បាត់ដំបង៖ កុមារាអាយុ ១០ឆ្នាំម្នាក់ បានយកខ្សែគោ មករុំកខ្លួនឯង ហើយលោតលេង ភ្លាត់ស្នៀតផុត ជើងពីដី រឹតកបណ្តាលឱ្យស្លាប់ កាលពីវេលាម៉ោង ៣និង៣០នាទី រសៀលថ្ងៃទី២៧ ខែវិច្ឆិកា ឆ្នាំ២០១៤ នៅក្នុងរោងគោ ក្រោយផ្ទះ ស្ថិតក្នុងភូមិ អណ្តូងនាង ឃុំតាគ្រាម ស្រុកបាណន់ បច្ចុប្បន្នសពជនរងគ្រោះ កំពុងធ្វើបុណ្យ តាមប្រពៃណី។

ប្រភពពីសមត្ថកិច្ច មូលដ្ឋាន បានឱ្យដឹងថា កាលពីវេលាម៉ោង ៣និង៣០នាទី រសៀលថ្ងៃទី២៧ ខែវិច្ឆិកា ឆ្នាំ២០១៤ នៅក្នុងរោងគោ ក្រោយផ្ទះ ស្ថិតក្នុង ភូមិអណ្តូងនាង ឃុំតាគ្រាម ស្រុកបាណន់ មានកុមារាម្នាក់ ឈ្មោះ នៅ មករា អាយុ ១០ឆ្នាំ បានយកខ្សែគោ មករុំក ៣ទៅ៤ជុំ លោតលេងក្នុង រោងគោម្នាក់ឯង មួយសន្ទុះក្រោយមក ក៏បានរត់ទាក់ជើង ធ្លាក់ផុតពីដី ធ្វើឱ្យខ្សែគោ នោះរឹតកក្មេងរងគ្រោះ បណ្តាលឱ្យស្លាប់ភ្លាមៗ ពេលម្តាយទៅមើល បានដាច់ខ្យល់ស្លាប់ បាត់ទៅហើយ។

ម្តាយជនរងគ្រោះ បាននិយាយប្រាប់ សមត្ថកិច្ចថា កូនរបស់គាត់តែងតែ លេងរបៀបនេះ ជាញឹកញាប់ គាត់បានហាមដែរ តែវាមិនស្តាប់ លុះចុងក្រោយនេះ ស្លាប់ទាល់តែបាន។ បច្ចុប្បន្នសពជនរងគ្រោះ ត្រូវបានក្រុមគ្រួសារ ធ្វើបុណ្យតាមប្រពៃណី បន្ទាប់ពីសមត្ថកិច្ច បានពិនិត្យរួច ប្រគល់ឱ្យសាច់ញាតិ៕

ផ្តល់សិទ្ធដោយ ដើមអម្ពិល