កូឡំប៊ី៖ យោងតាមប្រភពព័ត៌មាន បានឲ្យដឹងថា យ៉ាងហោចណាស់ មានមនុស្សចំនួន ២នាក់ បានរងរបួស បន្ទាប់ពីមាន ហេតុការណ៏ ផ្ទុះរោងចក្រ ផលិតកាំជ្រួច មួយកន្លែង នៅក្នុងប្រទេសកូឡំប៊ី។

ការផ្ទុះរោងចក្រ ផលិតកាំជ្រួចនេះ បានបណ្តាលឲ្យ គ្រាប់កាំជ្រួច ជាច្រើនគ្រាប់ បាញ់បាចសាច ពេញផ្ទៃមេឃ បង្កជាគ្រោះថ្នាក់ យ៉ាងខ្លាំង ខណៈហេតុការណ៏នេះ ត្រូវបានបុរសម្នាក់ ថតជាវីដេអូឃ្លីប ជាប់ស្តែងៗ តែម្តង ដើម្បីទុកជាឯកសារ។

បុរសដែលមិនគិត ពីសុវត្ថិភាព ខ្លួនឯង ដើម្បីថតយក វីដេអូឃ្លីប នៃហេតុការណ៏នោះ នៅពេលកើតហេតុ បានជំពប់ជើងដួល ដោយសារតែ គេចពីគ្រាប់កាំជ្រួច ខណៈរោងចក្រ ផលិតកាំជ្រួចនោះ បានផ្ទុះឡើង យ៉ាងខ្លាំង បែកចេញជា គ្រាប់កាំជ្រួច ពាសពេញ ផ្ទៃមេឃ មើលទៅពិតជា ស្រស់ស្អាត ប៉ុន្តែក៏គួរឲ្យខ្លាច និងរន្ធត់ផងដែរ។

យ៉ាងណាមិញ មនុស្សម្នាក់ ក្នុងចំណោម មនុស្សចំនួន២នាក់ ដែលបានរងរបួសនោះ ត្រូវបានរាយការណ៏ មកថា គឺជាអ្នកដំណើរ ដែលកំពុងតែ ជិះម៉ូតូ ឆ្លងកាត់រោងចក្រ នៅពេលដែល វាបានផ្ទុះឡើង។ ទោះជាយ៉ាងណា មិនមានមនុស្ស ណាម្នាក់ បានស្លាប់ បាត់បង់ជីវិត ឡើយ នៅក្នុងហេតុការណ៏នេះ។

ជាមួយគ្នានេះដែរ គេមិនទាន់រកមូលហេតុ ឃើញនៅឡើយទេ ពីការផ្ទុះរោងចក្រ ផលិតកាំជ្រួចនេះ ខណៈឃ្លាំងស្តុកឥវ៉ាន់ ចំនួន៥ ត្រូវបានបំផ្លាញ ខ្ទេចអស់គ្មានសល់៕

ទស្សនាវីដេអូនៅពេលកើតហេតុ៖

ប្រភព ៖ មេត្រូ

កែសម្រួលដោយ ៖ ប៊ី

ខ្មែរឡូត