រាជធានីភ្នំពេញ ៖ គ្រោះថ្នាក់ចរាចរណ៍មួយ ដែលបង្កឡើងរវាង រថយន្តតាក់ស៊ី ជាមួយនឹង រឺុម៉កម៉ូតូ បានបណ្តាលឱ្យ បុរសម្ចាស់រឺុម៉កម៉ូតូ រងគ្រោះបែកមុខបែកមាត់ ចំណែកយានយន្ត ទាំងសងខាង រងការខូចខាតដូចគ្នា ហើយភាគីទាំងពីរ បានប្រកែកគ្នាបែកផ្សែង រៀបនឹងប្រើអំពើហិង្សា ដាក់គ្នាទៅហើយ តែបានសមត្ថកិច្ចមកទាន់ ។ ហេតុការណ៍នេះ កើតឡើងកាលពី វេលាម៉ោង១១ និង ៥០នាទីថ្ងៃទី ១៧ វិច្ឆិកា ២០១៤ នៅចំណុចមុខ សណ្ឋាគារ ឌីម៉ាវ៉ារៀ តាមផ្លូវព្រះស៊ីសុវត្តិ ស្ថិតក្នុង សង្កាត់ចតុមុខ ខណ្ឌដូនពេញ ។

ប្រភពព័ត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញរថយន្តតាក់ស៊ី មហាកំផែង ពាក់ស្លាកលេខ ភ្នំពេញ2X-5715 បានរីយ៉ែរថយន្ត ថយក្រោយ ឈប់ដាក់ភ្ញៀវនៅមុខ សណ្ឋាគារឌីម៉ាវ៉ារៀ បន្ទាប់ពីដាក់ភ្ញៀវ ចុះអស់ហើយនោះ រថយន្តតាក់ស៊ីខាងលើ ក៏បានបើកទៅមុខ និងបត់ឆ្លងផ្លូវ ក៏ត្រូវរឺុម៉កម៉ូតូ មកពីក្រោយ បើកស្របទិសគ្នា បានបើកមកបុកចំ ពាក់កណ្តាល រថយន្តតាក់ស៊ីខាងលើ បណ្តាលឱ្យរថយន្ត និងម៉ូតូរងការខូចខាត ចំណែកបុរស បើករឺុម៉កម៉ូតូ បានខ្ទាតចេញ ពីរឺុម៉កម៉ូតូ ប្លោងរំលង រថយន្តតាក់ស៊ី រងរបួសបែកមុខ បែកមាត់ ។

ក្រោយពីជួបគ្រោះថ្នាក់ចរាចរហើយនោះ ភាគីទាំងពីរមិនបាន និយាយដោះស្រាយគ្នា តាមសម្រួលនោះទេ គឺបានប្រកែកគ្នា បែកផ្សែង រៀបនឹងប្រើអំពើហិង្សា ដាក់គ្នាទៅហើយ តែពេលដែលសមត្ថកិច្ច ចុះទៅពិនិត្យវាស់វែង សួររកហេតុផល បែរជាភាគីទាំងពីរ មិននិយាយអ្វីនោះទេ ហើយនាំគ្នាបែកផ្លួវគ្នា ដូចជាគ្មាន រឿងអ្វីទៅវិញ ៕

ផ្តល់សិទ្ធដោយ កោះសន្តិភាព