ខេត្តព្រៃវែង ៖ រថយន្តម៉ាកសាំងយ៉ុង ពណ៌ទឹកប្រាក់ ដឹកនំប៉័ងប៉ាតេ មានជ័យ(៩៩៩) ពាក់ស្លាកលេខ តាកែវ២A១៤២៥ បើកដោយបុរសម្នាក់ បោះពួយយ៉ាងលឿន តាមបណ្តោយ ផ្លូវជាតិលេខ១ មកពីទិសខាងកើត បានប្រទះគ្នាជាមួយ ម៉ូតូម៉ាកសង់ ស៊េរីចាស់តែមឆេះ ពាក់ស្លាកលេខ ក1150តករ ឌុបគ្នា២នាក់ប្តីប្រពន្ធ មកពីទិសខាងលិច យ៉ាងពេញទំហឹង បណ្តាលឱ្យបុរសជាប្តី ផ្លោងធ្លាក់ទៅលើ ទ្រូងផ្លូវបែកក្បាលសន្លប់ រីឯប្រពន្ធបាក់ ដៃខាងឆ្វេង ត្រគាកខាងឆ្វេង និងជើងឆ្វេង ចំណែកអ្នក បើកបររថយន្ត បានរត់គេចខ្លួន បាត់ស្រមោល។

ហេតុការណ៍នេះ បានកើតឡើងកាលពី វេលាម៉ោង៥ និង៤៥នាទីរសៀល ថ្ងៃទី១៥ វិច្ឆិកា ២០១៤ នៅចំណុចខាងកើត ហាងស្រីនាថ ស្ថិតក្នុងភូមិព្រែករាំង ឃុំបន្លិចប្រសាទ ស្រុកពាមរក៍។

ក្រោយកើតហេតុ សមត្ថកិច្ចបានទៅដល់ កន្លែងកើតហេតុ ជួយអន្តរាគមន៍ ហៅរថយន្តមន្ទីរពេទ្យ បង្អែកអ្នកលឿង ដឹកជនរងគ្រោះ ទៅសង្គ្រោះ តែជាអកុសល ពេលទៅដល់មន្ទីរពេទ្យ បុរសជាប្តីបាន ដាច់ខ្យល់ស្លាប់ ចំណែកស្ត្រីជាប្រពន្ធ ដោយសាររបួសធ្ងន់ពេក ត្រូវក្រុមគ្រួសារ បញ្ជូនបន្តទៅព្យាបាល នៅមន្ទីរពេទ្យ ខេត្តស្វាយរៀង។

ជនរងគ្រោះដែលស្លាប់ ឈ្មោះ ជី ឆក ភេទប្រុស អាយុ២៩ឆ្នាំ និងប្រពន្ធរបួសធ្ងន់ ឈ្មោះ ទឹម រ៉ានី អាយុ២៦ឆ្នាំ អ្នកទាំង២មាន មុខរបរលក់ត្រី នៅរាជធានីភ្នំពេញ៕

ផ្តល់សិទ្ធដោយ កោះសន្តិភាព