ភ្នំពេញ ៖ បុរសម្នាក់ ត្រូវបានជនល្មើស មានគ្នា៣នាក់ ជិះម៉ូតូចំនួន ២គ្រឿង បានដក កាំភ្លើង ប្លន់យក ម៉ូតូម៉ាក MSX យកទៅបាត់ ដែលជនរងគ្រោះ ទើបនឹងទិញបាន ប៉ុន្មានថ្ងៃ ហើយមិនទាន់បាន ធ្វើស្លាកលេខទៀតផង ។

អំពើប្លន់ប្រដាប់ អាវុធខាងលើនេះ បានកើតឡើងកាល ពីវេលាម៉ោង ២និង៣០នាទីយប់ រំលងអាធ្រាត្រ ឈាន ចូលថ្ងៃទី១៣ ខែមករា ឆ្នាំ២០១៥ ស្ថិតនៅលើកំណាត់ ផ្លូវសហព័ន្ធរុស្សី ទល់មុខ ទីស្ដីការគណៈរដ្ឋមន្ដ្រី សង្កាត់មិត្ដភាព ខណ្ឌ៧មករា ។

សមត្ថកិច្ចមូលដ្ឋាន បានឱ្យដឹងថា ជនរងគ្រោះឈ្មោះ មាស វ៉ាន់ដែន អាយុ២៨ឆ្នាំ ស្នាក់នៅម្ដុំ អង់តែនទួលគោក ដោយជនល្មើស មានគ្នា៣នាក់ ជិះម៉ូតូពីរ គ្រឿងមិនចាំស្លាក ប្រដាប់ដោយអាវុធខ្លី ៣ដើម ។

ជនរងគ្រោះបាន ប្រាប់សមត្ថកិច្ចថា ពេលដែលខ្លួន កំពុងជិះម៉ូតូ តែម្នាក់ឯង លុះមកដល់មុខ ទីស្ដីការគណៈរដ្ឋមន្ដ្រី ក៏លេចមុខជន ល្មើសទាំង៣នាក់ ជិះមកកៀរ ហើយដកកាំភ្លើងឱ្យឈប់ មិនឱ្យស្រែក រួចហើយបានយក ម៉ូតូនិងឆក់ យកខ្សែកបា្លទីន មួយខ្សែ ទម្ងន់៣ជី យកទៅបាត់គេចខ្លួន ដោយសុវត្ថិភាព ។

ក្រោយកើតហេតុ ជនរងគ្រោះ បានដាក់ពាក្យបណ្ដឹង ទៅនគរបាលមូលដ្ឋាន ដើម្បីតាមស្រាវជ្រាវ ចាប់ជនល្មើស ទាំងនេះ ៕

ផ្តល់សិទ្ធដោយ ដើមអម្ពិល