កំពត៖ តារាចម្រៀង ពែក មី បើករថយន្ត គេចគោដើរឆ្លង ថ្នល់ជួបគ្រោះថ្នាក់ចរាចរ ក្រឡាប់រថយន្ត៣ ត្រឡប់ហើយ រថយន្តឈរ ត្រង់វិញ កាល ពីវេលា ម៉ោង០៦ និង១០នាទី ល្ងាច ថ្ងៃទី១២ វិច្ឆិកា ឆ្នាំ២០១៤ នៅលើ កំណាត់ផ្លូវជាតិលេខ៣ ត្រង់ចំណុចជិត ផ្លូវចូលរោងចក្រ ស៊ីម៉ង់ត៍ ភ្នំល្អាង ភូមិល្អាង ឃុំល្អាង ស្រុកដងទង់ ។

នេះបើយោង តាមសម្តីលោក ប៊ុន សារឹម មន្ត្រីនគរបាល ប៉ុស្តិ៍ល្អាង បានប្រាប់ឱ្យ កោះសន្តិភាពដឹងថា មានរថយន្តម៉ាកឡិចស៊ីស ពណ៌ស ៤៧០ ពាក់ស្លាកលេខ ភ្នំពេញ 2Q-1827 បើកបរ ក្នុងទិសដៅពីត្បូង ទៅជើងមួយ ត្រូវបានក្រឡាប់ពី ២ទៅ៣ត្រឡប់ ហើយឈរត្រង់វិញ ដោយសារតែ បើកគេចគោ ដើរឆ្លងថ្នល់ពី លិចទៅកើត ។

លោក ប៊ុន សារឹម នគរបាល ប៉ុស្តិ៍ល្អាងបាន និយាយប្រាប់បន្តថា បន្ទាប់ពី ក្រឡាប់រថយន្ត ពលរដ្ឋបាននិយាយថា នៅក្នុងរថយន្ត មាន ឃើញ មនុស្ស៤នាក់ ប្រុស២ ស្រី២ បានលូន ចេញពីក្នុងរថយន្ត ប្រឡាក់ភក់ ហើយតារាកំប្លែង ពែក មី ក៏បាន លូនចេញ តាមកញ្ចក់មុខ ហើយមាន នារីម្នាក់សន្លប់ មួយភាំង ហាក់ដូចជាតក់ស្លុត ។

ទោះបីជា នគរបាលមិនបាន ឃើញលោក ពែក មី ដោយផ្ទាល់ ភ្នែកក៏ដោយ ក៏ពលរដ្ឋ ដែលមកចោមរោម មើល គេឃើញពិតជាលោក ពែក មី ហើយលូនចេញពី ក្នុងរថយន្ត ប៉ុន្តែលោក ពែក មី ពាក់អាវ ពណ៌ក្រហមឈាម ជ្រូកមានលេខ៧ និងនារី២នាក់ទៀត ប្រញាប់ជួល រថយន្តពលរដ្ឋនៅម្តុំនោះ តម្លៃ៨០ដុល្លារ ទៅភ្នំពេញវិញ ។

លោក អនុសេនីយ៍ទោ ភោក វឿន នាយនគរបាល ប៉ុស្តិ៍ល្អាងបានមាន ប្រសាសន៍ថា លោកទៅ មិនទាន់ឃើញ មុខលោក ពែក មី ទេ ពេលដែល គ្រោះថ្នាក់ចរាចរ ក្រឡាប់រថយន្ត ៣ត្រឡប់នោះ ប៉ុន្តែបើតាម ពលរដ្ឋរាប់រយនាក់ បានឃើញហេតុការណ៏នេះ គឺគាត់ស្គាល់ ច្បាស់ណាស់ ពិតជាតារាកំប្លែង ពែក មី ពិតប្រាកដមែន ដែលបានបើក រថយន្តគេចគោ ដើរឆ្លងថ្នល់ មិនបួងចង្កូតទៅឆ្វេង បែរជារេចង្កូតមក ក្រឡាប់ទៅ ស្តាំដៃទៅវិញ នៅតែ៥ម៉ែត្រ ទៀតបុកផ្ទះ ប្រជាពលរដ្ឋទៀតផង ។

លោក ភោក វឿន នាយនគរបាល និយាយថា អ្នកនៅក្នុងរថយន្ត ទាំង៤នាក់ មានស្រី២ ប្រុស២ ទាំងលោកពែក មី មិនរងរបួសទេ ហើយខាង នគរបាលចរាចរណ៍ មិនបានយកឈ្មោះ អ្នកបើកបរដែរ ព្រោះនៅកន្លែង កើតហេតុគេស្គាល់ ឈ្មោះគ្រឿន គ្រាន់តែនិយាយថា បើករថយន្ត គេចគោតែប៉ុណ្ណោះ ហើយរថយន្ត តារាកំប្លែងរូបនោះ ក៏ត្រូវបានគេ ជួលរថយន្ត ស្ទូចពីខេត្តកំពត មកស្ទូចយកទៅ ភ្នំពេញ ផងដែរ ។ ប៉ុន្តែគេចាត់ ទុកថា តារាកំប្លែងលោក ពែក មី ពិតជា សំណាងណាស់ ព្រោះក្រឡាប់រថយន្ត ច្រើនត្រឡប់បែប នេះបែរជាមិន រងគ្រោះថ្នាក់ នរណា ម្នាក់ ។

ទាក់ទងទៅនឹង ការអះអាង ខាងលើ តារាកំប្លែង ពែក មី បានប្រាប់ កោះសន្តិភាព តាមទូរស័ព្ទកាលពី រសៀលថ្ងៃទី១៣ វិច្ឆិកា ២០១៤ ដោយបញ្ជាក់ថា «ខ្ញុំមិនបាននៅក្នុង ហេតុការណ៍ គ្រោះថ្នាក់ចរាចរណ៍នោះទេ» ។ លោកបន្តថា កាលពីម៉ោង ជាង៦ល្ងាច ថ្ងៃទី១២ វិច្ឆិកា លោក និងមិត្តភក្តិត្រឡប់ មកពីលេង បាល់ទះ នៅខេត្តកំពត ដោយជិះរថយន្តតួរីសពណ៌.ស មកតាមផ្លូវក៏ឃើញ មានគ្រោះថ្នាក់ ចរាចរណ៍ រថយន្ត ឡិចស៊ីស៤៧០ ពណ៌.ស ក្រឡាប់ ទើបលោក នឹងក្រុមការងារ ឈប់មើលមួយភ្លែត ក៏ឡើងរថយន្ត បន្តដំណើរមកខេត្តតាកែវ ៕

ផ្តល់សិទ្ធដោយ កោះសន្តិភាព