ខេត្តស្វាយរៀង ៖ បុរសម្នាក់បាន ដាច់ចិត្តផឹកថ្នាំ បាញ់ស្រូវសម្លាប់ខ្លួន នៅ ខាងក្រោមផ្ទះ ក្នុងថ្ងៃភ្ជាប់ពាក្យ ខណៈ ឪពុកម្តាយ បងប្អូន រវល់រៀបចំចាត់ ចែងកម្មវិធីភ្ជាប់ ពាក្យនៅផ្ទះ ខាងនារី ជាគូដណ្តឹង ។ ហេតុការណ៍នេះ ធ្វើឱ្យ មានការភ្ញាក់ផ្អើល កាលពីវេលា ម៉ោង៧ និង៣០នាទីព្រឹក នៅថ្ងៃទី១៤ វិច្ឆិកា ២០១៤ ស្ថិត ក្នុងភូមិភ្លោះ ឃុំគ្រួស ស្រុកស្វាយជ្រំ ខេត្តស្វាយរៀង ។

បើតាមសម្តីបុរស ដែលត្រូវជាឪពុក របស់ជនរងគ្រោះ ឈ្មោះ យាន សៀម អាយុ៣៨ឆ្នាំ មុខរបរកសិករ បានឱ្យ ដឹងថា កូនប្រុសគិតខ្លី មានឈ្មោះយាន ពិសាល អាយុ២០ឆ្នាំ មុខរបរ កសិករ មានទីលំនៅក្នុង ភូមិកើតហេតុខាង លើ រីឯនារីដែល ត្រូវជាគូដណ្តឹង មានឈ្មោះមឿន ស្រីល័ក្ខ អាយុ១៨ឆ្នាំ មុខរបរកសិករ មានទីលំនៅក្នុង ភូមិកើត ហេតុខាងលើ អ្នកទាំងពីរ ត្រូវជាបងប្អូន ជីដូនមួយនឹងគ្នា ។

បុរសជាឪពុក បានបន្តទៀតថា មូលហេតុ ដែលបណ្តាលឱ្យ កើតមានការរៀបចំ កម្មវិធីភ្ជាប់ពាក្យ នេះឡើង ដោយ សារ ចាស់ទុំទាំង សងខាងត្រូវ ជាបងប្អូននឹង គ្នាស្រាប់ ម្យ៉ាងទាំងអស់ គ្នាបានឃើញក្មេងៗ ល្អូកល្អិននឹង គ្នាផង នោះ ចាស់ទុំក៏បាន កើតគំនិតចង់ ផ្សំផ្គុំក្មេងៗ ទាំងពីរឱ្យ បានជាគូរ អនាគត នឹងគ្នាតែម្តងទៅ ហើយគាត់ក៏ បាន សួរនាំអំពីចិត្ត របស់ក្មេងៗ ទាំងពីរដែរ តែមិនលឺមាន ខាងណាម្នាក់ ប្រកែកតវ៉ានោះឡើយ ។ លុះនៅថ្ងៃ កើតហេតុ ដែលត្រូវជាថ្ងៃភ្ជាប់ ពាក្យនោះ ពួកគាត់ក៏បាន ទៅរៀបចំចាត់ចែង កម្មវិធីនៅផ្ទះខាង កូនស្រីដែលនៅ ចំងាយ ប្រមាណជា៥០០ម៉ែត្រ ពីផ្ទះខាងកូនប្រុស ដោយកូនប្រុស របស់គាត់មិនទាន់ ទៅតាមនៅផ្ទះ ខាងស្រីនៅឡើយទេ ។

បន្ទាប់ពីរៀបចំ កម្មវិធីរួចរាល់ ភ្ញៀវក៏មកដល់ តែ កូនកំលោះនៅមិន ទាន់មកដល់ ទៀតគាត់ក៏ បានឱ្យបងប្អូន ទៅ តាមហៅ នៅផ្ទះ ដើម្បីបាន ចាប់ផ្តើម កម្មវិធីភ្ជាប់ពាក្យឱ្យទាន់ពេលវេលា ។ ក្រោយពីបងប្អូន ដែលទៅតាម បាត់ អស់ជាងកន្លះម៉ោង ស្រាប់តែមាន គេរត់មកប្រាប់ថា កូនប្រុសរបស់គាត់ បានផឹកថ្នាំបាញ់ ស្រូវសម្លាប់ខ្លួន ធ្វើឱ្យ គាត់ និងបងប្អូនទាំងអស់ មានការភ្ញាក់ផ្អើល និងប្រញាប់ប្រញាល់ បញ្ជូនកូនមកសង្គ្រោះ នៅមន្ទីរពេទ្យ បង្អែក ខេត្ត ។ រហូតមកដល់ វេលាម៉ោង១១ព្រឹក យុវជនរងគ្រោះ ខាងលើកំពុងត្រូវបាន ក្រុមគ្រូពេទ្យជួយ សង្គ្រោះ នៅឡើយ ៕

រូបភាពៈយុវជនផឹកថ្នាំបាញ់ស្រូវសម្លាប់ខ្លួនកំពុងត្រូវបានសង្គ្រោះនៅមន្ទីរពេទ្យ

ផ្តល់សិទ្ធដោយ កោះសន្តិភាព