បន្ទាយមានជ័យ៖ ករណីគ្រោះថ្នាក់ចរាចរណ៍ ដ៏រន្ធត់មួយ រវាងរថយន្តទំនើប ឡង៉គ្រឺស័រ ជ្រុលចង្កូត ទៅបុករថយន្តដឹកទំនិញ បណ្តាលឲ្យអ្នកនៅក្នុងរថយន្ត ៤នាក់ រងរបួសធ្ងន់ស្រាល សំណាងល្អពុំអ្នកស្លាប់ ។

ហេតុការណ៍នេះ នៅត្រង់ចំំណុច ខាងត្បូងសាលាសង្កាត់ផ្សារកណ្តាល ប្រមាណជា១០០ នៅវេលាម៉ោង៤និង៤០នាទីល្ងាច កាលពីថ្ងៃទី៩ ខែមករា ឆ្នាំ២០១៥ ស្ថិតនៅភូមិ-សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

បើតាមប្រភពបានឲ្យដឹងថា មុនពេលកើតហេតុ គេឃើញរថយន្តឡង់គ្រឺស័រ ពណ៌ខ្មៅ ពាក់ស្លាកលេខ ភ្នំពេញ 2I-8825 បើកពីជើងទៅត្បូង លុះមកដល់ចំណុច កើតហេតុ បើកបរមិនប្រុងប្រយ័ត្ន ទៅបុករថយន្តដឹកទំនិញម៉ាក នីសាន់ ពណ៌ស ពាក់ស្លាកលេខ ភ្នំពេញ 2D-4714 បើកច្រាសទិញគ្នាចំមុខ បណ្តាលឲ្យមនុស្ស រងរបួសធ្ងន់ស្រាល៤នាក់ ត្រូវបានសមត្ថកិច្ច បានហៅរថយន្តសង្គ្រោះបន្ទាន់ បញ្ជូនទៅកាន់មន្ទីរពេទ្យបង្អែកប៉ោយប៉ែត ។

ក្រោយពីកើតហេតុ គេឃើញមានសមត្ថកិច្ច នគរបាលចរាចណ៍ ចុះមកវាស់វែង និងស្ទួចយករថយន្តទៅរក្សាទុក នៅអធិការដ្ឋាននគរបាលក្រុងប៉ោយប៉ែត រង់ចាំការដោះស្រាយគ្នា តាមនីតិវិធីច្បាប់។

លោក អ៊ុំ សុផល អធិការក្រុងប៉ោយប៉ែត បានប្រាប់ឲ្យដឹងតាមរយៈទូរស័ព្ទ នៅរសៀលថ្ងៃទី១០ ខែមករា ឆ្នាំ២០១៥ រថយន្តរងគ្រោះ បើកបរដោយឈ្មោះ សារិន នីម ភេទប្រុស អាយុ ២៧ឆ្នាំ មុខរបរកម្មករ បណ្តាលឲ្យរងរបួសស្រាល និងអ្នករួមដំណើរ២នាក់ទៀត ឈ្មោះ ឡេង ឡុង ភេទប្រុស អាយុ២៤ឆ្នាំ មុខរបរកម្មករ បណ្តាលឲ្យរងរបួសស្រាល និងឈ្មោះ ហ៊ុយ សាវ៉ាន់ ភេទប្រុស អាយុ៣០ឆ្នាំ មុខរបរកម្មករ បណ្តាលឲ្យរងរបួសធ្ងន់ត្រង់ជើង អ្នកទាំងអស់នេះ រស់នៅភូមិអូរជ្រៅ សង្កាត់ផ្សារកណ្តាល ក្រុងប៉ោយប៉ែត ។

រីឯរងរថយន្តបង្កឡង់គ្រឺស័រ បើកបរដោយឈ្មោះ សើង សាវី ភេទប្រុស អាយុ ៤៧ ឆ្នាំ អត់រងរបួស និងអ្នករួមដំណើជាម្តាយ ឈ្មោះ ឌិត គឹមណាត អាយុ ៦៥ឆ្នាំ បណ្តាលឲ្យរងរបួសធ្ងន់ អ្នកទាំងពីរ រស់នៅភូមិថ្មី ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ៕

ផ្តល់សិទ្ធដោយ ដើមអម្ពិល