កណ្ដាល ៖ បុរសពីរនាក់ មិនទាន់ស្គាល់ អត្ដសញ្ញាណ ខណៈកំពុងជិះ ម៉ូតូស្រាប់តែ រថយន្ដហ៊ីយ៉ាន់ដាយ មួយគ្រឿង ដែលបើក បញ្ច្រាសទិស បានបុកអូស កាលពីវេលាម៉ោង ៩និង២៥នាទី ព្រឹកថ្ងៃទី៨ ខែមករា ឆ្នាំ២០១៥ ស្ថិតនៅចន្លោះ គីឡូម៉ែត្រលេខ ៣០-៣១ លើកំណាត់ផ្លូវ ជាតិលេខ៤ ភូមិព្រៃក្រឡាញ់ ឃុំលំហាច ស្រុកអង្គស្នួល ខេត្ដកណ្ដាល ។

សមត្ថកិច្ចមូលដ្ឋាន បានបញ្ជាក់ថា រថយន្ដបង្ក ម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ 3B-9157 ធ្វើដំណើរពី កើតទៅលិច លុះដល់ចំណុចកើតហេតុ បានជ្រុលទៅបុក ជនរងគ្រោះទាំងពីរនាក់ កំពុងបើកម៉ូតូឌុបគ្នា ម៉ាកហុងដា សេ១២៥ ពណ៌ខ្មៅស្លាកលេខ ភ្នំពេញ 1AE-7791 បណ្ដាលឱ្យ ស្លាប់ភ្លាមៗនៅ កន្លែងកើតហេតុ។

អ្នកបើករថយន្ដ ត្រូវបានសមត្ថកិច្ចដេញ ចាប់បាន ក្រោយបើកគេច ខ្លួនជាង៤០០ម៉ែត្រ ។ ជនរងគ្រោះទាំងពីរនាក់ មិនទាន់ស្គាល់ អត្ដសញ្ញាណ នៅឡើយ ប៉ុន្ដែមានអាយុ ជាង២០ឆ្នាំ បច្ចុប្បន្នទាំងម៉ូតូ និងរថយន្ដត្រូវបាន សមត្ថកិច្ចយកទៅ រក្សានៅអធិការដ្ឋាន នគរបាលស្រុក អង្គស្នួល រង់ចាំការដោះស្រាយ បន្ដទៀត៕

ផ្តល់សិទ្ធដោយ ដើមអម្ពិល