ភ្នំពេញ៖ ករណីបាត់ រថយន្ដលុច្សស៊ីស RX-300 មួយគ្រឿង ពាក់ស្លាកលេខ ភ្នំពេញ 2V-2892 ដែលសមត្ថកិច្ច អះអាងថា ជាកម្មសិទ្ធរបស់ តារាសម្ដែងភាពយន្ដ កញ្ញា ពេជ្រ អាវីហ្សា តាំងពីយប់ ថ្ងៃទី១៣ ខែតុលា ឆ្នាំ២០១៤ កន្លងទៅនេះ សមត្ថកិច្ច មិនទាន់រកឃើញ រថយន្ដត្រឡប់មកវិញ ហើយបច្ចុប្បន្ន ករណីនេះ កម្លាំងនគរបាល ជំនាញព្រហ្មទណ្ឌ រាជធានីភ្នំពេញ និងសមត្ថកិច្ច មូលដ្ឋាន ខណ្ឌដូនពេញ បាននឹង កំពុងបន្ដស្រាវជ្រាវ តាមចាប់ជនដៃដល់ យកមកផ្ដន្ទាទោស តាមផ្លូវច្បាប់ ។

ជាមួយគ្នានេះ ម្ចាស់រថយន្ដ ក៏បានអំពាវនាវ ដល់សមត្ថកិច្ចពាក់ព័ន្ធ ធ្វើការស្រាវជ្រាវ និងតាមដាន ដើម្បីតាម ចាប់ជន សង្ស័យដែល ធ្វើសកម្មភាពលួច យករថយន្ដពេល កំពុងចតតាមដងផ្លូវ ។

មន្ដ្រីនគរបាល ព្រហ្មទណ្ឌមួយរូប បានឱ្យដឹងថា ករណីនេះ កម្លាំងសមត្ថកិច្ច ជំនាញ បាននឹងកំពុងបន្ដ ធ្វើស្រាវជ្រាវ យ៉ាងយកចិត្ដ ទុកដាក់ ដើម្បីតាមចាប់ជនល្មើស ប៉ុន្ដែរហូតមកដល់ ថ្ងៃទី២៧ ខែតុលា ឆ្នាំ២០១៤នេះ មិនទាន់បាន ឃាត់ខ្លួន ជនសង្ស័យណាម្នាក់ បាននៅឡើយ។

ដោយឡែក ម្ចាស់រថយន្ដ ក៏សូមអំពាវនាវ ទៅប្រជាពលរដ្ឋណា ដែលឃើញរថយន្ដ និងស្លាកលេខ ខាងលើនេះ អាចទាក់ទងលេខទូរស័ព្ទ 070-078- 69 3333 ពេលនោះ នឹងមានជូន សាគុណជាទីគាប់ចិត្ត។

សូមបញ្ជាក់ថា តារាសម្តែងកញ្ញា ពេជ្រ អាវីហ្សា បានបាត់ រថយន្តឡិច Luxus-RX300 មួយគ្រឿង ខណៈចាក់សោរ ចតចោលនៅ តាមចិញ្ចើមផ្លូវ ហើយចូលទៅ ញាំស៊ុប កាលពីវេលាម៉ោង ៨យប់ថ្ងៃទី១៣ ខែតុលា ឆ្នាំ២០១៤ នៅ ចំណុច មុខហាងស៊ុបយីហោ «ស៊ុបគោ៤០» ស្ថិតនៅតាមលេខ ផ្លូវ៦៣ ស្ថិតក្នុង សង្កាត់ផ្សារថ្មី១ ខណ្ឌដូនពេញ ។

កញ្ញា ពេជ្រ អាវីហ្សា និយាយថា នៅមុនពេលកើតហេតុ ប្អូនរបស់នាង បានយករថយន្ត ពាក់ស្លាកលេខ ភ្នំពេញ 2Y-2892 ដឹកក្រុមគ្រួសារ ទៅញាំស៊ុប នៅកន្លែង កើតហេតុខាងលើ ដោយនាងមិនបាន ទៅជាមួយទេ។ ខណៈធ្វើដំណើរ មកដល់មុខហាងស៊ុប ខាងលើប្អូន របស់នាង បានចតរថយន្តចាក់សោ ចោលនៅចិញ្ចើម ផ្លូវទល់មុខហាងស៊ុប ខាងលើ រួចក៏នាំគ្នាដើរ ចូលហាងស៊ុបនោះ ។

នាងបានបន្តទៀតថា ពេលដែលក្រុមគ្រូសារ របស់នាង ចេញមកពីហូប ស៊ុបវិញនោះក៏ មិនឃើញរថយន្ត នៅកន្លែងចត ក៏មានការភ្ញាក់ផ្អើល ឆោឡោឡើងតែម្តង ។

ក្រោយពេលកើតហេតុ នារីម្ចាស់រថយន្ត បានទៅដាក់ ពាក្យបណ្តឹងនៅ ប៉ុស្តិ៍នគរបាល រដ្ឋបាលផ្សារថ្មីទី១ ៕

អត្ថបទចាស់៖ រថយន្តឡិច ស៊ីសRX300 របស់តារា សម្តែងពេជ្រ អាវីហ្សាត្រូវជនសង្ស័យលួចយកទៅបាត់ ខណៈចត ចោលហើយចូលទៅញាំស៊ុប

ផ្តល់សិទ្ធដោយ ដើមអម្ពិល