រាជធានីភ្នំពេញ៖ បុគ្គលិកខារ៉ាអូខេ «ស្រីឡែន» ចំនួន៤នាក់ បានរត់ទៅធ្វើការ នៅហាងខារ៉ាអូខេ មួយទៀតដែល ទើបនឹងបើកថ្មី ស្ថិតនៅ ជាប់គ្នា ធ្វើឱ្យថៅកែហាងចូល ទៅតាមយកបុគ្គលិកមកវិញ បង្កឱ្យមានការ ឈ្លោះប្រកែកគ្នា កាលពីវេលា ម៉ោង១២ និង៣០នាទីរំលង អធ្រាត្រ ឈានចូលថ្ងៃទី១៦ ធ្នូ ២០១៤ ស្ថិតនៅ តាមផ្លូវលេខ៥កា ក្រុម៩ ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ ។

ប្រភពបានឱ្យដឹងថា ខារ៉ាអូខេដែល អត់មានយីហោ នៅផ្ទះលេខ៦៣៣ មានលក់ចាប់ហួយ ពីខាងមុខ ខាងក្នុងបើកខារ៉ាអូខេ ទើបបើកជិត ២ខែនៅ ជាប់គ្នា ជាមួយខារ៉ាអូខេ «ស្រីឡែន» ដែលមានថៅកែ ស្រីឈ្មោះស្រី ឡែន ដោយចាប់តាំងពី ខារ៉ាអូខេថ្មីនេះបើកមក នារី៤នាក់ ដែល ជាបុគ្គលិករបស់ស្រីឡែន រត់ទៅធ្វើការនៅ ហាងខារ៉ាអូខេថ្មីនោះ ហើយនៅយប់កើតហេតុ ស្រាប់តែថៅកែ ស្រីឡែនបានចូល ទៅក្នុង ហាងខារ៉ាអូខេថ្មី ទាមទារយកបុគ្គលិក របស់ខ្លួនទាំង៤នាក់នោះវិញ តែពួកនាង មិនបានចេញ មកទេ ធ្វើឲ្យថៅកែស្រី ខឹងយកទូរស័ព្ទ ណូគា ចុចពិល មួយគ្រឿង គប់ចូលទៅក្នុងហាងនោះ ហើយនៅតែមិន មានអ្នកចេញមកទៀត ។

បន្ទាប់មកស្រាប់តែ មានបុរស២នាក់ បានយកដបស្រា២ដប គប់ចូលទៅក្នុងហាង ធ្វើឱ្យបែកខ្ចាយ ពេញហាង បង្កឱ្យមានការឈ្លោះ ប្រកែក គ្នាក៏បានទូរស័ព្ទហៅ សមត្ថកិច្ចមកជួយ អន្តរាគមន៍ ហើយនៅតែនិយាយ ស្តាប់គ្នាមិនបានទៀត ទើបសមត្ថកិច្ចនាំ ភាគីទាំងសងខាង យកទៅ ដោះស្រាយនៅ ប៉ុស្តិ៍ទួលសង្កែ តែម្តង ៕

ហាងខារ៉ាអូខេ២កន្លែងផ្ទុះជម្លោះបែកផ្សែង ខណៈដណ្តើមបុគ្គលិកគ្នា

ផ្តល់សិទ្ធដោយ កោះសន្តិភាព