អ៊ីតាលី៖ កប៉ាល់ដ៏ធំ របស់ប្រទេសអ៊ីតាលី មួយគ្រឿង ដែលបានផ្ទុករថយន្ត និងមនុស្ស ជាច្រើននៅលើនោះ ត្រូវបានភ្លើងឆេះ នៅកណ្តាលសមុទ្រ និងបានបង្ក ឲ្យមានការភ្ញាក់ផ្អើល យ៉ាងខ្លាំងមួយ ព្រមទាំងធ្វើឲ្យ មនុស្សជាច្រើន ត្រូវបានជាប់គាំង នៅលើកប៉ាល់នោះ។

យោងតាមប្រភព ព័ត៌មានបាន ឲ្យដឹងថា កប៉ាល់មួយគ្រឿង ដែលមានដោត ទង់ជាតិរបស់ ប្រទេសអ៊ីតាលី ឈ្មោះថា Norman Atlantic មានផ្ទុកមនុស្ស នៅលើនោះសរុប ៤៧៨នាក់ និងរថយន្តជាង ២០០គ្រឿងទៀត ត្រូវបានភ្លើងឆេះ បន្ទាប់ពីវា ធ្វើដំណើរចាកចេញ ពីតំបន់ Patros ប្រទេសក្រិច។

យ៉ាងណាមិញ បន្ទាប់ពីមាន ហេតុការណ៍នេះ កើតឡើង ក្រុមសង្រ្គោះក៏បាន ចេញប្រតិបត្តិការ ភ្លាមៗផងដែរ ដោយបានប្រើប្រាស់ កប៉ាល់សង្រ្គោះ និងឧទ្ធម្ភាគចក្រ ដើម្បីជួយ និងជន្លៀស អ្នកដំណើរ ចេញពីកប៉ាល់ ដែលកំពុងតែឆេះនេះ។ ផ្អែកលើរបាយការណ៍ ចុងក្រោយបញ្ជាក់ថា មនុស្សចំនួន ២៦៥នាក់ ទើបតែត្រូវ បានជម្លៀសចេញ។ រីឯជាង២០០នាក់ ទៀតកំពុង ជាប់គាំងនៅ លើនោះ ខណៈប្រតិបត្តិការ ជួយសង្រ្គោះកំពុង នៅតែបន្ត។ បន្ថែមពីនេះទៀត ក្រុមអាជ្ញាធរ បានអះអាងថា មានបុរសម្នាក់ បានស្លាប់ និងមនុស្ស ៤នាក់ផ្សេងទៀត កំពុងរងរបួស ធ្ងន់ធ្ងរនៅ ក្នុងហេតុការណ៍ ដ៏អាក្រក់មួយនេះ ផងដែរ។

គូសបញ្ជាក់ផងដែរថា នេះគឺជារឿង ដ៏កម្រមួយ ដែលកប៉ាល់ដ៏ធំ ត្រូវបានភ្លើង ឆាបឆេះទាំង កណ្តាលសមុទ្រ បែបនេះ ហើយចំពោះមូលហេតុ ដែលធ្វើឲ្យមាន ភ្លើងឆេះកប៉ាល់ បែបនេះក៏មិន ទាន់ត្រូវបាន បញ្ជាក់ឲ្យដឹង នៅឡើយទេ៕

តើប្រិយមិត្តយល់ យ៉ាងណាដែរ?

ទិដ្ឋភាព នៃកប៉ាល់ដែល កំពុងឆេះ និងប្រតិបត្តិការ របស់ក្រុមជួយសង្រ្គោះ៖

ប្រភព៖ បរទេស

ដោយ៖ សុជាតិ

ខ្មែរឡូត