ចិន៖ កាលពីពេលថ្មីៗនេះ មានរូបភាព ជាច្រើនសន្លឹក ដែលបង្ហាញពី ទិដ្ឋភាពនៃ សត្វក្ងាន មួយក្បាល បានជ្រមុជក្បាល របស់វាចូលទៅក្នុង ទឹករហូតទាល់ តែងាប់បាត់ ដែលនេះក៏អាចជា ភស្តុតាងមួយ បញ្ជាក់ថា សត្វក៏ចេះធ្វើ អត្តឃាតផងដែរ។

យោងតាមប្រភព ព័ត៌មានបាន ឲ្យដឹងថា ទិដ្ឋភាពដ៏គួរ ឲ្យភ្ញាក់ផ្អើល មួយនេះ ត្រូវបានថតដោយ នារីម្នាក់ឈ្មោះ Yan Yan Hsiao ខណៈពេលដែលនាង កំពុងដើរលេង នៅឯបឹង Sanmenxia នៃខេត្ត ហេណាន របស់ប្រទេស ចិន ហើយការចាប់អារម្មណ៍ ទៅលើសកម្មភាព ដ៏ប្លែករបស់ សត្វក្ងានមួយក្បាលនោះ ទើបនាងសំរេចចិត្ត លើកយកកាមេរ៉ាមកថត តែម្តង។

រូបភាពៈ សត្វក្ងានហែល ក្បែរមេរបស់វា ដែលស្លាប់ មុននឹងធ្វើការ សម្លាប់ខ្លួន ទៅតាមមេ របស់វា

បើតាមការ បញ្ជាក់របស់ Yan Yan បានឲ្យដឹងថា “ដំបូងឡើយ ខ្ញុំឃើញសត្វក្ងាន មួយក្បាល កំពុងហែលទឹក ក្រឡឹងជុំវិញ សត្វក្ងានចំណាស់ មួយផ្សេងទៀត ដែលអាចជាមេ របស់វា កំពុងដេកងាប់ ជាហេតុធ្វើឲ្យ សត្វក្ងានដែលនៅរស់នោះ មានទុក្ខព្រួយ យ៉ាងខ្លាំង ហើយក្រោយមក រឿងដែលមិន គួរឲ្យជឿបានកើតឡើង វាបានស្រែក និងទទះស្លាប នៅលើទឹកបឹង នោះយ៉ាងខ្លាំងៗ បន្ទាប់មកវាក៏បាន ជ្រមុជក្បាល របស់វាចូល ទៅក្នុងទឹក”។

នាងបានបន្តទៀតថា “ពេលនោះខ្ញុំ ស្មានតែវា ធ្វើបែបនេះដើម្បីរំងាប់អារម្មណ៍ តែកន្លងផុត ប៉ុន្មាននាទីទៅ វានៅតែមិន ព្រមងើបក្បាល ចេញពីទឹកមកវិញ ហើយក្រោយមក ក៏ងាប់ក្បែរមេវា តែម្តងទៅ។ ខ្ញុំជឿជាក់ថា សត្វក្ងានមួយក្បាលនោះ គឺមានបំណងសម្លាប់ ខ្លួនឯង ពិតប្រាកដ”។

គួរបញ្ជាក់ផងដែរថា អស់ពេលជាច្រើន ឆ្នាំមកហើយ ដែលអ្នកវិទ្យាសាស្ត្រ ភាគច្រើន មិនជឿ និង ធ្វើការបដិសេធចំពោះ ការលើកឡើង ថាសត្វអាចមាន បំណងធ្វើអត្តឃាត (សម្លាប់ខ្លួន) ដោយខ្លួនឯង តែបន្ទាប់ពីមាន គំរូក៏ដូចជា ភស្តុតាងមួយចំនួនបង្ហាញថា សត្វពិតជាចេះ ធ្វើអត្តឃាត សម្លាប់ខ្លួនឯង ទើបអ្នកវិទ្យាសាស្ត្រ មួយចំនួន បានផ្លាស់ប្តូរទស្សនៈ របស់ពួកគេវិញ ហើយករណីមួយនេះ ក៏ជាភស្តុតាងមួយដែរ ផងដែរ៕

តើប្រិយមិត្តយល់ យ៉ាងណាដែរ?

ទិដ្ឋភាពរួម នៃសកម្មភាព ធ្វើអត្តឃាតរបស់ សត្វក្ងានមួយក្បាល៖

ប្រភព៖ ដេលីម៉េល

ដោយ៖ សុជាតិ

ខ្មែរឡូត