ប្រេស៊ីល៖ បុរសម្នាក់ បានជិះម៉ូតូ ចំងាយជាង ១០០គីឡូម៉ែត្រ អស់រយៈពេល ២ម៉ោង ដើម្បីទៅកាន់មន្ទីរពេទ្យ ដោយខ្លួនឯង ទាំងមានកាំបិត ជាប់នឹងក្បាល។

តាមប្រភពព័ត៌មាន បានឲ្យដឹងថា បុរសដែលជិះម៉ូតូ ទៅកាន់មន្ទីរពេទ្យ ដោយខ្លួនឯង ទាំងមាន កាំបិតចាក់ទម្លុះ ជាប់លលាដ៍ក្បាល ជម្រៅប្រហែល ៣០សង់ទីម៉ែត្រ មានឈ្មោះ Juacela Nunes បានចំណាយរយៈពេល ២ម៉ោង ទម្រាំ ជិះដល់មន្ទីរពេទ្យ។ Juacela ត្រូវបានគេវាយប្រហារ ដោយកាំបិត នៅក្នុងពិធីជប់លៀងមួយ ដោយកាំបិតនោះ បានចាក់ទម្លុះក្បាល ត្រង់សៀតផ្កា ខាងឆ្វេង សំណាងល្អ មិនត្រូវចំភ្នែក ទើបមិនបណ្តាល ឲ្យរងរបួសធ្ងន់ធ្ងរ។

ជាមួយគ្នានេះដែរ បន្ទាប់ពីត្រូវគេ វាយប្រហារភ្លាមៗ លោក Juacela បានជិះម៉ូតូ ដោយខ្លួនឯង ទៅកាន់មន្ទីរពេទ្យមួយកន្លែង ក្នុងទីក្រុង Teresina នៃប្រទេសប្រេស៊ីល។ ពេលទៅដល់មន្ទីរពេទ្យ គ្រូពេទ្យបាន យកកាំបិតចេញ ពីក្បាលរបស់គាត់ ដោយសុវត្ថិភាព ហើយក្រៅពីរបួសត្រង់ក្បាល គាត់ក៏ត្រូវបាន កាំបិតចាក់ចំ ទ្រូង និង បំពង់-ក ផងដែរ ប៉ុន្តែ មិនមានគ្រោះថ្នាក់ ដល់ជីវិតនោះទេ។

យ៉ាងណាមិញ ប៉ូលីសបានធ្វើការសន្និដ្ឋានថា ការវាយប្រហារ ទៅលើលោក Juacela នេះ ត្រូវបានជនដៃដល់ គិតទុកជាមុន ក្នុងគោលបំណងសម្លាប់តែម្តង។ ចំណែកឯប្រពន្ធរបស់គាត់ បាននិយាយថា ការនៅរស់រាន មានជីវិតរបស់គាត់ គឺជាអព្ភូតហេតុដ៏អស្ចារ្យ៕

រូបថតកាំរស្មីអ៊ិច


អ្នកជំងឺ ក្រោយពេល យកកាំបិតចេញ ពីក្បាល

ប្រភព៖ មេត្រូ

ដោយ និមល

ខ្មែរឡូត