កំពង់ឆ្នាំង ៖ យ៉ាងហោចណាស់ បុរសម្នាក់ បានរងរបួសធ្ងន់ ក្នុងហេតុការណ៍ គ្រោះថ្នាក់ចរាចរណ៍ មួយបានកើតឡើង រវាងម៉ូតូស្កុបពី បុកជាមួយ ម៉ូតូឌ្រីមសង់ កាលពីវេលាម៉ោង ៩និង១៥នាទី ព្រឹកថ្ងៃទី២៨ ខែតុលា ឆ្នាំ២០១៤ នៅត្រង់ចំណុចផ្លូវបំបែក ជាបួនទល់មុខ អាហារដ្ឋានបូរី ស្ថិតក្នុងភូមិ ម៉ុងបារាំង សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង ។

ប្រជាពលរដ្ឋពី កន្លែងកើតហេតុ បានឲ្យដឹងថា មុនពេលកើតហេតុ គេបានឃើញម៉ូតូស្កុបពី ពណ៌ក្រហម ពាក់ស្លាកលេខ កំពង់ឆ្នាំង 1C-7344 បើកបរក្នុង ល្បឿនលឿន ដោយបុរសម្នាក់ ទិសដៅពីកើតទៅលិច លុះមកដល់ កន្លែងកើតហេតុ ស្របពេលម៉ូតូ ឌ្រីមសង់ ពណ៌ខ្មៅ ពាក់ស្លាកលេខ កំពង់ស្ពី 1B-4620 បើកបរ ឌុបគ្នា២នាក់ ក្នុងទិសដៅ ពីជើងទៅត្បូង ក៍បុកគ្នាចំពីមុខ ពេញមួយហឹងតែម្តង បណ្តាលឲ្យ ម្ចាស់ម៉ូតូ ស្កុបពីបើកបរ អត់ពាក់មួក សុវត្ថិភាព រងរបួសធ្ងន់។

នគរបាលចរាចរណ៍ នៅកន្លែងកើតហេតុ បានឲ្យដឹងថា ម្ចាស់ម៉ូតូស្កុបពី ដែលរងរបួស ធ្ងន់ឈ្មោះ លី ណា ភេទប្រុស អាយុ២៦ឆ្នាំ រស់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង រីឯអ្នកបើកបរ ម៉ូតូឌ្រីមសង់ ឈ្មោះ ប្រាក់ យន ភេទប្រុស អាយុ៣៥ឆ្នាំ និងអ្នកជិះពី ក្រោយឈ្មោះ សេង ចន្ធូ ភេទប្រុស អាយុ៣៤ឆ្នាំ រស់នៅភូមិ ត្រពាំងចឹកសារ សង្កាត់កំពង់ឆ្នាំង ក្រុងកំពង់ឆ្នាំង ។

ក្រោយកើតហេតុ ជនរងគ្រោះត្រូវ បានរថយន្តសាមុយ ដឹកយកទៅសង្គ្រោះ នៅមន្ទីរពេទ្យបង្អែក ខេត្តកំពង់ឆ្នាំង រីឯមធ្យោបាយ បង្កទាំងសងខាង ត្រូវបានយកមករក្សាទុក នៅអធិការដ្ឋាន នគរបាល ក្រុងកំពង់ឆ្នាំង រងចាំដោះស្រាយ នៅពេលក្រោយ ៕

ផ្តល់សិទ្ធដោយ ដើមអម្ពិល