រុស្ស៊ី៖ ករណីដែលសឹង តែមិនគួរឲ្យជឿ មួយបានកើតឡើង ដែលមានបុរសម្នាក់ បានដើរចូលក្នុង ផ្ទះថ្មីរបស់ខ្លួន ជាលើកដំបូង តែបែរជាប្រទះឃើញ សាកសព របស់ម្ចាស់ផ្ទះមុន ដេកស្លាប់ នៅក្នុង បន្ទប់ទឹកទៅវិញ។

យោងតាមប្រភព ព័ត៌មានបាន ឲ្យដឹងថា បុរសម្នាក់ ឈ្មោះថា Taras Yermolayev អាយុ៤៥ឆ្នាំ ជាជនជាតិ រុស្ស៊ី បានដើរចូលទៅក្នុង ផ្ទះដែលខ្លួនទើប នឹងទិញ ជាលើកដំបូង នៅក្នុងតំបន់ Novokuznetsk របស់ប្រទេស រុស្ស៊ី ហើយក៏ប្រទះឃើញ សាកសពបុរសម្នាក់ ផ្សេងទៀត ដែលជាម្ចាស់ផ្ទះ នេះមុនដេកស្លាប់ នៅក្នុងថ្លុកឈាម ក្នុងបន្ទប់ទឹក នៃផ្ទះនោះ។

ផ្អែកលើសម្តី របស់ប៉ូលីសប្រចាំ តំបន់នេះបាន បញ្ជាក់ថា បុរសជាជនរងគ្រោះនោះ មានឈ្មោះ Dementi Zakharov វ័យ៥០ឆ្នាំ ហើយរូបគេ ក៏ជាជនសង្ស័យ ពាក់ព័ន្ធនឹង ការជួញដូរគ្រឿងញៀន ផងដែរ ហើយស្លាប់ដោយសារ ត្រូវឃាតករ យកញញួរ មកវាយសម្លាប់។ ប៉ូលីសក៏បាន បញ្ជាក់ទៀតថា “យើងបានរកឃើញ តំរុយជាច្រើន ដែលបង្ហាញថា ជនរងគ្រោះត្រូវបាន គេធ្វើទារុណកម្ម យ៉ាងធ្ងន់ធ្ងរ មុននឹងត្រូវបានសម្លាប់ ហើយនេះ ក៏អាចជា ករណីសងសឹកចំពោះ គំនុំណាមួយ ទាក់ទងនិង របររកស៊ី របស់គេដែរ”។

ចំណែកឯលោក Yermolayev បាននិយាយថា “ពេលដែលឃើញ បែបនេះខ្ញុំពិតជា មានការរន្ធត់ យ៉ាងខ្លាំង ពេលឃើញ ស្ថានភាពសាកសព របស់បុរសម្នាក់នោះ ហើយខ្ញុំទើបតែជួបគាត់ ដើម្បីយកសោរផ្ទះ កាលពីមួយថ្ងៃ មុនប៉ុណ្ណោះ ខ្ញុំពិតជាមិនដឹង ត្រូវបរិយាយ ពីអារម្មណ៍ខ្ញុំពេលនេះ ថាយ៉ាងម៉េចនោះឡើយ”។

គួរបញ្ជាក់ផងដែរថា ផ្ទះនេះត្រូវបាន លក់ទៅឲ្យលោក Yermolayev ក្រោយពី Dementi មិនបានបង់ថ្លៃ ជួលផ្ទះ អស់រយៈពេល ប៉ុន្មានខែមក ហើយស្រាប់តែ ថ្ងៃរើ ចូលផ្ទះលើកដំបូង ក៏ជួបហេតុការណ៍ បែបនេះតែម្តង។ យ៉ាងណាមិញ ពេលនេះប៉ូលីសក៏ បានបិទផ្ទះមួយនេះ ដើម្បីធ្វើការ ស៊ើបអង្កេតបន្ត៕

តើប្រិយមិត្តយល់ យ៉ាងណាដែរ?

ប្រភព៖ ដេលីម៉េល

ដោយ៖ សុជាតិ

ខ្មែរឡូត