ខេត្តបន្ទាយមានជ័យ ៖ ខឹងឆ្កែខាំចំក្បាលជង្គង់ បុរសម្នាក់បាន យកញញួរវាយឆ្កែនោះ តែម្ចាស់ឆ្កែ ទៅឱបឆ្កែ ក៏ត្រូវក្បាលមួយញញួរ បណ្តាលរបួស ស្រាលហើយ ប៉េអឹមក៏បានចាប់ខ្លួន អ្នកវាយបញ្ជូន ទៅសាលាដំបូង ខេត្តបន្ទាយមានជ័យ នាព្រឹកថ្ងៃទី១៣ តុលា ២០១៤ ។

លោក ជា ដា មេបញ្ជាការ កងរាជអាវុធហត្ថ ក្រុងប៉ោយប៉ែត បានប្រាប់ឱ្យថា ជនសង្ស័យ ដែលត្រូវចាប់ខ្លួន មានឈ្មោះ ប៉ុក ភក្តី ហៅភ័ក្រ ភេទប្រុស អាយុ៣៤ឆ្នាំ ស្នាក់ភូមិប៉ាលិលេយ្យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។

លោកបានបន្តថា នៅពេលដែលឃាត់ខ្លួន ជនសង្ស័យ គឺកម្លាំងកងរាជអាវុធហត្ថ ក្រុងប៉ោយប៉ែត បានទទួលពាក្យ បណ្តឹងពីឈ្មោះ គុណ សាមាន  ភេទស្រី អាយុ៤៨ឆ្នាំ ស្នាក់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដែលបានប្តឹងឈ្មោះ ប៉ុក ភក្តី ហៅ ភ័ក្រ ថា បានយកញញួរ វ៉ៃក្បាលផ្នែកខាងក្រោយ បណ្តាលឱ្យ របួសស្រាល។ ដែលហេតុការណ៍នេះ កើតឡើងកាលពី ថ្ងៃទី១១ តុលា ២០១៤នៅវេលាម៉ោង៣ រសៀល ស្ថិតនៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ។

ក្រោយពេលសមត្ថកិច្ច សាកសួរជនសង្ស័យ បានសារភាពថាខ្លួន ពិតជាបានវ៉ៃ ត្រូវជនរងគ្រោះ បណ្តាលរបួសមែន ព្រោះតែខ្លួនខឹងនឹង ឆ្កែរបស់ជនរងគ្រោះ ស្ទុះមកខាំខ្លួន ចំក្បាលជង្គង់ ហើយខ្លួនក៏បាន ទាញយកញញួរ ជាប់នឹងដៃវ៉ៃឆ្កែនោះ តែម្ចាស់ឆ្កែស្ទុះ មកឱបឆ្កែ ក៏ត្រូវកចំក្បាល មួយញញួរបណ្តាល របួសតែម្តង៕

ផ្តល់សិទ្ធដោយ កោះសន្តិភាព