ការចាប់ខ្លួន Hacker ខ្មែរពីរនាក់ នាំឲ្យមានការជជែកមិនចេះចប់ក្នុងចំណោមបញ្ញវន្តខ្មែរ

ការចាប់ខ្លួន Hacker ខ្មែរពីរនាក់ នាំឲ្យមានការជជែកមិនចេះចប់ក្នុងចំណោមបញ្ញវន្តខ្មែរ

ព័ត៌មានដ៏រសើបបំផុតដែលយុវជនខ្មែរ ២ នាក់ត្រូវបានចាប់ខ្លួនដោយការិយាល័យប្រឆាំងបទល្មើសបច្ចេកវិទ្យាព័ត៌មាន នៃនាយកដ្ឋានសន្តិសុខផ្ទៃក្នុង អគ្គស្នងការដ្ឋាននគរបាលជាតិ ក្រសួងមហាផ្ទៃ ជាប់ពាក់ព័ន្ធទៅលើការវាយប្រហារទៅលើបណ្តាញស្ថាប័នព័ត៌មានជាតិសំខាន់ៗ បានក្លាយជាប្រធានបទរឿងដ៏សំខាន់ដែលនាំឲ្យមានការពិភាក្សា និងការសួរដេញដោលគ្នាមិនចេះចប់។

Untitled

សមាជិកក្រុម 4KhmeriPhone មួយរូបបានបង្ហាញការចាប់អារម្មណ៍ចំពោះហេតុការណ៍នេះថា៖ “ខ្ញុំបានដឹងដំណឹងពីការចាប់ខ្លួនយុវជន ២ នាក់ ដែលបានធ្វើការវាយប្រហារគេហទំព័រស្ថាប័នជាតិធំៗមួយចំនួន និងដែលនាំឲ្យមានការចាប់អារម្មណ៍ទូទាំងប្រទេស”។

“ការចាប់ខ្លួនក្រុមអ្នកវាយប្រហារនេះ ជាលើកដំបូងសម្រាប់ប្រទេសកម្ពុជា។ នៅប្រទេសជឿនលឿនការ Hack ចូលទៅគេហទំព័ររបស់រដ្ឋាភិបាលនិងអ្នកដទៃ ត្រូវបានចាត់ទុកថាទង្វើខុសច្បាប់ និងអាចជាប់ទោសឧក្រិដ្ឋផងដែរ។ ដូច្នេះប្រទេសយើង ក៏មិនខុសពីប្រទេសដទៃនោះដែរ”។

លោកបន្ថែមទៀតថា បើតាមមើលទៅក្រុម Hackers ទាំងនោះ ភាគច្រើននជាយុវវ័យនិងកំពុងរៀនមហាវិទ្យាល័យ។ ការបង្រៀនអំពីសុវត្ថិភាព (IT Security) នៅសាលាគឺធ្វើយ៉ាងណាកុំឲ្យមានចន្លោះប្រហោង (Bug ) ប៉ុន្តែពួកគេទាំងនោះយកអ្វីដែលពួកគេសិក្សាទៅប្រើខុសគោលដៅ និងដែលគេហាមឃាត់។

លោកសូមលើកឧទាហរណ៍មួយ គេហទំព័រក្រុមហ៊ុន Apple ក៏មានចន្លោះប្រហោងដែរប៉ុន្តែអ្នកចេះគេប្រាប់ទៅក្រុមហ៊ុនឲ្យជួសជុល មិនមែនទៅ Hack ឲ្យគេហទំព័រគាំងនោះទេ។

ចំណែក លោក បូវី ឈុនឡេង ប្រធានក្រុម CAUG ក៏ឲ្យដឹងដែរថា សកម្មភាពរបស់ពួកគេនេះជាទង្វើដ៏ខុសឆ្គង ដែលអាចនាំឲ្យកើតបញ្ហាដល់សង្គម។ លោកថាសម្រាប់ប្រទេសខ្មែរគឺមានច្បាប់ទម្លាប់ត្រឹមត្រូវ ដូចនេះមុនធ្វើអ្វីមួយត្រូវគិតឲ្យច្បាស់លាស់។

ទោះបីបែបណា ឈុនឡេងបញ្ជាក់ថា បើតាមលោកដឹងពួក Hacker ទាំងនោះគឺគ្រាន់តែ Hack បិទគេហទំព័របណ្ដោះអាសន្ន និងមិនបានលួចទិន្នន័យអ្វីនោះទេ។ យល់ល្អគ្រាន់តែអប់រំទៅ ពីព្រោះពួកគេអាចក្លាយជាសសរទ្រូងដើម្បីបម្រើផលប្រយោជន៍ជាតិនាពេលអនាគត។

ជុំវិញបញ្ហានេះដែរលោក ធូ ចំរើន សាស្ត្រាចារ្យផ្នែកព័ត៌មានវិទ្យានៃសាកលវិទ្យាល័យភូមិន្ទភ្នំពេញបានឲ្យដឹងដែរថា នេះពិតជាគួរសោកស្ដាយ ដែលមិនគួរនិស្សិតដែលរៀនបានខ្ពស់ខ្ពស់បែបនេះ មកប្រព្រឹត្តិសកម្មភាពដែលប្រាសចាកពីការទទួលស្គាល់របស់សង្គម។

លោកបន្តថា Software មួយចំនួនគេបង្កើតស្រាប់ៗដើម្បីឲ្យនិស្សិតសាកល្បងក្នុងការ Hack គេហទំព័រណាដែលមិនផ្លូវការ ដើម្បីឲ្យនិស្សិតទាំងនោះអាចស្វែងយល់និងបង្កើនចំណេះដឹង និងសមត្ថភាព មិនមែនយកមកប្រើប្រាស់ក្នុងគោលដៅឲ្យប៉ះពាល់ដល់អ្នកដទៃនិងសង្គមជាតិនោះទេ។

លោកបន្តដោយកត់សម្គាល់ថា និស្សិតមួយចំនួន ធ្វើអ្វីមួយពុំសូវគិតលើបញ្ហាផ្លូវច្បាប់នោះទេ។ លោកសង្ឃឹមថា និស្សិត IT ទាំងអស់ខំប្រឹងសិក្សា និងយកចំណេះដឹងដែលខ្លួនទទួលបានយកទៅប្រើក្នុងផ្លូវល្អ និងអាចទៅបម្រើផលប្រយោជន៍ប្រទេសជាតិទៅថ្ងៃក្រោយ។

ប្រភព Sabay

មុន បន្ទាប់

មតិយោបល់