ខេត្តពោធិ៍សាត់ ៖ ស្ត្រីម្នាក់អាយុ៣១ឆ្នាំ និងកូនស្រីប្អូន អាយុ០៣ឆ្នាំ បានស្លាប់ភ្លាមៗនៅនឹង កន្លែងកើត ហេតុដោយសារជិះ ម៉ូតូទៅបុករ៉ឺម៉ក ដែល កំពុងធ្វើ ដំណើរបញ្ច្រាស ទិសគ្នា។ គ្រោះថ្នាក់ចរាចរណ៍ នេះបាន កើតឡើង កាលពី វេលាម៉ោង ១និង៤៥នាទី រសៀល ថ្ងៃទី២៧ វិច្ឆិកា ២០១៤ ត្រង់ ចំណុច ផ្លូវកោង ស្ថិតក្នុងភូមិ ស្វាយចាន់ ឃុំស្វាយលួង ស្រុកកណ្ដៀង។

នគរបាលប៉ុស្តិ៍ រដ្ឋបាលស្វាយលួង ឲ្យដឹងថា ជនរងគ្រោះជា ម្ដាយឈ្មោះយ៉ន សុខឿន អាយុ៣១ឆ្នាំ(ស្លាប់) និងកូនស្រីឈ្មោះយ៉ន នីកា អាយុ ៣ឆ្នាំ (ស្លាប់)រស់នៅភូមិ កញ្ជើរបាយដាច ឃុំវាល ស្រុកកណ្ដៀង ជិះម៉ូតូម៉ាក ឆាលីពណ៌ត្រួយចេក ពាក់ស្លាកលេខ ឃ៣៣០៤ភព១ ។

តាមការសាកសួរ នៅកន្លែងកើតហេតុ ឲ្យដឹងថា នៅថ្ងៃនោះស្ត្រីរងគ្រោះ បានខ្ចីម៉ូតូគេជិះ ទៅផ្សារ ស្រុកកណ្ដៀង ដោយដាក់ កូនស្រី ប្អូន អង្គុយមុខ និងកូនស្រីបង អាយុ០៦ឆ្នាំ អង្គុយក្រោយ ហើយស្ត្រីជាម្ដាយ នោះមិនសូវចេះជិះម៉ូតូទេ។ ពេលត្រឡប់មកវិញ ដល់ត្រង់ ចំណុច ផ្លូវកោងភូមិ ស្វាយ លួង ស្ត្រីរូបនោះបាន ជិះម៉ូតូជ្រុលទៅ ខាងឆ្វេងដៃទៅ បុកជាមួយរ៉ឺម៉ក ម៉ូតូដែលកំពុងធ្វើ ដំណើរបញ្ច្រាស ទិសគ្នាយ៉ាង ពេញទំហឹង បណ្ដាលឲ្យ ម្ដាយ និងកូនស្រីប្អូន ស្លាប់ភ្លាមៗនៅនឹង កន្លែងកើតហេតុ។ ចំណែកកូនស្រី បងរងរបួសធ្ងន់បញ្ជូន ទៅសង្គ្រោះ នៅមណ្ឌល សុខភាពស្រុក កណ្ដៀង ។ ភ្លាមៗនោះ អ្នកបើក ម៉ូតូសណ្ដោងរ៉ឺម៉ក ទុករ៉ឺម៉ក និងម៉ូតូចោល នៅទីនោះរត់គេច ខ្លួនបាត់តែម្ដង។

សមត្ថកិច្ចបាន យកម៉ូតូទាំងពីរគ្រឿង និងរ៉ឺម៉កទៅរក្សា ទុកនៅ អធិការដ្ឋាន នគរបាល ស្រុកកណ្ដៀង ដើម្បី ដោះស្រាយ នៅពេលក្រោយ។ ប្រជា ពលរដ្ឋដែល ទៅមើលគ្រោះ ថ្នាក់ចរាចរណ៍ នេះបានសម្តែង ការអាណិត អាសូរយ៉ាងខ្លាំង ពិសេសកូនតូចទាំងពីរ នាក់ដែលគ្នាមិនដឹង អីសោះនោះ ជួប គ្រោះថ្នាក់ ជាមួយម្តាយដែរ៕

                                    សពស្ត្រីរងគ្រោះជាម្តាយ និងកូនស្រី

ផ្តល់សិទ្ធដោយ កោះសន្តិភាព