ខេត្តកំពង់ឆ្នាំង ៖ បុរសម្នាក់ ត្រូវជនសង្ស័យ យកអាវុធកែច្នៃ និងកាំបិត មកគម្រាមប្លន់ យកម៉ូតូមួយគ្រឿង ជិះគេចខ្លួនទៅបាត់ ដោយសុវត្ថិភាព ខណៈដែលគាត់ ជិះទៅលើកលប កាលពីវេលាម៉ោង៦ និង១៥នាទីព្រឹក ថ្ងៃទី១៦ តុលា ២០១៤ ស្ថិតនៅចំណុច ដើមត្នោតមួយដើម ក្នុងភូមិទួលរការ ឃុំមេលំ ស្រុកប្រិបូរណ៍ ខេត្តកំពង់ឆ្នាំង ។

ប្រភពបានឱ្យដឹងថា ជនរងគ្រោះឈ្មោះឌិត សំអន អាយុ៤៥ឆ្នាំ មានទីលំនៅក្នុងភូមិ-ឃុំខាងលើ ជិះម៉ូតូម៉ាកវ៉េវ ពណ៌ក្រហម ពាក់ស្លាកលេខ កំពង់ឆ្នាំង 1G-4704 ។

ប្រភពបន្តថា មុនពេលកើតហេតុ ជនរងគ្រោះបាន ជិះម៉ូតូទៅលើកលប លុះមកដល់ ចំណុចកើតហេតុ ក៏ស្រាប់តែ ជួបបុរសម្នាក់ មិនស្គាល់ អត្តសញ្ញាណ បានហៅ រូបគាត់ឱ្យឈប់ និងសួរគាត់ថា ទៅណា? គាត់ឆ្លើយថា ទៅលើកលប ។ បន្ទាប់មកជននោះ បានយកកាំភ្លើងកែច្នៃ សម្រាប់បាញ់សត្វ មកភ្ជង់ឱ្យប្រគល់ម៉ូតូ បើមិនដូច្នេះ គេនឹងបាញ់ សម្លាប់ហើយ ។ ដោយខ្លាច ជនរងគ្រោះបាន ប្រគល់ម៉ូតូនោះ ឱ្យទៅជនសង្ស័យ ជិះគេចខ្លួនបាត់ ៕

ផ្តល់សិទ្ធដោយ កោះសន្តិភាព