អង់គ្លេស៖ កាលពីពេលថ្មីៗនេះ មានរូបថតប៉ុន្មានសន្លឹក ត្រូវបានបង្ហោះ ចូលនៅតាមប្រព័ន្ធ Online ដែលបានបង្កភាព ភ្ញាក់ផ្អើលយ៉ាងខ្លាំង ព្រោះថាវាគឺជា រូបភាពដែលបង្ហាញ ពីស្រមោលមាន រូបរាងដូចជា សត្វក្តាមយក្ស ដ៏ធំសម្បើម មួយកំពុងតែ ត្រាំខ្លួននៅក្នុងទឹក។

យោងតាមប្រភព ព័ត៌មានបាន ឲ្យដឹងថា រូបថតទាំងនេះ ត្រូវបានថតដោយលោក Quinton Winter ខណៈពេលដែលលោក នាំកូនប្រុស របស់គាត់ចេញនេសាទ រួចក៏បានប្រទះឃើញ រូបរាង សត្វក្តាមយក្ស នៅក្បែរផែមួយកន្លែង ក្នុងទីក្រុង Kent នាប្រទេសអង់គ្លេស។ លោក Winter ក៏បានបញ្ជាក់ថា “ពីដំបូងខ្ញុំស្មានថា វាគ្រាន់តែជា ស្រមោលរបស់ផែ នោះប៉ុណ្ណោះ តែដល់ពេលមើល យូរទៅមិនមែននោះទេ តែវាដូចជា សត្តក្តាម ដ៏ធំមួយទៅវិញ ទើបខ្ញុំប្រញាប់ ថតរូបទាំងនោះ តែម្តង”។

បើយើងមើល តាមរូបថតទាំងនេះ យើងនឹងឃើញ រូបរាងសត្វក្តាមយក្ស មួយកំពុងតែ សង្ងំខ្លួនក្នុង ទឹកមិនជាជ្រៅ ប៉ុន្មានឡើយ ហើយវាអាចមាន ប្រវែងដល់ទៅ ជាង១៥ម៉ែត្រ។ យ៉ាងណាមិញ មានមនុស្សមួយចំនួន ដែលបានឃើញ រូបទាំងនេះហើយ ជឿជាក់ថា វាពិតជារូបរាង របស់សត្វក្តាម យក្សមួយក្បាល ប្រាកដមែន ស្របពេលដែល អ្នកផ្សេងទៀត បង្ហាញពីការ មិនជឿជាក់ ដោយលើកឡើងថា វាគ្រាន់តែជា ស្រមោលរបស់ មាត់ច្រាំងនោះ ប៉ុណ្ណោះ។

នេះគឺជា រឿងដ៏ចម្លែក មួយទៀតហើយ ដែលមានការចោទ សួរថាតើ ពិតជាមានក្តាមយក្ស ឬក៏ភាសាបរទេស ហៅថា Crabzilla នៅលើលោក យើងនេះមែន ឬយ៉ាងណា៕

ចុះប្រិយមិត្តយល់ យ៉ាងណាដែរ?

ប្រភព៖ ដេលីម៉េល