រាជធានីភ្នំពេញ ៖ យុវជនស្ទាវម្នាក់ រួមជាមួយនារីជាសង្សារ ត្រូវកម្លាំងកងរាជអាវុធហត្ថ ខណ្ឌចំការមន ឃាត់ខ្លួនបាន បន្ទាប់ពីយុវជនរូបនេះ មានទំនាស់គ្នាជាមួយ យុវជនមួយក្រុម ផ្សេងទៀតក្នុងក្លឹបរាំ ហើយចេញមក ខាងក្រៅក្លឹប យកដុំថ្មដេញគប់គ្នា យ៉ាងអាណាធិបតេយ្យតាមផ្លូវ បង្កការភ័យខ្លាច ដល់អ្នកធ្វើដំណើរ ។ ហេតុការណ៍នេះ កើតឡើងកាលពី វេលាម៉ោង៩ និង៤០នាទីយប់ ថ្ងៃទី៣ ធ្នូ ២០១៤នៅចំណុចមុខ ស្ថានីយ៍ប្រេងឥន្ធៈ សូគីមិច តាមបណ្តោយ ផ្លូវលេខ២៧១ ស្ថិតក្នុងសង្កាត់ ផ្សារដើមថ្កូវ ខណ្ឌចំការមន ។

ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ មានយុវជនស្ទាវពីរក្រុម ចូលទៅផឹកស៊ីរាំរែក ក្នុងក្លឹបកម្សាន្ត<< cool >> បន្ទាប់ពីផឹកស៊ីរាំរែក បានមួយសន្ទុះ ស្រាប់តែមានជម្លោះគ្នា នៅពេលនោះ យុវជនស្ទាវទាំងពីរក្រុម ដែលមានគ្នាច្រើននាក់ បានចេញពីក្នុងក្លឹប យកដុំថ្មដេញគប់គ្នា យ៉ាងអាណាធិបតេយ្យ តាមផ្លូវបង្កការភ្ញាក់ផ្អើល និងភ័យខ្លាច ដល់អ្នកធ្វើដំណើរ ។ ភ្លាមៗគេឃើញកម្លាំង កងរាជអាវុធហត្ថ នៅក្បែរនោះបានចេញមក ដេញចាប់យុវជនស្ទាវ ទាំងនោះ តែដេញចាប់បានតែ យុវជនស្ទាវម្នាក់ រួមជាមួយនារីជាសង្សារ ដែលរត់ឡើង ជិះម៉ូតូរបស់ខ្លួន ម៉ាកស៊ុយស៊ូគីឡែត ពណ៌ក្រហម មួយគ្រឿងមិនទាន់ ក្រៅពីនោះរត់គេចខ្លួន បាត់ស្រមោល ។

ក្រោយពេលឃាត់ខ្លួន កម្លាំងកងរាជអាវុធហត្ថ បាននាំយក គូសង្សារវ័យក្មេង មួយគូនេះទៅប្រគល់ ឱ្យសមត្ថកិច្ច នគរបាលរដ្ឋបាល ផ្សារដើមថ្កូវ ដើម្បីធ្វើការអប់រំ ៕

ផ្តល់សិទ្ធដោយ កោះសន្តិភាព