ខេត្តកំពង់ធំ ៖ ស្ត្រីវ័យក្មេងម្នាក់ ត្រូវប្តីកំណាចចាប់ចង វាយដំធ្វើទារុណកម្ម បណ្តាលឱ្យបាក់ ម្រាមដៃខាងស្តាំ២ និងជាំខ្លួនប្រាណ ដោយសារភ្លើងប្រចណ្ឌ ។

ប្រភពត៌មានពីនគរបាលបានឲ្យដឹងថា ហេតុការណ៍នេះ បានកើតឡើងកាល ពីយប់ថ្ងៃទី២៨ វិច្ឆិកា ២០១៤ ស្ថិតក្នុងភូមិពោធិ៍រោង ឃុំសុចិត្រ ស្រុកសណ្តាន់ ខេត្តកំពង់ធំ បង្កឡើងដោយ បុរសជាប្តី ឈ្មោះ ប៉ាវ កុល អាយុ៣៥ឆ្នាំ ។

អំពើហិង្សានេះត្រូវ នគរបាលឱ្យដឹងថា កើតឡើងដោយសារ ភ្លើងប្រចណ្ឌលាយឡំ នឹងជាតិសុរា ចូលខ្លួនផង បុរសជាប្តីបាន ចាប់ចងប្រពន្ធ រួចវាយដំច្រំធាក់ បណ្តាលឲ្យស្ត្រីជាប្រពន្ធ ឈ្មោះ ប្រាក់ ហាង អាយុ២៤ឆ្នាំ រស់នៅភូមិ-ឃុំ ខាងលើបាក់ម្រាមដៃ ខាងស្តាំចំនួន២ និងរងរបួសជាំ ខ្លួនប្រាណគ្រាំគ្រា យ៉ាងដំណំនៅលើ ផ្ទះរបស់ខ្លួន។ មិនតែប៉ុណ្ណោះ ប្តីរូបនេះបានស្រែក គំរាមមិនឲ្យអ្នកណា ចូលជួយឡើយ ទំរាំតែប្រជាពលរដ្ឋ ជិតខាង និងសមត្ថកិច្ច ទៅជួយអន្តរាគមន៍ បាននោះ ស្ត្រីរងគ្រោះ ស្ទើរស្លាប់ស្ទើររស់។

បន្ទាប់ពីរំដោះរួចខ្លួន ពីក្រញ៉ាំដៃប្តីកំណាច នេះរួចមក នាងបានដាក់ពាក្យបណ្តឹង សូមឲ្យច្បាប់ផ្តន្ទាទោស ប្តីឃោរឃៅ នេះតាមច្បាប់ ។ បច្ចុប្បន្នសមត្ថកិច្ច បញ្ជូនខ្លួនបុរសជាប្តី មកកាន់សាលាដំបូង ខេត្តកំពង់ធំ ដើម្បីចាត់ការ តាមផ្លូវច្បាប់៕

ផ្តល់សិទ្ធដោយ កោះសន្តិភាព