អុញ…តារាចម្រៀង វ៉ាន់ នីឡា ស្រាប់តែប្រាថ្នាអាជីពពិធីការិនីទូរទស្សន៍ទៅវិញ

អុញ…តារាចម្រៀង វ៉ាន់ នីឡា ស្រាប់តែប្រាថ្នាអាជីពពិធីការិនីទូរទស្សន៍ទៅវិញ

អាចថាជារឿងគួរឲ្យភ្ញាក់ផ្អើលមួយ ខណៈកញ្ញាវ៉ាន់ នីឡា ដែលកំពុងក្តោបអាជីពចម្រៀងជ្រកក្រោមផលិតកម្ម ភ្លេងរីខតនោះ ប្រាប់ថា តាមពិតនាងកំពុងប្រាថ្នាអាជីពពិធីការិនីទូរទស្សន៍មួយបន្ថែមទៀត។ វ៉ាន់ នីឡា - Van nila

“អាជីពមួយនេះ គឺជាអាជីពដែលនាងខ្ញុំស្រឡាញ់ចូលចិត្តតាំងពីដំបូង គឺតាំងមុនចូលសិល្បៈទៅទៀតហ្ន៎!” នេះជាការបញ្ជាក់របស់កញ្ញា វ៉ាន់ នីឡា ខណៈបច្ចុប្បន្នកញ្ញា កំពុងនៅក្នុងអាជីពជាតារាចម្រៀងនៅឡើយ។ វ៉ាន់ នីឡា បន្ថែមថា អាជីពបច្ចុប្បន្ន ក៏នាងស្រឡាញ់ចូលចិត្តដែរ ប៉ុន្តែស្ថិតនៅលំដាប់ទី២ បើធៀបនឹងអាជីពជាពិធីការិនី។

អាជីពពិធីការិនី ជាអាជីពមួយដែលទាមទារឲ្យមានចំណេះដឹងទូលំទូលាយ ហើយបុគ្គលនៅតួនាទីនេះ គួរជាមនុស្សដែលមានវោហារសព្ទ និងមានភាពឈ្លាសវៃ ឆាប់យល់ស្ថានការណ៍ បត់បែនបានលឿន។ ថ្លែងដោយមានជំនឿជឿជាក់លើខ្លួនឯង តារាចម្រៀងផលិតកម្ម ភ្លេងរីខត រូបនេះ ប្រាប់ថានាងអាចធ្វើបាន ព្រោះនាងចូលចិត្តនិយាយ ចូលចិត្តការអាន ម្យ៉ាងនាងតែងតែសង្កេតមើល ឬក៏ហៅថារៀនតាមពិធីករ ពិធីការិនីអាជីពមួយចំនួនទៀតផង។

ដោយសារតែបែបនេះហើយ កញ្ញា អះអាងថា មកដល់សព្វថ្ងៃ បើទោះនាងជ្រុលចាប់អាជីពចម្រៀងមុនទៅហើយក្តី ប៉ុន្តែកញ្ញានៅតែស្រមៃ ចង់ចាប់អាជីពមួយនេះដដែល អីចឹងហើយប្រសិនបើទៅថ្ងៃមុខ ឱកាសហុចឲ្យពេលណា កញ្ញា និងចាប់យកភ្លាម។ យ៉ាងណា ដើម្បីសម្រេចបំណងប្រាថ្នានេះ កញ្ញា បញ្ជាក់ ក៏ត្រូវមើលការឆ្លងផលិតកម្ម ភ្លេងរីខត ដែលកញ្ញា កំពុងច្រៀងផងដែរ។

កញ្ញា វ៉ាន់ នីឡា បានចូលប្រឡូកសិល្បៈប្រមាណជា ១ឆ្នាំមកហើយ ដោយផលិតកម្មខាងលើ គឺជាកន្លែងដំបូងសម្រាប់ជំហានចូលសិល្បៈរបស់កញ្ញា។ កញ្ញា ត្រូវបានគេស្គាល់ថា ជាប្អូនស្រីរបស់លោក សុខ ជំនោរ អ្នកនិពន្ធទំនុកច្រៀងរបស់ផលិតកម្មហង្សមាស។ ទំនាក់ទំនងមួយនេះហើយ ដែលនាំឲ្យគេនិយាយថា វ៉ាន់ នីឡា អាចចូលផលិតកម្ម ភ្លេងរីខត បាន ព្រោះមានតែខ្សែ។

វ៉ាន់ នីឡា - Van nila

កញ្ញា វ៉ាន់ នីឡា និងលោក ម៉ុង ម៉ានិត ពេលចូលរួមសន្និសីទសារព័ត៌មាននៅសណ្ឋាគារភូគីត្រាកន្លងមក

វ៉ាន់ នីឡា បានច្រានចោលលើបញ្ហានេះ ពោលគឺកញ្ញា ចូលដោយយោងលើសមត្ថភាពរបស់នាងសុទ្ធសាធ ក្នុងនោះ កញ្ញា បញ្ជាក់ថា បើទោះមានលោក សុខ ជំនោរ ជាបងពិតមែន ប៉ុន្តែចូលក្នុងផលិតកម្មមួយនេះ កញ្ញា ដាក់ពាក្យប្រឡង ធ្វើតេស្ដសំឡេង ឆ្លងកាត់ដាក់ពិន្ទុពីណាគណៈកម្មការបីបួននាក់ឯណោះ៕

ប្រភព Sabay

មុន បន្ទាប់

មតិយោបល់