ព្រះសីហនុ ៖ ក្លឹបកំសាន្ត រ៉ក់ ស៊ី (ROXY) ដែលមានអាសយដ្ឋាន នៅម្តុំឆ្នេរអូរឈើទាល ស្ថិតក្នុងក្រុម ទី១៧ ភូមិ៤ សង្កាត់លេខ៤ ក្រុងខេត្តព្រះសីហនុ បានរងការរិះគន់ពីប្រជាពលរដ្ឋ និងម្ចាស់ សណ្ឋាគារ ផ្ទះសំណាក់នៅក្បែរនោះថា បានបង្កសំឡេងរំខាន ស្ទើររាល់ថ្ងៃ ហើយថែមទាំងមាន ការឈ្លោះប្រកែកគ្នា ដេញវាយកាប់ចាក់ស្ទើររាល់យប់ បែរជា អាជ្ញាធរគ្មានវិធានការ ចំពោះទីតាំងមួយនេះ បណ្តោយ ឲ្យមានភាពអនាធិបតេយ្យស្រេចតែចិត្ត ។

ជុំវិញបញ្ហានេះ ប្រជាពលរដ្ឋបានរាយការណ៍មកថា ជាក់ស្តែងកាលពីយប់ វេលាម៉ោងជាង ២អធ្រាត្រ ឈានចូលថ្ងៃ ទី២៨ ខែធ្នូ ឆ្នាំ២០១៤ មានករណីភ្ញៀវ២ក្រុម ដែលបានចូលកំសាន្ត ក្នុងក្លឹបខាងលើ បានឈ្លោះប្រកែកគ្នា ហើយក៏ដេញកាប់ ចាក់គ្នាយ៉ាងសាហាវ ដូចក្នុងរឿង ហុងកុង ហើយបានរត់ចេញ មកក្រៅ ដួលសន្លប់ ក្បែរសណ្ឋាគារនៅក្បែរៗ នោះ ធ្វើឲ្យភ្ញៀវទេសចរបរទេស និងប្រជាពលរដ្ឋ មានការ ភិតភ័យយ៉ាងខ្លាំង ។

ប្រជាពលរដ្ឋបានប្រាប់បន្ថែមទៀតថា កត្តាដែលម្ចាស់ទីតាំងខាងលើនេះ មិនខ្លាចអាជ្ញាធរ ក៏ព្រោះតែអាង អំណាច ឪពុកដែលជា យោធា ឋានៈ ផ្កាយ៣ កង ទ័ពជើងគោក ទើបបានជាសមត្ថកិច្ច មិនហ៊ានក្អក ជាមួយម្ចាស់ទីតាំងខាងលើ នេះ ។ ព្រោះនៅពេលកើតហេតុម្តងៗ គេតែងឮម្ចាស់ទីតាំង ខាងលើនេះ យកឈ្មោះឪពុករបស់ខ្លួនមកគំរាមគេជានិច្ច ។ ប្រជាពលរដ្ឋ សុំស្នើដល់អាជ្ញាធរ មេត្តាចុះត្រួតពិនិត្យ ទីតាំងមួយនេះផង ហើយបើសិនជាអាច មិនគួរណាអនុញ្ញាត ឲ្យក្លឹបមួយនេះ បើកអាជីវកម្មនៅក្បែរ ប្រជាពលរដ្ឋ ក៏ដូចជាសណ្ឋាគារ ផ្ទះសំណាក់នោះឡើយ ព្រោះតំបន់នេះ ជាតំបន់សម្រាប់ តែសណ្ឋាគារ និងផ្ទះសំណាក់ដែលទុកសម្រាប់ឲ្យភ្ញៀវគេង សម្រាកកាយដោយ សុខស្រួល មិនគួរណា មានសំឡេង រំខានដូច្នេះទេ ៕

ផ្តល់សិទ្ធដោយ ដើមអម្ពិល