កំពង់ស្ពឺ ៖ ស្រ្តីម្នាក់ដែលជិះម៉ូតូ ដឹកចៅស្រី-ប្រុស ចំនួន២នាក់ ធ្វើដំណើរតាម ផ្លូវជាតិលេខ ៤ ត្រូវបានរថយន្ត កាមរីបាឡែន ១គ្រឿង បុកប៉ាំងធ្លាក់ ស្នាមភ្លោះ ទាំងរថយន្ត ទាំងម៉ូតូ បណ្តាលឲ្យ ស្រ្តីជាអ្នកឌុប និងចៅប្រុសម្នាក់ ដែល ជិះពីក្រោយស្លាប់ ភ្លាមៗនៅនឹង កន្លែងកើតហេតុ រីឯចៅស្រីម្នាក់ទៀត រងរបួសជាទម្ងន់ ។

ហេតុការណ៍ គ្រោះថ្នាក់ចរាចរណ៍ ខាងលើនេះ បានកើតឡើងកាល ពីវេលាម៉ោងជាង ៨ព្រឹក ថ្ងៃទី១៥ ខែធ្នូ ឆ្នាំ២០១៤ នៅតាមបណ្តោយ ផ្លូវជាតិលេខ ៤ ចន្លោះគីឡូម៉ែត្រលេខ ៨៩-៩០ ខាងកើត ស្ពានអូរចម្លង ស្ថិតក្នុងភូមិទី៦ ឃុំត្រែង ត្រយឹង ស្រុកភ្នំស្រួច ខេត្តកំពង់ស្ពឺ ។ ជនរងគ្រោះនៅ ក្នុងហេតុការណ៍ ខាងលើនេះ ត្រូវបានគេស្គាល់ឈ្មោះ គង អូន ភេទស្រី អាយុ ៤៣ឆ្នាំ រស់នៅក្នុងស្រុក ភូមិកើតហេតុ ខាងលើ និងចៅប្រុសម្នាក់ទៀត ឈ្មោះ វ៉ាន់ លីហួរ អាយុ ១០ឆ្នាំ ស្លាប់នៅនឹង កន្លែងកើតហេតុ ។ រីឯចៅស្រី ម្នាក់ឈ្មោះ វ៉ាន់ អឺ អាយុ ៣ឆ្នាំ រងរបួសធ្ងន់ ។ ដោយឡែកភាគី រថយន្តបង្ក ត្រូវបានគេស្គាល់ម៉ាក កាមរីបាឡែន ពណ៌ទឹកប្រាក់ ពាក់ស្លាកលេខ ខេមរភូមិន្ទ ០២-៩៩៧៩ បើកបរដោយ បុរសម្នាក់ ឈ្មោះ ចាន់ វិចិត្រ អាយុ ២៤ឆ្នាំ មានទីលំនៅ នៅខណ្ឌទួលគោក រាជធានីភ្នំពេញ ។

សេចក្តីរាយការណ៍ ពីកន្លែងកើតហេតុ បានឲ្យដឹងថា នៅមុនពេលកើតហេតុ ភាគីស្រ្តីរងគ្រោះ ដែលជិះម៉ូតូ បានជិះម៉ូតូ មួយគ្រឿង ម៉ាកវ៉េវ ពណ៌ខ្មៅ អត់ស្លាកលេខ ឌុបចៅប្រុស ស្រីចំនួន ២នាក់ ចេញពីផ្សារពេជ្រនិល ធ្វើដំណើរតាមផ្លូវ ជាតិលេខ ៤ ក្នុងទិសដៅពី លិចឆ្ពោះមកកើត ។ លុះដល់ពេលធ្វើ ដំណើរហួសស្ពាន អូរចម្លងបន្តិច ស្រាប់តែមាន រថយន្តម៉ាក កាមរីបាឡែន មួយគ្រឿង បើកក្នុងទិសដៅ ពីកើតទៅលិច បុកម៉ូតូជនរងគ្រោះ ពេញមួយទំហឹងតែម្តង បណ្តាលឲ្យទាំងរថយន្ត និងម៉ូតូ ធ្លាក់ចូលទៅស្នាមភ្លោះ ក្បែរចិញ្ចើមផ្លូវ រងនូវការខូចខាត យ៉ាងដំណំ ។ ចំណែកអ្នកជិះ ម៉ូតូទាំង ៣នាក់ បានប៉ើងខ្ទាត ទៅចិញ្ចើមផ្លូវ ហើយគេពិនិត្យ ឃើញថា ២នាក់ស្លាប់ នៅនឹងកន្លែង កើតហេតុ រីឯម្នាក់ ទៀត ដែលជាក្មេងស្រីតូច រងរបួសធ្ងន់ធ្ងរ ត្រូវបានរថយន្ត របស់អង្គភាព កងពលតូច លេខ ៣១ ដឹកយកទៅសង្រ្គោះ នៅមន្ទីរពេទ្យ ក្នុងទីរួមខេត្ត កំពង់ស្ពឺ ។ ចំណែកភាគីអ្នក បើករថយន្ត បានរងរបួសស្រាល ។

ប្រភពពីកន្លែង កើតហេតុខ្លះទៀត បានឲ្យដឹងថា ករណីខាងលើនេះ គឺកើតឡើងដោយសារ តែស្រ្តីជិះម៉ូតូ ពេលមកដល់ ចំណុចកើតហេតុ បានបត់ឆ្វេងដៃ ស្របពេលរថយន្ត មកដល់ ក៏បុកពេញមួយ ទំហឹងតែម្តងទៅ ៕

ផ្តល់សិទ្ធដោយ ដើមអម្ពិល