ចិន៖ រឿងដ៏គួរឲ្យភ្ញាក់ផ្អើល និងមិនគួរកើតមួយ តែវាបានកើតឡើង រួចទៅហើយ នៅក្នុងប្រទេសចិន បន្ទាប់ពីមាន ការថតបាន នូវទង្វើរបស់ ស្ត្រីជាម្តាយម្នាក់ បានដាក់ច្រវាក់ កូនប្រុសរបស់ខ្លួន ដើរតាមផ្លូវសាធារណៈ។

រូបថតទាំងនេះ ត្រូវបានបង្ហោះ ព្រោងព្រាតនៅ ក្នុងបណ្តាញ ទំនាក់ទំនងសង្គម របស់ចិន (Weibo) ដែលទទួលបាន ការចាប់អារម្មណ៍ យ៉ាងខ្លាំងពី សំណាក់ប៉ូលីស និងមនុស្ស ដែលបានឃើញ រូបទាំងនេះ។ លើសពីនេះទៀត ក៏មានការអះអាង ពីអ្នកដែលឃើញ ទិដ្ឋភាពនោះផ្ទាល់ថា នៅត្រង់បរិវេណ ក របស់ក្មេងប្រុស ម្នាក់នោះមាន ស្នាមឈាមដែល អាចបណ្តាលមកពី ការវាយធ្វើបាប ពីម្តាយដ៏ឃោរឃៅ ម្នាក់នោះ។

យ៉ាងណាមិញ ប៉ូលីសក៏បាន តាមដានរឿងនេះ និងកោះហៅស្ត្រី ម្នាក់នោះមក សាកសួរចម្លើយ ផងដែរ យោងតាមចម្លើយ ដែលនាងបាន ប្រាប់ប៉ូលីសឲ្យដឹងថា នាងមានត្រកូល Huang ហើយមូលហេតុ ដែលធ្វើឲ្យនាង ដាក់ច្រវាក់កូនប្រុស របស់ខ្លួនបែបនេះ ក៏ព្រោះតែខ្លាចគេ រត់ចេញពីផ្ទះ ព្រោះថាក្មេងនោះ ធ្លាប់រត់ចេញ ជាច្រើនដងរួចមកហើយ ទើបក្រោយពេល ដែលរកគេឃើញវិញ ដាក់ច្រវាក់បែបនេះ តែម្តងទៅ។

គួរបញ្ជាក់ផងដែរថា ទង្វើមួយនេះ ត្រូវបានប្រជាជន ក្នុងប្រទេសចិន ជាច្រើនបាននាំគ្នា ធ្វើការរិះគន់ ព្រោះតែការ ខ្វះក្តីមេត្តា និងស្រឡាញ់ទៅលើ កូនប្រុសរបស់ខ្លួន បែបនេះ ព្រមទាំងលើកឡើងថា ពាក្យទាំងនោះ អាចជាពាក្យ ដោះសារដើម្បី រួចខ្លួនប៉ុណ្ណោះ។ តែទន្ទឹមនឹងនេះ ក៏មានអ្នកខ្លះ យល់ថា ការធ្វើបែបនេះ គឺជាការត្រឹមត្រូវ ដើម្បីកុំឲ្យ ក្មេងប្រុសនោះ រត់ចេញពីផ្ទះ ម្តងទៀតផងដែរ៕

ចុះប្រិយមិត្តវិញ យល់យ៉ាងណាដែរ?

ប្រភព៖ បរទេស

ដោយ៖ សុជាតិ

ខ្មែរឡូត