អាមេរិក៖ តាមប្រភពព័ត៌មាន បានឲ្យដឹងថា តារាចម្រៀងកូរ៉េ pop-star ម្នាក់ ដែលបាន ជិះយន្តហោះ Korean Air ពីទីក្រុងសេអ៊ូល ទៅកាន់ទីក្រុង San Francisco រដ្ឋកាលី ហ្វញ៉ា ត្រូវបាន ប៉ូលិស FBI នាំខ្លួន ចេញពី ព្រលានយន្តហោះ ដោយសារ តារាកូរ៉េ រូបនេះ បាន ផឹកស្រា បង្ករឿង លើយន្តហោះ និង បំពានផ្លូវភេទ លើនារីអាកាសចរ ថែមទៀត ។

តារាចម្រៀងកូរ៉េ pop-star រូបនេះមាន ឈ្មោះ Bobby Kim អាយុ ៤១ឆ្នាំ បានល្បីនៅ អាមេរិក និង បានត្រូវចុះ ផ្សាយព័ត៌មាន លើទំព័រមុខ នៅក្នុង បណ្តាញ សារព័ត៌មាន កូរ៉េខាងត្បូង កាលពីថ្ងៃ ពុធនេះ បន្ទាប់ពី តារារូបនេះ បានត្រូវ ប៉ូលិសអាមេរិក នាំខ្លួនចេញពី ព្រលានយន្តហោះ ទី ក្រុង San Franciso លើករណីបង្ក សំលេងខ្លាំង និងរឿងហេតុបំពាន ផ្លូវភេទ លើយន្តហោះ ។ បើយោងតាម សាក្សី ដែលបានឃើញ ហេតុការណ៍នេះ បាននិយាយថា តារាចម្រៀង Bobby Kim បានស្រវឹង ស្រា ប្រហែលជា ៥ម៉ោង លើយន្ត ហោះ ដែលចាកចេញ ពី ព្រលានយន្តហោះ Incheon  កូរ៉េខាងត្បូង ហើយបន្ទាប់មក តារានេះ ក៏ស្រែក ក្នុងយន្តហោះ និង បំពានផ្លូវ ភេទលើ នារី អាកាសចរ ម្នាក់ ដោយបានចាប់ ចង្កេះរបស់នាង ។ យ៉ាងណាមិញ បើតាមសំដី អ្នកតំណាង របស់តារា នេះ បាននិយាយថា លោក Kim ចាប់ផ្តើមផឹកស្រា បន្ទាប់ពី គាត់ ខឹងមិនពេញចិត្ត នៅពេល គាត់ដឹងថា គាត់ត្រូវ អង្គុយកៅអី ធម្មតា ( economy class ) ដែលមិនមែនជា កៅអីលំដាប់ជាប់ខ្ពស់ ( Bussiness Class) នោះ ។

ក្នុងហេតុការណ៍នេះ ត្រូវបានដឹងថា កើតឡើងប្រហែលជិតមួយ ១ម៉ោង នៅពេលយន្តហោះកំពុង ហោះហើរពី កូរ៉េខាងត្បូង មកកាន់ សហរដ្ឋ អាមេរិក  ហើយនៅពេលដែលយន្តហោះ ចុះចត នៅព្រលានយន្តហោះ San Francisco ប៉ូលិស FBI និង សន្តិសុខព្រលាន យន្តហោះ បានឃាត់ ខ្លួន និង នាំខ្លួន តារានេះចេញពី ព្រលានយន្តហោះ តែម្តង។

ខណៈនេះ អាជ្ញាធរ អាមេរិក កំពុងធ្វើការស៊ើបអង្កេត លើករណី តារារូបនេះ ខណៈដែល ក្រុមហ៊ុន អាកាសចរណ៍ Korean Air រាយការណ៍ថា នឹងចេញ សេចក្តី ស្តីបន្ទោស ចោទ ប្រកាន់លើ សកម្មភាព របស់លោក Bobby Kim  ផងដែរ ។ រីឯ អាជ្ញាធរ កូរ៉េខាងត្បូង ក៏ថា នឹងត្រួតពិនិត្យលើ រឿងហេតុនេះ នៅពេល ដែល លោក Bobby Kim មកដល់ប្រទេស កូរ៉េខាងត្បូង វិញ ។

គួរបញ្ជាក់ដែរ  លោក Bobby kim កំពុងតែស្ថិតក្រុមការសាកសួរចម្លើយ នៅក្នុងទីក្រុង San Francisco នៅឡើយ ខណៈដែល នារី អាកាសចរ ពីរនាក់ និងអ្នកដំណើរចំនួននាក់ទៀត អង្គុយជិត គាត់ ក៏ ត្រូវបានប៉ូលិស ហៅ មកសាកសួរផងដែរ ។ រីឯ ក្រុមហ៊ុន កំសាន្ត ដែលលោក Bobby Kim ធ្វើការនៃ ឯកូរ៉េខាងត្បូង នោះវិញ ក៏មិនបាន ធ្វើការបដិសេធ អ្វី លើ រឿងហេតុរបស់ Bobby Kim ដែរ ៕ 

តារាចម្រៀងកូរ៉េ pop-star លោក  Bobby Kim

យន្តហោះ ក្រុមហ៊ុនអាកាសចរណ៍ Korean Air

ប្រភព Dailymail

ដោយ៖ ទីន

ខ្មែរឡូត