អីចឹងសោះ ជាហេតុផលក្មេងជំទង់វ័យទើប១៤ ឬ១៥ឆ្នាំ សុំគ្នាធ្វើសង្សារ

អីចឹងសោះ ជាហេតុផលក្មេងជំទង់វ័យទើប១៤ ឬ១៥ឆ្នាំ សុំគ្នាធ្វើសង្សារ

មិត្តយុវវ័យមានដែលសង្កេតទេថា ក្មេងៗសម័យឥលូវ អាយុនៅតិចនៅឡើយ ១៤ ឬ១៥ឆ្នាំ ចេះមានស្នេហាទៅហើយ។ ខ្លះគ្រាន់តែបានជួបមុខគ្នាមួយភ្លែត ក៏ចាប់ចិត្តស្រលាញ់ ទាក់ទង និងសុំគ្នាធ្វើជាសង្សារបាត់ទៅហើយ។

តើអ្វីជាមូលហេតុពិតប្រាកដ ដែលធ្វើឲ្យក្មេងជំទង់ចង់មានស្នេហាឆាប់បែបនេះ?

សម្រាប់កញ្ញា ពិសី និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ផ្នែកធនាគារ បានប្រាប់ថា៖ “មកពីតាមគ្នា។ យុវវ័យខ្លះឃើញគេមានស្នេហា ក៏គិតចង់មាននឹងគេដែរ តែពេលខ្លះពួកគេមិនដឹងថា វាជាអ្វីផង”។

Loveស្នេហា

រូបតំណាង

បើតាមយុវជន ថៃ ស្រ៊ុន និស្សិតសាកលវិទ្យាល័យភូមិន្ទភ្នំពេញ ជំនាញITវិញមិនយល់អញ្ចឹងទេ។ ស្រ៊ុន និយាយថា៖ “ក្មេងៗឥលូវប្រើអារម្មណ៍ស្រលាញ់គ្នា ពួកគេក៏មានមនោសញ្ចេតនាដូចតែមនុស្សធំដែរ។ អារម្មណ៍ស្រលាញ់មនុស្សម្នាក់ពិបាកនិយាយណាស់ តែគេចង់នៅក្បែរ មើលថែទាំគ្នា និងចង់ឲ្យមនុស្សដែលគេពេញចិត្តនោះដឹង ដូច្នេះពួកគេក៏បង្កើតស្នេហាឡើងមកតែម្ដង”។

រីឯយុវជនមិនសូវបានសំដី ទួរ សុវណ្ណរាជ រៀនថ្នាក់ទី១០ នៅវិទ្យាល័យទួលទំពូង បានប្រាប់ដោយទឹកមុខអៀនថា៖ “ជួនកាលមកពីនិស្ស័យ ហើយបានជួបមុខគ្នារាល់ថ្ងៃផង ថែមទាំងមិត្តភ័ក្ដិលែបខាយឲ្យទៀត ក៏ចេះតែចង់មានស្នេហាទៅ”។

ភ្នែកសម្លឹងទូរសព្ទ ឯអារម្មណ៍អណ្ដែតអណ្ដូងទៅតាមបទចម្រៀងដែលកំពុងស្ដាប់ យុវជន ប៊ី រស្មី និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានប្រាប់ថា ស្នេហាអាចកើតឡើងដោយសារកត្តាបីគឺ គេបង្អាប់ ភាពយន្ត និង ខ្វះភាពកក់ក្តៅ។

យុវជនរូបនេះបន្តថា ៖”គេថា ឲ្យចុះឡើងៗពេកក៏អាចស្រលាញ់គ្នាបានដែរ។ ពេលខ្លះ ក្មេងៗទាំងនោះ មិនទាន់មានចិត្តអីលើគ្នាផង តែដល់គេបង្អាប់ពេក ក៏បាក់ចិត្តតែម្ដងទៅ។ មួយទៀតភាពយន្តដែលនិយាយពីរឿងស្នេហា ពេលគេមើល គេអន្លង់អន្លោចតាមសាច់រឿង នាំឲ្យគេចង់មានស្នេហាដែរ។ ខ្ញុំគិតថា គ្រួសារខ្លះ ម្ដាយឪពុកមិនបានផ្ដល់ការស្រលាញ់គ្រប់គ្រាន់ដល់កូន។ ដល់ម្នាក់នោះជួបមនុស្សដែលចេះយកចិត្តទុកដាក់ យល់ចិត្តថ្លើម ធ្វើឲ្យគេនោះលង់ស្រលាញ់ បង្កើតបានជាស្នេហាភ្លាមទៅ”។

បើតាមគំនិតអ្នកវិញ តើអ្វីជាមូលហេតុនាំឲ្យយុវវ័យវ័យក្មេងខ្លាំងចង់មានស្នេហា?

ប្រភព Sabay

មុន បន្ទាប់

មតិយោបល់