ដឹងថា ពែកមី ឆែបមាត់ដោយសារអ្វីអត់?

ដឹងថា ពែកមី ឆែបមាត់ដោយសារអ្វីអត់?

បើនិយាយពីប្រវត្តិនាយពែកមី ទស្សនិកជនច្បាស់ជាបានស្គាល់យ៉ាងច្បាស់។ នាយគឺជាអ្នកខេត្ត ស្វាយរៀង និង ធ្លាប់មានប្រវត្តិ ជាកម្មករសំណង់ ប៉ុន្តែ បើនិយាយពីស្លាកស្នាមឆែប លើបបូរមាត់របស់តារាកំប្លែងនេះវិញ ទស្សនិកជនច្បាស់ជានៅមិនទាន់ដឹងពីមូលហេតុ ដែលនាំឲ្យឆែបនេះនៅឡើយ។

ម្ដងម្កាល ពេលកំប្លែង នាយ ពែកមី តែងតែនិយាយពីស្លាកស្នាមមាត់ឆែបរបស់ខ្លួន ប៉ុន្តែនាយ មិនធ្លាប់ពន្យល់ពីមូលហេតុដែលនាំឲ្យឆែបឡើយ ដោយនាយគ្រាន់តែលើកឡើងក្នុងន័យលេងសើចប៉ុណ្ណោះ។

នាយ ពែកមី បានធ្លាប់ប្រាប់គេហទំព័រ Sabay កាលពីពេលថ្មីៗនេះថា កាលនាយនៅអាយុ ២ ឆ្នាំ ក្រុមគ្រួសារនាយបានទៅរស់នៅក្នុង ជំរំដងរ៉ែក តាមបណ្ដោយជូរភ្នំដងរ៉ែក ជិតព្រំដែនប្រទេសថៃ ដោយម្ដាយឪពុករបស់នាយទៅនៅទីនោះ ក្នុងគោលបំណងចេញទៅរស់នៅក្រៅប្រទេស តាមរយៈអង្គការសហប្រជាជាតិ ក្នុងនាមជាជនភៀសខ្លួន ប៉ុន្តែបំណងចេញទៅរស់នៅក្រៅប្រទេស មិនអាចទៅរួចឡើយ បើទោះបីជាប្រឹងរស់នៅទីនោះ អស់រយៈពេល ៩ ឆ្នាំក្ដី (១៩៨១ – ១៩៨៩) ។

ដោយមិនបានចេញទៅក្រៅប្រទេសដូចបំណងបែបនេះ នៅឆ្នាំ ១៩៨៩ ក្រុមគ្រួសារ នាយ បែកមី បានត្រឡប់មករស់នៅ ស្រុកកំណើតវិញ។

ពែកមី បានរំលឹកថា កាលពីនៅអាយុ ២ ឆ្នាំ នាយបានលេងជាមួយក្មេងក្នុងភូមិ ដោយនាយបានឡើងលើរបងផ្ទះអ្នកភូមិលេង ហើយគ្រានោះ នាយ បានធ្លាក់ត្រូវចំផើងផ្កា (ផ្កាម៉ោង១០) ដែលធ្វើពីកំប៉ុង ត្រីខ ដែលម្ចាស់ផ្ទះដាំ ដាក់អែបរបង បណ្ដាលឲ្យរយះបបូរមាត់ដាច់ចេញពីគ្នា បន្ទាប់មក ម្ដាយឪពុកនាយបានយកទៅព្យាបាលនៅមន្ទីរពេទ្យក្បែរនោះ ដោយត្រូវដេរជាច្រើនថ្នេរ។

ដូច្នេះហើយ នាយពែក មី ត្រូវដេកពេទ្យច្រើនថ្ងៃ ហើយមាត់ហើម បរិភោគបាយមិនកើតឡើយ បានតែទឹកបបរប៉ុណ្ណោះ ក្រោយពីជាពីជំងឺ នាយក៏មានស្នាមបែបនេះ រហូតដល់បច្ចុប្បន្នតែម្ដងទៅ។

ទោះបីជាបច្ចុប្បន្ន បច្ចេកវិទ្យាទំនើប មានកន្លែង កែសម្ផស្សទំនើបៗ អាចកែស្លាកស្នាមមួយនេះឲ្យបាត់ ហើយស្អាតដូចធម្មជាតិយ៉ាងណាក្ដី ប៉ុន្តែ ពែកមី មិនមានបំណងបំបាត់ស្នាមនេះឡើយ ព្រោះនាយគិតថា ស្លាកស្នាមមួយនេះ គឺជាអត្តសញ្ញាណសំគាល់មួយរបស់នាយ៕
ប្រភព Sabay

មុន បន្ទាប់

មតិយោបល់