ពែកមី ទម្លាយអាថ៌កំបាំង នាយ គ្រឿន

ពែកមី ទម្លាយអាថ៌កំបាំង នាយ គ្រឿន

នាយ ពែកមី តារាកំប្លែងរបស់ស្ថានីយទូរទស្សន៍ CTN បានទម្លាយអាថ៌កំបាំង ពីជីវិតឯកជនរបស់ នាយ គ្រឿន កាលពីកុមារភាព។ តើនាយ គ្រឿន មានរឿងអ្វី ដល់ថ្នាក់ នាយ ពែក មី ដែលជាបងប្រុសបង្កើតខ្លួន ទម្លាយអាថ៌កំបាំងបែបនេះ?

ក្នុងជំនួបជាមួយគេហទំព័រ Sabay កាលពីពេលកន្លងទៅ នាយ ពែកមី បានឲ្យដឹងថា នាយគ្រឿន មានរឿងឆែបមាត់ មិនខុសពីខ្លួនឡើយ គ្រាន់តែស្នាមឆែបមាត់ របស់នាយ គ្រឿន មានស្នាមតិចជាងខ្លួន ប្រសិនបើទស្សនិកជនមើលមិនចាប់អារម្មណ៍គឺមិនដឹងឡើយ។

ពែកមី បានរំលឹកឲ្យដឹងថា កាល នាយ គ្រឿនមានវ័យ ១០ ឆ្នាំ នាយ គ្រឿន បានជិះកង់លេងនៅក្នុងភូមិ គ្រានោះបានទាក់នឹងខ្សែគោ ដែលម្ចាស់គោ ចងគោឲ្យស៊ីស្មៅ។ កាលណោះ នាយ គ្រឿន បានដួល ហើយមាត់បុកនឹងកង់រយះក្រអូមមាត់ ដោយបានម្ដាយ-ឪពុកយកទៅពេទ្យព្យាបាល ហើយដេរជាច្រើនថ្នេរ។ ក្រោយពីជាសះស្បើយ មាត់នាយ គ្រឿន មានស្នាមសម្លាក ប៉ុន្តែស្នាមនោះតិចជាងខ្លួន។

ទោះបីជួបករណីឆែបមាត់ដូចគ្នាក្ដី ប៉ុន្តែទីតាំង និងពេលវេលាបានកើតឡើងខុសគ្នា នាយ ពែកមី ជួបករណីគ្រោះថ្នាក់ឆែបមាត់ នៅអាយុ ២ ឆ្នាំ គ្រាដែលក្រុមគ្រួសារ នាយ បានទៅរស់នៅជុំរុំដងរែក តាមបណ្ដោយជួរភ្នំដងរែកជិតប្រទេសថៃ កាលណោះនាយបាន ឡើងលេងលើរបងផ្ទះអ្នកភូមិ ហើយបានធ្លាក់មុតនឹងកំប៉ុងត្រី ខ។ ប៉ុន្តែករណីនាយ គ្រឿនវិញ ខុសពី នាយ ពែកមី ។ នាយ គ្រឿន បានជួបគ្រោះថ្នាក់នោះ គឺស្ថិតនៅ ក្នុងស្រុកកំណើតនៅឯខេត្តស្វាយរៀង ក្រោយពីក្រុមគ្រួសាររបស់ខ្លួនបាន វិលពីជុំរុំដងរែក មករបស់នៅស្រុកកំណើតវិញ។

ទោះបីជាបច្ចុប្បន្នបងប្អូនទាំងពីរនាក់នេះ មានលទ្ធភាពគ្រប់គ្រាន់ដើម្បី លុបស្នាមឆែបនេះចេញក្ដី ប៉ុន្តែ នាយ ពែកមី បញ្ជាក់ប្រាប់ថា មិនមានគម្រោងលុបស្នាមនេះឡើយ ព្រោះស្នាមសម្លាកនេះ គឺជា អត្តសញ្ញាណសំគាល់របស់បងប្អូនខ្លួន នឹងជាអនុស្សាវរីយ កាលពីកុមារភាពរបស់ខ្លួនផងដែរ៕

ប្រភព Sabay

មុន បន្ទាប់

មតិយោបល់