ភ្នំពេញ ៖ យុវជនម្នាក់ ត្រូវបានស្លាប់ភ្លាមៗ នៅនឹងកន្លែងកើតហេតុ ដោយសារតែ រថយន្តមួយ គ្រឿង បើកបុករថយន្ត ផ្សេងទៀត ក៏ជ្រុលមកបុកម៉ូតូយ៉ាងពេញទំហឹង ចូលក្រោម រថយន្តគាប ជាប់ ។ អ្នកបើកបររថយន្ត ព្យាយាមរត់គេច ខ្លួនបាត់ ។ ហេតុការណ៍នេះ កើតឡើង កាលពីវេលាម៉ោង ប្រហែលជា ៨ ជាងយប់ ថ្ងៃទី២៨ ខែធ្នូ ឆ្នាំ២០១៤ ស្ថិត នៅតាមបណ្តោយ ផ្លូវជាតិលេខ៣ ភូមិព្រៃកី សង្កាត់ភ្លើង ឆេះរទេះ ខណ្ឌពោធិ៍សែនជ័យ ។

បើតាមអត្តសញ្ញាណប័ណ្ណមួយសន្លឹក ជាប់នឹងខ្លួនជនរងគ្រោះឈ្មោះ ស៊ុន សំណាង ភេទប្រុស អាយុ ៣៣ឆ្នាំ រស់នៅ ភូមិពោធិ៍ដុះ ឃុំបាគូ ស្រុកកណ្តាលស្ទឹង ខេត្តកណ្តាល មានស្រុក កំណើត នៅសង្កាត់រកាកណ្តាល ក្រុងក្រចេះ ខេត្ត ក្រចេះ ជិះម៉ូតូមួយ គ្រឿងម៉ាកសេ ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាក លេខភ្នំពេញ CF-0454 ចំណែកឯ រថយន្តបង្កម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ដ០១៩៩ ភព៣ អ្នកបើកបរ ពុំត្រូវបាន គេស្គាល់ឈ្មោះនោះ ទេ ។

អ្នកឃើញហេតុការណ៍បាននិយាយថា មុនពេលកើតហេតុ គេឃើញរថយន្តបើកបរ ក្នុងទិស ដៅពីត្បូង ទៅជើង លុះ ដល់ចំណុចកើតហេតុ បានប្រជែងរថយន្តមួយគ្រឿងទៀត នៅពីមុខ របស់គេ រួចក៏បានជ្រុកចង្កូត ទៅបុកម៉ូតូជនរង គ្រោះបើកបញ្រ្ចាស ទិសគ្នា អូសជាង ១០ម៉ែត្រ បណ្តាលឲ្យ ម៉ូតូចូលក្រោម រថយន្តគាបជាប់ ចំណែកឯ ជនរងគ្រោះ បានធ្លាយពោះវៀន ចេញមកក្រៅ ស្លាប់ភ្លាមៗ ។ ចំណែកអ្នក បើកបររថយន្ត បន្ទាប់ពីកើតហេតុ បានចុះ ចេញពីរថយន្ត រួចរត់គេច ខ្លួនបាត់ ។ ភ្លាមៗនោះដែរ នគរបាល មូលដ្ឋាន បានចុះទៅដល់ រួចបាន ប្រគល់សព ទៅឲ្យក្រុមគ្រួសារ យក ទៅធ្វើបុណ្យ តាមប្រពៃណី ចំណែកឯវត្ថុតាង ត្រូវយក ទៅរក្សាទុក នៅការិយាល័យ នគរបាលជើងគោក នៃស្នងការ ដ្ឋាន ដើម្បីរង់ចាំដោះ ស្រាយគ្នាទៅតាម ផ្លូវច្បាប់ ៕

ផ្តល់សិទ្ធដោយ ដើមអម្ពិល