រាជធានីភ្នំពេញ ៖ រថយន្តទំនើបម៉ាកឡិចស៊ីស GS 300 ពណ៌ខ្មៅ ពាក់ស្លាកលេខភ្នំពេញ ២G-៣៩៩៩មួយគ្រឿង បើកបរដោយយុវជនស្ទាវមួយក្រុមបានបើកយ៉ាងលឿនជ្រែពេញផ្លូវ ក៏ជ្រុលទៅបុកម៉ូតូមួយគ្រឿងម៉ាកសេ១២៥ ពណ៌ខ្មៅ ពាក់ស្លាកលេខភ្នំពេញ 2CA-៧៤០៣ បណ្តាលឱ្យមនុស្ស២នាក់រងរបួស កាលពីវេលាម៉ោង០១ និង១៥នាទីថ្ងៃទី១០ ធ្នូ ២០១៤ ស្ថិតនៅលើផ្លូវព្រះនរោត្តម ខាងមុខព្រឹទ្ធសភា ក្នុងសង្កាត់ទន្លេបាសាក់ ខណ្ឌចំការមន ។

ប្រភពពីកន្លែង កើតហេតុ បានឱ្យដឹងថា គេឃើញ រថយន្តបង្ក ធ្វើដំណើរក្នុងទិសដៅ ពីត្បូងទៅជើង យ៉ាងលឿន ជ្រែពេញផ្លូវ លុះដល់ចំណុចកើតហេតុ ក៏បានវាក់ជាមួយ នឹងម៉ូតូមួយគ្រឿង ជិះគ្នា២នាក់ ដែលកំពុងតែ ព្យាយាមបើកឆ្លងផ្លូវ រេឆ្វេងស្តាំ ក៏បានកៀរផ្នែកខាងក្រោយដួលតែម្តង ។

ក្រោយពីរថយន្តកៀរម៉ូតូដួលរួចហើយ បុរសទាំង២នាក់ដែលជិះលើម៉ូតូបានខ្ទាតចេញឆ្ងាយ បណ្តាលឱ្យរងរបួសស្រាលរលាត់ដៃជើងប៉ុណ្ណោះ និងម៉ូតូត្រូវបានរថយន្តកិនខ្ទេចកង់ខាងមុខ ហើយរថយន្តក៏រងការខូចខាតដោយដាច់កាងខាងក្រោយផងដែរ ។

ផ្តល់សិទ្ធដោយ កោះសន្តិភាព