ខេត្តកណ្តាល ៖ ស្ត្រីចិត្តសឿងព្រៃផ្សៃម្នាក់បានត្រូវនគរបាលខេត្តសហការជាមួយនគរបាល ស្រុកកោះធំ ស្រាវជ្រាវ និងឃាត់ខ្លួន កាលពី វេលា ម៉ោង៩យប់ ថ្ងៃទី២ មករា ឆ្នាំ២០១៥ បន្ទាប់ពីបានយក កំណាត់ឈើ កាំរទេះគោ វាយសម្លាប់ស្ត្រីម្ចាស់បំណុល កាលពីរសៀល ថ្ងៃទី ៣១ ធ្នូ ឆ្នាំ២០១៤ នៅក្នុង បន្ទប់ក្រោម ផ្ទះរបស់ខ្លួន ស្ថិតក្នុង ភូមិពោធិ៍បាន ឃុំពោធិ៍បាន ស្រុកកោះធំ ហើយយកសព ដាក់ក្នុងកញ្ឆេរ យក ទៅ ទំលាក់ចោល ក្នុងទឹកទន្លេ ព្រោះខឹង មកទារមាស នៅជំពាក់មួយជី ស្រែកឡូឡា ខ្លាចខ្មាស់គេ និងខ្លាចប្ដី ដឹង។

សពស្ត្រីរងគ្រោះត្រូវបានគេប្រទះឃើញអណ្តែតតាមខ្សែទឹក ទន្លេបាសាក់ កាលពីរសៀលថ្ងៃទី២ មករា ឆ្នាំ២០១៥ មកទើនៅ ចំណុចក្បាល កោះថ្មី ស្ថិតក្នុងភូមិកោះថ្មី ឃុំកោះធំ(ក) ស្រុកកោះធំ រួចមកកម្លាំង នគរបាលស្រុកកោះធំ សហការជាមួយ កម្លាំងបច្ចេកទេស ខេត្តចុះធ្វើ ការពិនិត្យ និង ស្រាវជ្រាវរហូត ឈានដល់ធ្វើការឃាត់ ខ្លួនជនដៃដល់ដែល បានវាយសម្លាប់ ស្ត្រីរងគ្រោះ ។

លោកវរៈសេនីយ៍ត្រី មុយ ចាន់ពេជ្រ អធិការនគរបាលស្រុកកោះធំ បានឲ្យដឹងថា ជនសង្ស័យមាន ឈ្មោះ ឡឹង កូលាប ភេទស្រី អាយុ ២៥ឆ្នាំ មុខរបរ កសិករ មានទីលំនៅ ភូមិពោធិ៍បាន ឃុំ ពោធិ៍បាន ស្រុកកោះធំ ។ ចំណែកស្ត្រីរងគ្រោះមានឈ្មោះ ស្រ៊ុន ស្រិុន អាយុ៧៧ឆ្នាំ មុខរបរចងការប្រាក់ មានទីលំនៅក្នុង ភូមិ-ឃុំជាមួយគ្នា ។

ជនដៃដល់ឈ្មោះ ឡឹង កូលាប បានសារភាពប្រាប់សមត្ថកិច្ចនគរបាលថា នៅវេលាម៉ោង១ និង៣០នាទី រសៀល ថ្ងៃទី៣១ ធ្នូ ឆ្នាំ២០១៤ ជនរងគ្រោះបាន មកផ្ទះរបស់ខ្លួន ដើម្បីទារប្រាក់ដែល ខ្លួននៅជំពាក់ ១ជីមាស។ ពេលនោះខ្លួនបាន ប្រាប់ជនរងគ្រោះ ជាម្ចាស់បំណុលថា ខ្លួនមិនទាន់មាន មាសសងទេ ពេលនោះជន រងគ្រោះក៏បានស្រែកជេរ ហើយឡូឡាខ្លាំងៗ ដោយអង្គុយ ក្នុងបន្ទប់ថ្ម ខាងក្រោមផ្ទះ ។ នៅពេលនោះ ដែរខ្លួនបានប្រាប់ ជនរងគ្រោះកុំ មាត់ឡូឡាខ្លាំងពេក ព្រោះខ្លាចប្តី និងម្តាយខ្លួន ព្រមទាំង អ្នកជិត ខាងដឹងខ្មាស់គេ តែជនរង គ្រោះនៅ តែឡូឡា ទើបខ្លួនមានគំនិត សម្លាប់ជនរងគ្រោះចោល ។

នៅព្រឹកថ្ងៃទី៣ មករា ឆ្នាំ២០១៥ សមត្ថកិច្ចនគរបាលជំនាញបាននាំខ្លួនជនសង្ស័យទៅកាន់លំនៅឋាន ឲ្យធ្វើ ត្រាប់តាម សកម្មភាព វាយ សម្លាប់ ជនរងគ្រោះ រួចអូសសាកសព យកទៅទម្លាក់នៅ ក្នុងទឹក ទន្លេបាសាក់នោះ និងបានកសាង សំណុំរឿងដើម្បី បញ្ជូនជនសង្ស័យ ទៅ កាន់តុលាការ ផ្ដន្ទាទោសតាមច្បាប់ ៕

ស្ត្រីសង្ស័យ និងវត្ថុតាង

សពស្ត្រីរងគ្រោះ

ស្ត្រីសង្ស័យត្រូវសមត្ថកិច្ចនាំមកធ្វើត្រាប់សកម្មភាព

ផ្តល់សិទ្ធដោយ កោះសន្តិភាព