តារា​ចម្រៀង Justin Bieber ត្រូវ​បាន​គេ​ហាម​មិន​ឲ្យ​ចូល​ក្លឹប​ធំ​ៗ​នានា​នៅ​ទីក្រុង Miami រដ្ឋ Florida ដោយ​សារ​រូប​គេ​​ធ្លាប់​មាន​ប្រវត្តិ​អាក្រក់​ៗ​នៅ​ទីក្រុង​មួយ​នេះ​។

ប្រភព​ព័ត៌មាន​ TMZ បាន​ឲ្យ​ដឹង​ថា ពិធី​ជប់លៀង​របស់​តារា​ចម្រៀង​ម្ចាស់​បទ “Baby” និង​បក្សពួក ដែល​ត្រូវ​រៀប​ចំ​ឡើង​កាល​ពី​ចុង​សប្ដាហ៍​មុន បាន​ជួប​ភាព​រអាក់រអួល​ ដោយ​សារ​ពួក​គេ​ត្រូវ​បាន​ហាម​មិន​ឲ្យ​ចូល​ក្លឹប​ធំ​ៗ​ក្នុង​ទី​ក្រុង​នោះ​ដូច​ជា​ក្លឹប LIV, Story និង Adoré ជា​ដើម។

តារា​វ័យ ២០​ឆ្នាំ​រូប​នេះ បាន​ទូរសព្ទ​កក់​កន្លែង​ជាមុន ក៏​ប៉ុន្តែ​ប្រធាន​ក្លឹប​ជា​ច្រើន​បាន​បដិសេធ​មិន​ឲ្យ​ក្រុម​របស់​គេ​មក​ជប់លៀង​នៅ​ក្លឹប​របស់​ពួក​គេ​ឡើយ ដោយ​និយាយ​ថា Justin នៅ​ខ្វះ​មួយ​ឆ្នាំ​ទៀត​ទើប​គ្រប់​អាយុ​ អាច​ចូល​ក្លឹប​បាន។​

ហើយ​​អ្វី​ដែល​សំខាន់​គឺ​ម្ចាស់​ក្លឹប​ទាំង​នោះ​​ព្រួយ​បារម្ភ​​ថា​ តារា​ចម្រៀង​រូប​នេះ នឹង​បង្ក​បញ្ហា​ច្រើន​នៅ​ក្លឹប​របស់​គេ ដោយ​លើក​មុន គេ​បាន​បង្កើត​រូបភាព​អវិជ្ជមាន​ជា​ច្រើន​នៅ​ក្លឹប​ដែល​គេ​​ជប់លៀង​ក្នុង​ថ្ងៃ​ដែល​គេ​​ត្រូវ​បាន​ចាប់​ខ្លួន ដោយ​សារ​បើកបរ​ក្នុង​ស្ថានភាព​ស្រវឹង និង​គ្មាន​ប័ណ្ណ​បើកបរ​។

ក្លឹប​មួយ​ចំនួន​ក៏​បាន​អនុញ្ញាត​ឲ្យ Justin ចូល​​ដែរ ប៉ុន្តែ​ប្រសិន​បើ​គេ​យល់​ព្រម​សម្ដែង ក៏​ប៉ុន្តែ Justin បាន​បដិសេធ។
ជា​លទ្ធផល Justin ត្រូវ​បង្ខំ​ចិត្ត​រៀប​ចំ​ពិធី​ជប់លៀង​នៅ ក្លឹប Cavalli ដែល​ជា​ក្លឹប​តូច​មួយ​នៅ​ទី​នោះ កាល​ពី​ល្ងាច​ថ្ងៃ​ទី​៤ ខែ​មេសា។

តារា​ចម្រៀង​ម្ចាស់​បទ “Beauty and a Beat” ដែល​បាន​អះអាង​ថា​ខ្លួន​គ្មាន​កំហុស​នៅ​ក្នុង​ការ​ចោទ​ប្រកាន់​ទាំង​អស់​មក​លើ​រូប​គេ នឹង​ត្រូវ​បង្ហាញ​ខ្លួន​នៅ​តុលាការ​ម្ដង​ទៀត​នៅ​ថ្ងៃ​ទី​៥ ខែ​ឧសភា ៕
ប្រភព៖​  សប្បាយ