រាជធានីភ្នំពេញ ៖ តាមរយៈគេហទំព័រ Cambodia Real News ដែលទំនងទើបតែ ត្រូវបានបង្កើតឡើង និងផ្តោតទៅលើ ការជំទាស់ដល់ការ ចោទប្រកាន់នានា របស់សមត្ថកិច្ច ជុំវិញឃាតកម្ម បាញ់សម្លាប់ លោកឧកញ៉ា អុឹង ម៉េងជឺ ដែលមេខ្លោង នៃឃាតកម្មនេះ គឺឧកញ៉ា ថោង សារ៉ាត់ អគ្គនាយកក្រុមហ៊ុន សាច់ប៉ាតេមានជ័យ និងបុរី៩៩៩ ដែលជាក្រុមហ៊ុន សំណង់ធំៗ ជាច្រើនកន្លែង។ នៅថ្ងៃទី៨ ធ្នូ ខ្សែអាត់សំឡេង របស់លោក ថោង សារ៉ាត់ ត្រូវបានបង្ហោះ ក្នុងគេហទំព័រនេះ ដែលមានរយៈពេល ៦នាទី និង៥៧វិនាទី ។

តាមរយៈសំឡេង ដែលបាននិយាយចេញពី កន្លែងលាក់ខ្លួនមួយ ក៏មានការយំយែក និងអំពាវនាវ រកសម្តេចតេជោ នាយករដ្ឋមន្ត្រី ឱ្យជួយរកយុត្តិធម៌ ដល់គ្រួសាររបស់លោក និងបានបដិសេធ រាល់ការចោទប្រកាន់ របស់សមត្ថកិច្ច។ ខ្សែអាត់សំឡេង បានទទូចដល់ សម្តេចតេជោ នាយករដ្ឋមន្ត្រី និងចាត់ទុក ជាមនុស្សយុត្តិធម៌ ដែលជួយរកយុត្តិធម៌ ឱ្យប្រជាជន ហើយសម្តេចជាអ្នក ដែលជួយមនុស្សក្រីក្រ ។ ទាក់ទងដល់ រឿងរ៉ាវរបស់ខ្លួន ឧកញ៉ាដែលជាប់ចោទ ជាមេខ្លោងឃាតករ បានហៅការចោទប្រកាន់ មកលើខ្លួនថា ជារឿងស្វាស៊ីបាយ លាបមាត់ពពែ ។ ផ្ទុយពីការចោទប្រកាន់ របស់សមត្ថកិច្ច គេហទំព័រនេះ បានចោទថា មនុស្សដែលបាន ទៅឈរមើលសព លោកឧកញ៉ា អឹុង ម៉េងជឺ ដែលស្លាប់ ក្នុងថ្លុកឈាមថា ជាឃាតករ៩៩% ។

ឧកញ៉ា ថោង សារ៉ាត់ បាននិយាយថា ការធ្វើនេះ កំពុងធ្វើឱ្យសេដ្ឋកិច្ច ស្រុកខ្មែរធ្លាក់ចុះ ហើយបានចោទ ជាសំណួរថា តើមានដឹងថា បុរី៩៩៩ មានអតិថិជន ប៉ុន្មាននាក់ទេ ដែលត្រូវក្ស័យធន ដោយសាររឿង អយុត្តិធម៌នេះ។ ចំណុចសំខាន់ គឺបុរីមានអតិថិជន ដល់ទៅជាង១ម៉ឺននាក់ ហើយរាជរដ្ឋាភិបាល ក៏មិនដែលបិទសេដ្ឋកិច្ច ប្រទេសខ្លួនឯងទេ គឺមានតែជួយជ្រោមជ្រែង មិនឱ្យកម្មករ ដាច់ការងារ និងអ្នកវិនិយោគ លំបាកទេ ។ ជាមួយនឹងការរៀបរាប់ ដ៏កម្សត់ឧកញ៉ា ថោង សារ៉ាត់ បានប្រកាសថា គាត់មិនចង់រស់ ជាមនុស្សនិរទេសទេ ឪពុកម្តាយរបស់លោក ក៏គ្មានកំហុសដែរ រួមជាមួយ អង្គរក្សទាំងអស់ ។ ក្រុមអ្នកតាមដាន បានចាប់អារម្មណ៍ថា រឿងក្តីដ៏ធំ ចុងឆ្នាំ២០១៤នេះ ពិតជាមិនទាន់បញ្ចប់ បញ្ហានោះទេ ល្គឹកណាឧកញ៉ា ថោង សារ៉ាត់ មិនទាន់ត្រូវបានចាប់ខ្លួន នៅឡើយនោះ ៕

បញ្ជូនជនបាញ់សម្លាប់ឧកញ៉ា អឹុង ម៉េងជឺ

រាជធានីភ្នំពេញ ៖ ជនដៃដល់បាញ់សម្លាប់ លោកឧកញ៉ា អឹុង ម៉េងជឺ ឈ្មោះ សៀង វាសនា ហៅ ស្នា កាលពីព្រឹកថ្ងៃទី៨ ធ្នូ ចៅក្រមស៊ើបអង្កេត សាលាដំបូង រាជធានីភ្នំពេញ បានអនុញ្ញាតឱ្យអនុរក្ស ពន្ធនាគារព្រៃស នាំមកសួរចម្លើយ បន្ថែមទៀត បន្ទាប់ពីឃុំខ្លួន បាន២ថ្ងៃកន្លងមក ។ ប្រភពព័ត៌មានបន្តថា បានជាចៅក្រម ឱ្យអនុរក្ស ពន្ធនាគារនាំឈ្មោះ សៀង វាសនា មកសាកសួរបន្ថែមនេះ ព្រោះចម្លើយលើកមុន នៅមានការខ្វះចន្លោះខ្លះ ។ ម្យ៉ាងទៀត ជនសង្ស័យបានស្នើសុំ ផ្លាស់ប្តូរមេធាវីផងដែរ ដូច្នេះហើយមេធាវី ការពារដោយ អាណត្តិក្រោយនេះ ចង់ស្តាប់ចម្លើយ ពិតប្រាកដរបស់កូនក្តី ដើម្បីយកទៅពិនិត្យ លើអង្គហេតុ និងអង្គច្បាប់ នៅពេលបើកសវនាការ ដើម្បីផ្តល់ភាពយុត្តិធម៌ ដល់ជនត្រូវចោទ ។ ក្រោយពីសាកសួរហើយ ចៅក្រមបានឱ្ យអនុរក្សពន្ធនាគារ នាំទៅឃុំខ្លួននៅ ពន្ធនាគារព្រៃសវិញ ។

គួរបញ្ជាក់ថា ក្រុមជនសង្ស័យពាក់ព័ន្ធ ជាឃាតករបាញ់ សម្លាប់លោកឧកញ៉ា អឹុង ម៉េងជឺ កាលពីថ្ងៃទី២២ វិច្ឆិកា មានគ្នា៤នាក់ សុទ្ធសឹងជាអង្គរក្ស ឧកញ៉ា ថោង សារ៉ាត់ ដែលពេលនេះ កំពុងគេចខ្លួន ។ ពួកគេត្រូវបានចាប់ខ្លួន កាលពីថ្ងៃទី២ ធ្នូ និងបាននាំទៅឃុំខ្លួន នៅពន្ធនាគារព្រៃស នៅថ្ងៃទី៦ ធ្នូ ក្រោមបទចោទប្រកាន់ ពីបទឃាតកម្ម គិតទុកជាមុន ។ ជនសង្ស័យមាន ១-ឈ្មោះ សៀង វាសនា ហៅ ស្នា ជាជនដៃដល់ ២-ឈ្មោះ លី សៅ ហៅ វី ជាអ្នកឌុបជនដៃដល់ ៣-ឈ្មោះ មាស សម្បត្តិ និង៤-ឈ្មោះ កូយ ច័ន្ទថុល ជាអ្នកជិះម៉ូតូ តាមបិទគូទ ។ ក្រុមជនសង្ស័យ ជាឃាតករបាញ់សម្លាប់ លោកឧកញ៉ា អឹុង ម៉េងជឺ បានសារភាពថា គេធ្វើតាមបញ្ជា ព្រោះមេបានសន្យា ឱ្យផ្ទះម្នាក់១ល្វែង នៅពេលការងារ ទទួលបានជោគជ័យ និងបានបដិសេធថា ពួកខ្លួនមិនមែន ជាឃាតករ ស៊ីឈ្នួលនោះទេ ។

ទីបំផុតរឿងរ៉ាវ ត្រូវបែកធ្លាយដោយសារ កាមេរ៉ាសុវត្ថិភាព នៅកន្លែងកើតហេតុ និងកាមេរ៉ារថយន្តទំនើប របស់ជនរងគ្រោះ ចាប់បានរូបភាព និងសកម្មភាព ដែលធ្វើឱ្យការស៊ើបអង្កេត របស់សមត្ថកិច្ច តែក្នុងរយៈពេល១១ថ្ងៃ សំណុំរឿងនោះ ត្រូវបានបើក វាំងននខ្មៅ ។ សរុបមកវិញ នៅសល់តែអ្នក នៅពីក្រោយខ្នង ក្រុមឃាតករប៉ុណ្ណោះ ដែលសមត្ថកិច្ច បានអះអាងថា គឺឧកញ៉ា ថោង សារ៉ាត់ ដែលកំពុងគេចខ្លួន ។ រហូតមកដល់ពេលនេះ ពាក្យចចាមអារ៉ាម ពីការចាប់ខ្លួន ឧកញ៉ា ថោង សារ៉ាត់ នៅវៀតណាម ត្រូវបានផ្សព្វផ្សាយ ដោយបណ្តាញ សង្គមហ្វេសប៊ុក ប៉ុន្តែភ្លាមៗត្រូវបាន សមត្ថកិច្ចកម្ពុជា ធ្វើការបដិសេធថា មិនទាន់ចាប់ខ្លួន បាននៅទ្បើយទេ ដែលបញ្ហានេះ តុលាការបានចេញដីកា ចាប់ខ្លួនរួចហើយ និងបានទាក់ទង តាមបណ្តាញប៉ូលិស អាំងទែរប៉ូល រួចហើយដែរ ។ ក្នុងការតាមចាប់ខ្លួននេះ ត្រូវបានគេដឹងជាទូទៅថា គោលដៅកំពុងសម្លឹង ទៅរកប្រទេសវៀតណាម អាចថាជាគោលដៅ របស់ពិរុទ្ធជន ថោង សារ៉ាត់ ។

ប៉ុន្តែមានប្រភពខ្លះ សង្ស័យថា ឧកញ៉ា ថោង សារ៉ាត់ ទំនងប្រហែលកំពុង សម្ងំលាក់ខ្លួននៅក្នុង រាជធានីភ្នំពេញ នៅទ្បើយ ព្រោះផ្ទះ និងបុរីរបស់គាត់ មានច្រើនកន្លែង ។ គេសង្ស័យថា ប្រហែលមិនទៅដល់ «ជើងមេឃ» ទេ ទំនងនៅ «ជើងមុង» នេះតែម្តង ៕

ផ្តល់សិទ្ធដោយ កោះសន្តិភាព