កណ្ដាល ៖ អំពើហឹង្សា ក្នុងគ្រួសារមួយ បានកើតឡើង បណ្ដាលឲ្យប្ដីប្រពន្ធ ពីរនាក់ស្លាប់ ខណៈដែលមុន ពេលកើតហេតុ បុរសជាប្ដី បានយកកាំបិត កាប់ប្រពន្ធស្លាប់ ក្នុងថ្លុកឈាម រួចបានយក សាំងមកចាក់ ដុតសពប្រពន្ធ ជាក្រោយ ។ បន្ទាប់ពីធ្វើ សកម្មភាពរួច បុរសកំណាចរូបនេះ បានរត់គេចខ្លួន ១យប់ ប៉ុន្តែព្រឹក ថ្ងៃទី៤ ខែធ្នូ នេះ ត្រូវបានអ្នកស្រុក ប្រទះឃើញ ចង-កសម្លាប់ខ្លួន នៅលើដើមអំពិល ទឹកបារាំង ធ្វើអត្តឃាតតាមក្រោយ ដើម្បីគេចពីការ ទទួលខុសត្រូវ។

ហេតុការណ៍ជម្លោះ ក្នុងគ្រួសារ ឈានដល់អំពើឃាតកម្ម យ៉ាងរន្ធត់នេះ បានកើតឡើង កាលពី ថ្ងៃទី០៣ ខែធ្នូ ឆ្នាំ២០១៤ វេលា៧យប់ នៅលើទំនប់ ទទឹងថ្ងៃ ក្នុងភូមិ កប៉ាលគឿង ឃុំសំពៅពូន ស្រុកកោះធំ ខេត្តកណ្តាល។ មន្រ្តីនគរបាល មូលដ្ឋានបាន ឲ្យដឹងថា ជនរងគ្រោះ ជាប្រពន្ធ ឈ្មោះ ពុំ ស្រៀង និងប្ដីជា ឃាតកឈ្មោះ ឈុន ហន ភេទប្រុស អាយុ ៤១ឆ្នាំ ជនជាតិខ្មែរ រស់នៅភូមិ កំពង់ថ្កុល ឃុំសំពៅពូន ស្រុកកោះធំ ខេត្តកណ្តាល មុខរបរ កសិករ ។

បើតាមអ្នកជិតខាង កន្លែងកើតហេតុ បានឲ្យដឹងថា នៅល្ងាចថ្ងៃកើតហេតុ បុរសជាប្ដី បានផ្ទុះជម្លោះ ពាក្យសម្ដី ជាមួយប្រពន្ធ ហើយបានយក កាំបិតកាប់ ប្រហារប្រពន្ធ ខ្លួនឯងស្លាប់ នៅនឹងកន្លែង និងបានយក សាំងចាក់ដុត សពប្រពន្ធ រួចហើយ រូបគេបានរត់គេច ខ្លួនទាំងយប់ ។ លុះមកដល់ ព្រឹកថ្ងៃទី ០៤ ខែធ្នូ ឆ្នាំ២០១៤នេះ មានប្រជាពលរដ្ឋ ទៅច្រូតស្រូវ បានប្រទះឃើញ បុរសជាប្ដី ចង-ក សម្លាប់ខ្លួន នឹងអង្រឹងស្បៃមង នៅលើដើម អំពិលបារាំងស្លាប់។

ក្រោយពីសមត្ថកិច្ច បានពិនិត្យសាកសព រួចរាល់ ឃើញថា ជនរងគ្រោះ ពិតជាចងក ដោយខ្លួនឯង ពិតប្រាកដមែន៕

ផ្តល់សិទ្ធដោយ ដើមអម្ពិល