កំពង់ចាម ៖ ឃាតកមិនស្គាល់មុខ បានប្រើដំបង វាយស្ត្រីម្នាក់ បណ្តាលឲ្យស្លាប់ ខណៈស្ត្រីរងគ្រោះ ទៅឃ្វាលគោ កាលពីល្ងាច ថ្ងៃទី៤ ខែធ្នូ ឆ្នាំ២០១៤ នៅចំណុច ក្បែរចំការដំឡូងមី ចម្ងាយប្រហែល ៣០០ម៉ែត្រ ពីភូមិតាសែន ឃុំតាប្រុក ស្រុកចំការលើ ខេត្តកំពង់ចាម ។

សម្រាប់ហេតុការណ៍នេះ សមត្ថកិច្ចសង្ស័យថា ស្ត្រីរងគ្រោះ ត្រូវក្រុមឃាតក រំលោភសេពសន្ថវៈ ក្រោយមកវាយឲ្យ ស្លាប់ចោលតែម្តង ។ តាមមន្ត្រីនគរបាល ស្រុកចំការលើ បានឲ្យដឹងថា នៅព្រឹកថ្ងៃទី៥ ខែធ្នូនេះថា ស្ត្រីរងគ្រោះ មានឈ្មោះ យ៉ែន នាង អាយុ៥២ឆ្នាំ មានទីលំនៅ ក្នុងភូមិកើតហេតុ ។

មន្ត្រីនគរបាល បានបន្តថា សពស្រ្តីរងគ្រោះ ត្រូវបានគេប្រទះ ឃើញដេកស្លាប់ នៅក្បែរចំការ ដំឡូងមី ដោយខោរបស់គាត់ ត្រូវគេសម្រាត មកត្រឹមជង្គង់ និងមានទឹក កាមផងដែរ ។

សមត្ថកិច្ចបាន ឲ្យដឹងទៀតថា តាមការពិនិត្យសាកសព ឃើញថា ស្ត្រីរងគ្រោះ ត្រូវជនដៃដល់ យកដំបងឈើ វាយត្រូវចំកញ្ចឹងក បណ្តាលឲ្យបាក់ក ស្លាប់ភ្លាមៗ នៅកន្លែងកើត ហេតុតែម្តង។

មន្ត្រីនគរបាល បានឲ្យដឹងដែរថា មុនកើតហេតុ ស្ត្រីរងគ្រោះ បានយកគោទៅ ឃ្វាលនៅវាលស្រែ មានចម្ងាយពី ភូមិប្រហែល ២០០ម៉ែត្រ លុះនៅវេលាម៉ោង ជិត៦ល្ងាច ទៅហើយ មិនឃើញត្រឡប់ មកផ្ទះវិញ ទើបសាច់ញាតិ ដើររក ស្រាប់តែប្រទះឃើញ សពស្ត្រីរងគ្រោះ ដោយគេសម្រាតខោ មកនៅត្រឹមជង្គង់ ទើបបានរាយការណ៍ មកសមត្ថកិច្ចតែម្តង ។

ក្នុងករណីនេះផងដែរ សមត្ថកិច្ច មានការសង្ស័យថា ជនល្មើសសម្លាប់ ស្រ្តីរងគ្រោះ ក្រោយពេលចាប់រំលោភរួច ។ ប៉ុន្តែយ៉ាងណាក៏ដោយ ករណីឃាតកម្ម ខាងលើ នៅព្រឹកថ្ងៃទី៥ ខែធ្នូ នេះ សមត្ថកិច្ច នគរបាល ស្រុកចំការលើ ក្រោបបទបញ្ជាពី លោកឧត្តម សេនីយ៍ត្រី បែន រ័ត្ន ស្នងការនគរបាល ខេត្តកំពង់ចាម បាននិងកំពុងស្រាវជ្រាវ យ៉ាងក្តៅគគុក ដើម្បីចាប់ខ្លួន ជនល្មើស យកមកផ្តន្ទាទោស ទៅតាមផ្លូវច្បាប់។

មន្រ្តីនគរបាលមួយរូប បានថ្លែងថា សម្រាប់អំពើឃាតកម្ម ដែលកើតឡើង នៅស្រុកចំការលើ កម្លាំងនគរបាលបាន បង្ក្រាប និងចាប់ជនល្មើស បាន ទាំងអស់ ដូច្នេះចំពោះករណី កម្លាំងនគរបាល មានជំនឿថា នឹងចាប់ខ្លួនទាល់តែបាន៕

ផ្តល់សិទ្ធដោយ ដើមអម្ពិល