់ របស់ក្មេង កំពុងលេង ចាប់មិនទាន់សំបកកង់នោះ បានរត់ទៅជាប់ ជើងសត្វគោដែល ជនបរទេសនោះជិះ ទើបបណ្តាលអោយ គោនោះផ្អើលរត់ ធ្លាក់ពីថ្នល់ កំពស់ជាង៣ម៉ែត្រ រងរបួសជនជាតិ បារាំងទាំង២នាក់ ប្តីប្រពន្ធ ខាងលើនេះតែម្តង ។
   
សមត្ថកិច្ចនគរបាលស្រុកកំពង់ត្រឡាចបានប្រាប់នៅព្រឹក ថ្ងៃទី២០ ខែមករា នេះថា ជនបរទេសទាំង២នាក់ប្តីប្រពន្ធ នោះ បានធូរស្រាល និងត្រឡប់ពីមន្ទីរពេទ្យ ក្រុងភ្នំពេញវិញហើយ និងបានប្រាប់ សមត្ថកិច្ចថា ពួគគាត់មិនប្តឹង ផ្តល់ម្ចាស់រទេះគោនោះទេ និងសូមកុំអោយ សមត្ថកិច្ចទៅរករឿងអ្នក បររទេះគោនោះទៀតផង មុននឹងពួកគាត់ឡើងជិះ កប៉ាល់បន្តដំណើរ ទៅទេសចរណ៏ នៅខេត្តសៀមរាប ជាបន្តទៀត ៕

ផ្តល់សិទ្ធដោយ កោះសន្តិភាព