ស្អីគេ! ល្បីៗថ្នាក់ហ្នឹងហើយមានចំណូលក្រោម ១ ដុល្លារ?

ស្អីគេ! ល្បីៗថ្នាក់ហ្នឹងហើយមានចំណូលក្រោម ១ ដុល្លារ?

ឃើញចំណងជើងទស្សនិកជនប្រហែលជាមិនជឿ ព្រោះសុទ្ធតែតារាល្បីៗ មានចំណូលក្រោម ១ ដុល្លារ ប៉ុណ្ណោះ។ ប៉ុន្តែនេះជាជីវិតពិតរបស់តារា ៦ ដួងធ្លាប់ឆ្លងកាត់មុននឹងពួកគេឈានដល់តារាល្បីៗ មានចំណូលរាប់ពាន់រាប់ម៉ឺនដុល្លារក្នុងមួយឆ្នាំ។

ខាងក្រោមនេះ គឺជារឿងពិតរបស់តារាស្រី-ប្រុស ៦ ដួងធ្លាប់ហែលឆ្លងការលំបាក ក្រោមចំណូល ១ ដុល្លារក្នុងមួយយប់ ឬមួយកម្មវិធី។

khmer stars

លោក សុខ រក្សា កើតក្នុងត្រកូលគ្រួសារមានជីវភាពលំបាក។ លោកធ្លាប់ជាអ្នកលក់ទឹកសណ្ដែក ទឹកអំពៅ និង ចេកឆឹងជាដើមដើម្បីយកប្រាក់ជួយទំនុកបម្រុងគ្រួសារ។ ខ្សែជីវិតរបស់តារារូបនេះ ធ្លាប់ដើរលេងហ្គីតា តាមរោងល្ខោន និង តាមរង្គសាលផ្សេងៗ ដោយទទួលចំណូលមិនដល់មួយដុល្លារផងក្នុងមួយយប់។ ពេលខ្លះ លោក សុខ រក្សា ទទួលបានប្រាក់ ៥ ពាន់រៀលក្នុងមួយកម្មវិធី។

ក្នុងឆ្នាំ ១៩៩៩ តារាចម្រៀងខាងលើបានសម្រេចចិត្តមកស្វែងរកការងារធ្វើនៅភ្នំពេញ។ ការងារលើកដំបូងរបស់លោកនៅភ្នំពេញ គឺអ្នកលេងហ្គីតានៅក្នុងភោជណីយដ្ឋាន បុប្ផាទិព្វ ដោយទទួលបានប្រាក់ ៣ ដុល្លារប៉ុណ្ណោះ។

ឆ្នាំ ២០០៥ លោកបានក្លាយជាអ្នកចម្រៀង និង អ្នកលេងហ្គីតាក្នុងផលិតកម្មហង្សមាស។ ចាប់តាំងពីពេលនោះមកតារាចម្រៀងមានប្រភពមកពីខេត្ត បាត់ដំបងរូបនេះ លែងមានជីវភាពលំបាកដូចមុនទៀតហើយ ដោយចំណូលចាប់ផ្ដើមកើនឡើង មិនមែនក្រោម ១ ដុល្លារដូចមុនទៀតទេ។

ក្នុងឆ្នាំ២០១០ លោក សុខ រក្សា ចាកចេញពី ហង្សមាស ទៅកាន់ផលិតកម្មសាន់ដេ។ការបោះជំហានទៅកាន់ផលិតកម្មថ្មីធ្វើឱ្យមុខមាត់តារាចម្រៀងខាងលើកាន់តែមានភាពល្បីឈ្មោះជាមុន ដោយតម្លៃខ្លួនរបស់លោកក្នុងការច្រៀងមួយយប់ ឬមួយកម្មវិធីសុទ្ធតែរាប់រយរាប់ពាន់ដុល្លារ។

sok raksa

អ្នកនាង ស្រេង សុកាន់ដា ហៅ ខ្ញុង មុននឹងសាងភាពល្បីឈ្មោះមកដល់បច្ចុប្បន្ន តារាកំប្លែងរូបនេះ ធ្លាប់ឆ្លងកាត់ការលំបាកគ្រប់បែបយ៉ាង។ បញ្ហាជីវភាពក្រីក្រ ព្រមទាំងមានបងប្អូនច្រើនតារាកំប្លែងមានប្រភពមកពី កៀនស្វាយ ខេត្ត កណ្ដាល សម្រេចចិត្តបោះបង់ការសិក្សា ដោយដើរស៊ីឈ្នួលលក់អង្ករឱ្យគេ និង ឆ្លៀតពេលច្រៀងតាមក្លិបយប់ៗដើម្បីយកប្រាក់ជួយទំនុកបម្រុងគ្រួសារ។

ការច្រៀងនៅតាមក្លិបរាត្រីអ្នកកំប្លែងល្បីឈ្មោះរូបនេះទទួលបានចំណូលមិនដល់ ១ ដុល្លារនោះទេ។ យ៉ាងណាក៏ដោយ ស្រេង សុកាន់ដា ហៅខ្ញុង នៅតែតស៊ូដើម្បីធ្វើយ៉ាងណាប្រាក់ជួយដោះស្រាយទុកលំបាកគ្រួសារ។

ខ្ញុងបានរៀបអាពាហ៍ពិពាហ៍នឹងបុរសជាជំនួញម្នាក់នៅខេត្ត សៀមរាប ប៉ុន្តែក្រោយមកបានលែងលះគ្នាទៅវិញ។ ក្រោយពីលែងលះហើយនៅឆ្នាំ២០០៩ តារាកំប្លែងពូកែវោហារខាងលើបានដាក់ពាក្យប្រឡងធ្វើជាតារាកំប្លែងប្រចាំស្ថានីយទូរទស្សន៍ CTN។

បន្ទាប់ពីជាប់ជាតារាកំប្លែងភ្លាម ចំណូលរបស់នាងក្នុងការច្រៀង និងកំប្លែងតាមកម្មវិធីនានា មិនក្រោម ១ដុល្លារដូចមុនទៀតទេ គឺចាប់ពីរាប់រយ រាប់ពាន់ដុល្លារឡើងទៅរហូតមកទល់នឹងបច្ចុប្បន្ន។

knhung

និយាយពីតារាចម្រៀងសំឡេងស្អកក្នុងផលិតកម្ម Town លោក ខេម វិញគឺមិនចាញ់តារាខាងលើប៉ុន្មានទេគឺពេលខ្លះលោករកចំណូលមិនបាន ១ដុល្លារ ឬក្រោម១ដុល្លារផងក៏មានក្នុងមួយយប់។

មុនក្លាយជាតារាចម្រៀងមានកេរ្តិ៍ឈ្មោះល្បីមកដល់បច្ចុប្បន្នលោក ប៉ុន សុណារិន ហៅខេម ធ្លាប់ជាអ្នករត់ម៉ូតូឌុបយកប្រាក់ជួយជីវភាពគ្រួសារ ព្រោះតែម្ដាយមានជីវភាពក្រីក្រនៅតែឯងដោយឪពុកបានស្លាប់ចោល។

ដោយសារតែជឿជាក់ថាខ្លួនឯងមានទឹកដមសំនៀងគ្រាន់បើ ខេម បានសម្រេចចិត្តដាក់ពាក្យប្រឡងជាអ្នកចម្រៀងក្នុងកម្មវិធី Boy Band របស់ស្ថានីយទូរទស្សន៍ CTN ក្នុងឆ្នាំ ២០០៧។ បន្ទាប់ពីជាប់ជាអ្នកចម្រៀងក្នុងកម្មវិធីនេះហើយលោកនៅតែរកផលិតកម្មច្រៀងអត់បានដដែល ព្រមទាំងជួបការលំបាកផ្នែកជីវភាពទៀតផង។

ខេម បានសម្រេចចិត្តរកក្លិបរាត្រីច្រៀងដើម្បីរកប្រាក់ដោះស្រាយជីវភាពប្រចាំថ្ងៃ។ បើទោះដឹកថាក្លិបរាត្រីផ្ដល់ប្រាក់ក្រោម ១ ដុល្លារក្នុងមួយយប់ក្ដី តារាចម្រៀងមានប្រភពមកពីខេត្ត កំពង់ឆ្នាំងនៅតែតស៊ូច្រៀងដើម្បីធ្វើយ៉ាងណាឱ្យបានប្រាក់យកមកដោះស្រាយជីវភាពបានមួយគ្រា។

យ៉ាងណាក៏ដោយមកដល់បច្ចុប្បន្ន ខេម លែងមានតម្លៃខ្លួនក្រោម ១ ដុល្លារដូចមុនទៀតហើយ។ ការច្រៀងរបស់ ខេម សព្វថ្ងៃនៅតាមកម្មវិធីនានា គឺមិនក្រោម ១ ពាន់ដុល្លារនោះទេ គឺ ១ គុណ ១០ ដង ធៀបនឹងពេលមុនៗក្នុងការច្រៀងមួយយប់ ឬមួយកម្មវិធី។

khem

អ្នកនាង ខាត់ សុឃីម ប្រឡូកសិល្បៈតាំងពីតូចមកម្ល៉េះ ព្រោះគ្រួសាររបស់នាងជាអ្នកសិល្បៈទាំងអស់។ បើទោះជាគ្រួសារសុទ្ធសឹងតែជាអ្នកសិល្បៈក្ដី ពីមុនជីវភាពរបស់នាងជួបការលំបាកជាខ្លាំង។ ដោយសារតែបងប្អូនច្រើន រួមទាំងជីវភាពក្រីក្រទៀតអ្នកច្រៀង ប្រជាប្រិយភាពរូបនេះសម្រេចចិត្តចេញស្វែងរកប្រាក់ដើម្បីយកមកជួយដោះស្រាយការលំបាករបស់គ្រួសារ។

ក្នុងមួយយប់អ្នកនាង ខាត់ សុឃីម ត្រូវច្រៀងនៅតាម រង្គសាល និងភោជនដ្ឋានពីរ ទៅបី ហើយក្នុងមួយកន្លែងៗ នាងទទួលបានប្រាប់មិនដល់ ១ដុល្លារនោះទេ។ យ៉ាងណាក៏ដោយនាងនៅតែសប្បាយចិត្ត ហើយប្រឹងតស៊ូរហូតទទួលបានផ្លែផ្កាត្រចះត្រចង់។

មកទល់នឹងបច្ចុប្បន្ននរណាៗក៏ស្គាល់សម្អាងការ ខាត់ សុឃីម និងកេរ្តិ៍ឈ្មោះល្បីរបស់នាងដែរ។ ចំណូលរបស់អ្នកនាងក្នុងពេលបច្ចុប្បន្នក្នុងមួយថ្ងៃគឺចាប់ពីពាន់ដុល្លារឡើងទៅ។

khat sokhim

ប្រិយមិត្តប្រាកដជាស្គាល់ច្បាស់ពិធីការិនីល្បីឈ្មោះ អ្នកនាង គង់ សុជាតិ នាពេលបច្ចុប្បន្ន។ ប៉ុន្តែបើនិយាយបកទៅក្រោយពីជីវិតតារាល្បីរូបនេះ គឺនាងធ្វើការមិនយកប្រាក់សូម្បីតែ ១ ដុល្លារ។

អ្នកនាង គង់ សុជាតិ កើតក្នុងត្រកូលគ្រួសារអ្នកក្រីក្រនៅខេត្ត ក្រចេះ។ អ្នកនាងធ្លាប់ឆ្លងហែលឆ្លងកាត់ការលំបាកផ្សេងៗក្នុងជីវិតមិនចាញ់តារាផ្សេងៗប៉ុន្មានទេ។

កើតក្នុងត្រកូលជាអ្នកលក់ ចេកឆឹងពិធីការិនីរូបនេះ បានដាក់ពាក្យធ្វើជាពិធីការិនីក្នុងស្ថានីយទូរទស្សន៍ IBC បច្ចុប្បន្នជាស្ថានីយទូរទស្សន៍ប៉ុស្ថិលេខ៥។ ការដាក់ពាក្យធ្វើជាពិធីការិនីដំបូង គង់ សុជាតិ មិនទទួលបានចំណូលនោះទេ សូម្បីតែ ១ ដុល្លារ ព្រោះតែស្រលាញ់ការងារនេះពេក។ ប៉ុន្តែក្រោយមកនាងទទួលបានប្រាក់ខែ ១១១ ដុល្លារក្នុងមួយខែ។

និយាយរឿងបច្ចុប្បន្នភាពអ្នកនាង គង់ សុជាតិ អាចនិយាយថា ជាតារាមានទ្រព្យស្ដុកស្ដម្ភម្នាក់ក៏ថាបាន ព្រោះនាងមានរបររកស៊ីច្រើន។ ដោយឡែកចំណូលទទួលបានពីការធ្វើជាពិធីការិនីឯណោះវិញក៏ទទួលបានចំណូលច្រើនខុសពីមុនដាច់។!

kung socheat

នឹកដល់រឿងជីវិតជាអ្នកលក់ទឹកអំពៅ និងលក់អង្ករលោកអ្នកប្រាកដជាស្គាល់ ជីវភាពលំបាករបស់តារាចម្រៀងល្បីឈ្មោះ ពេជ្រ សោភា កាលពីពេលកន្លងទៅ ព្រោះតារាចម្រៀងរូបនេះធ្លាប់រកចំណូលពី១ដុល្លារទៅ ២ដុល្លារតែប៉ុណ្ណោះក្នុងមួយថ្ងៃកាលពីអតីតកាល។

កញ្ញា ពេជ្រ សោភា ធ្លាប់ធ្វើជាអ្នកចម្រៀងតាម ភោជណីយដ្ឋាន និង រង្គសាលនានាពីរទៅបីកន្លែងក្នុងមួយយប់ដោយមានប្រាក់ចំណូលមិនដល់១ដុល្លារនោះទេ។

ប្រការមាននិស្ស័យនឹងសិល្បៈកញ្ញា ពេជ្រ សោភា បានប្រឡងជាប់ជាអ្នកចម្រៀងក្នុងភោជនដ្ឋានមួយនៅភ្នំពេញ មុននឹងបោះជំហានមកកាន់ផលិតកម្មរស្មីហង្សមាសនៅឆ្នាំ ២០០៣។ ចំណូលរបស់តារាចម្រៀងរូបនេះបច្ចុប្បន្នធៀបនឹងពេលមុនគឺខុសដាច់តែម្ដង។ សព្វថ្ងៃ ពេជ្រ សោភា ច្រៀងក្នុងកម្មវិធីប្រគំតន្ត្រីនានាគឺមានតម្លៃខ្លួនចាប់ពី ១២០០ ដុល្លារឡើងទៅ។

pich sophea

ក្រៅតែពីតារា ៦ដួងខាងលើនៅមានសិល្បករ សិល្បការិនីជាច្រើនទៀត សុទ្ធសឹងតែធ្លាប់ហែលឆ្លងជួបការលំបាកមុននឹងពួកគេសាងភាពល្បីឈ្មោះមកដល់បច្ចុប្បន្ន គ្រាន់តែការលំបាករបស់ពួកគេម្នាក់មានភាពផ្សេងៗពីគ្នា៕

ប្រភព Sabay

មុន បន្ទាប់

មតិយោបល់