ភ្នំពេញ ៖ ជនទំនើងពីរនាក់ ដែលបង្ក អសន្ដិសុខនិងភាពអនាធិបតេយ្យ តាមដង ផ្លូវសាធារណៈ តាមរយៈការ បាញ់ បោះ ដោយសេរី ត្រូវបានកម្លាំងអាវុធហត្ថខណ្ឌទួលគោក ដេញបង្ក្រាប និងចាប់បាននៅចំណុចស្ពាន អាកាស៧ មករា សង្កាត់ទឹកល្អក់ទី១ ខណ្ឌ ទួលគោក កាលពីវេលា ម៉ោង១និង២៥នាទី យប់ថ្ងៃទី០១ ខែមករា ឆ្នាំ២០១៥ ។

មន្ដ្រីអាវុធហត្ថខណ្ឌទួលគោក បានបញ្ជាក់ ថា តាមការសួរនាំមុនពេលកើតហេតុគេបាន ឮសំឡេង ផ្ទុះអាវុធ នៅតាម បណ្ដោយ ផ្លូវម៉ៅ សេទុង សង្កាត់ផ្សារដើមគ ខណ្ឌទួលគោក ដែលបង្កឡើងដោយ អ្នកបើករថយន្ដស៊េរី ទំនើប និងបក្ខពួក ពីរបីរថយន្ដទៀត ប៉ុន្ដែមិន ដឹងថា ពួកគេបាញ់ តាមដងផ្លូវ សាធារណៈផ្ដើមចេញពីរឿងអ្វីនោះឡើយ ។

តាមការបញ្ជាក់ពីមន្ដ្រីអាវុធហត្ថដដែល ក្រោយពីទទួលបាន ព័ត៌មាននៃការផ្ទុះអាវុធ តាមដងផ្លូវ ម៉ៅសេទុង រួចមក កម្លាំងបាន ដេញតាម រហូត ដល់ចំណុចស្ពានអាកាស៧ មករា ដោយឃាត់ បានជនសង្ស័យពីរនាក់ ដកហូត កាំភ្លើងខ្លីមួយដើម និងរថយន្ដមួយ គ្រឿង ម៉ាកលុច្សស៊ីស Rx330 ពណ៌ស ពាក់ ស្លាកលេខ ភ្នំពេញ 2Z-9045 ទូរស័ព្ទដៃពីរ គ្រឿង និងលុយមួយចំនួនផងដែរ ។

ក្រោយការឃាត់ខ្លួនជនសង្ស័យទាំងពីរ នាក់ ត្រូវបានបញ្ជូនទៅសួរនាំភ្លាមៗនៅទី បញ្ជាការអាវុធហត្ថ ខណ្ឌទួលគោក ដើម្បី ចាត់ការតាម នីតិវិធី ។

មន្ដ្រីអាវុធហត្ថបានបញ្ជាក់ថា ជនសង្ស័យ ទី១ ឈ្មោះលី ម៉េងហុក អាយុ២១ឆ្នាំ មុខ របរលក់ឥដ្ឋ ស្នាក់នៅ ផ្ទះលេខ ១៣៣៩ ផ្លូវ ជាតិលេខ២ សង្កាត់ចាក់អង្រែលើ ខណ្ឌមាន ជ័យ ជាម្ចាស់កាំភ្លើង និងជាម្ចាស់ រថយន្ដ ទី២ ឈ្មោះឡូយ ឈាងលី អាយុ២១ឆ្នាំ មុខ របរនិស្សិត នៅសាកលវិទ្យាល័យ ពុទ្ធសាស្ដ្រ ស្នាក់នៅផ្ទះលេខ៨៦បេ ផ្លូវលំ ភូមិចំរើន ផល សង្កាត់បឹងទំពុន ខណ្ឌមានជ័យ ។

នៅចំពោះមុខមន្ដ្រីអាវុធហត្ថ ជនសង្ស័យ ទាំងពីរនាក់ បានបដិសេធថា ពួកគេមិនបាន បាញ់នោះឡើយ ពោលកាំភ្លើង ដែលមាននេះ គឺបានទិញពីអ្នកដែលធ្វើដំណើរចេញចូល ប្រទេសថៃ ក្នុងគោល បំណងការពារខ្លួនតែ ម្ដង ។

យ៉ាងណាក៏ដោយការប្រើប្រាស់អាវុធ របស់ពួកគេ ពុំមានលិខិតស្នាមត្រឹមត្រូវនោះ ឡើយ ហើយក្រោយ បញ្ចប់ ការសួរនាំអាវុធ ហត្ថខណ្ឌទួលគោក បានបញ្ជូនខ្លួនទៅកាន់ ទីបញ្ជាការអាវុធហត្ថរាជធានីភ្នំពេញ ដើម្បី មានវិធាន ការតាមផ្លូវច្បាប់ ៕

ផ្តល់សិទ្ធដោយ ដើមអម្ពិល