រាជធានីភ្នំពេញ ៖ បុរសអ្នករត់ម៉ូតូឌុបម្នាក់ បានលង់ខ្លួន ជាមួយបុរសស៊ីម២ (ភេទទី៣) លូកស្ទាបអង្អែល ណែបនិត្យ រួចហើយបន្លំលួច យកកាបូបទៅបាត់។ ហេតុការណ៍នេះបង្ក ឱ្យមានការភ្ញាក់ផ្អើល កាលពីម៉ោង១ និង១៥នាទី រំលងអធ្រាត្រឈានចូល ថ្ងៃទី០៨ វិច្ឆិកា ២០១៤ នៅតាមបណ្តោយ ផ្លូវលេខ៥៩៨ ម្តុំខាងត្បូង ត្រឡោកបែក ស្ថិតក្នុងភូមិសេប៉េសេ សង្កាត់ទឹកថ្លា។ ទោះបែបណា ក្រោយពីដឹងថា បាត់កាបូប និងចាញ់បោកនាងខ្ទើយ ជនរងគ្រោះក៏ស្រែកឆោឡោ ដេញឃាត់ខ្លួន បក្សពួកបានម្នាក់ រួចបញ្ជូនឲ្យសមត្ថកិច្ច ចាត់ការទៅតាមច្បាប់។

ជនសង្ស័យខាងលើ មានឈ្មោះ យិន ហួនបូរ៉ា អាយុ២៥ឆ្នាំ មុខរបរតុបតែង សំអាងការ ស្នាក់នៅផ្ទះជួល ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រីឯជនរងគ្រោះ ឈ្មោះ ភឺន ចិន ភេទប្រុស អាយុ៣៤ឆ្នាំ មុខរបររត់ម៉ូតូឌុប និងមានទីលំនៅ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

បន្ទាប់ពីឃាត់ខ្លួនបាន នាងខ្ទើយម្នាក់នោះ បានធានាសងប្រាក់ ទៅជនរងគ្រោះ ចំនួន៥០ដុល្លារ ដែលបក្សពួក លួចយកទៅ ប៉ុន្តែសម្រាប់សមត្ថកិច្ច មិនអាចឲ្យនាងខ្ទើយ រួចខ្លួនបានទេ ពីព្រោះកន្លងមក ជនរងគ្រោះជាច្រើននាក់ ធ្លាប់បាត់ទ្រព្យសម្បត្តិ ដោយសារក្រុម នាងខ្ទើយនេះ ធ្វើឲ្យសមត្ថកិច្ច ឈឺក្បាល មិនស្ទើរនោះទេ។

តាមការអះអាង របស់ជនរងគ្រោះ បានឱ្យដឹងថា នៅក្នុងកាបូបលុយនោះ មានឯកសារផ្សេងៗ អត្តសញ្ញាណប័ណ្ណ សម្គាល់ខ្លួនមួយសន្លឹក និងលុយជាង ២០ម៉ឺនរៀល ថែមទៀត។ បច្ចុប្បន្នជនសង្ស័យ ត្រូវសមត្ថកិច្ចឃុំខ្លួន នៅអធិការដ្ឋាន ប៉ូលិសសែនសុខ ហើយកសាង សំណុំរឿងទៅតុលាការ៕

ផ្តល់សិទ្ធដោយ កោះសន្តិភាព