ខេត្តកំពង់ធំ ៖ ស្ត្រីម្នាក់បានស្លាប់នៅនឹងកន្លែងយ៉ាងអាណោចអាធ័ម ខណៈកំពុងជិះកង់តាមផ្លូវ ត្រូវរថយន្ត ហ៊ីយ៉ាន់ដាយ ចំណុះ២តោនកន្លះ បុកកិនមួយកំណាត់ខ្លួន បណ្តាលឱ្យស្លាប់ភ្លាមមួយរំពេច ។ គ្រោះថ្នាក់ចរាចរណ៍នេះ កើតឡើងកាលពីវេលា ម៉ោង១០ព្រឹកថ្ងៃទី០៩ តុលា នៅតាមបណ្តោយ ផ្លូវជាតិលេខ៦ ចំណុចភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ។

ប្រភពព័ត៌មានពីកន្លែងកើតហេតុឱ្យដឹងថា ដំបូងគេឃើញរថយន្តបង្ក ម៉ាកហ៊ីយ៉ាន់ដាយ ពណ៌ស ពាក់ស្លាក លេខកំពង់ធំ 3A-0045 បើកក្នុងល្បឿនលឿន ហើយបានគេចរថយន្តធុនធំមួយ គ្រឿងទៀត ដែលធ្វើដំណើរ បញ្ច្រាសគ្នា លុះមកដល់ចំណុច កើតហេតុ ស្រាប់តែរថយន្ត ហ៊ីយ៉ាន់ដាយនេះ បើកកៀរដៃចង្កូតកង់ របស់ជនរងគ្រោះ បណ្តាលឱ្យស្ត្រីរងគ្រោះ ធ្លាក់ចូលទៅក្រោម កង់រថយន្ត កិនមួយកំណាត់ ខ្លួនផ្នែកខាងលើ បណ្តាលឱ្យស្លាប់ ភ្លាមមួយរំពេច យ៉ាងអាណោចអាធ័មតែម្តង ។

លោកវរសេនីយ៍ទោ ទន់ ក្រឿន នាយប៉ុស្តិ៍រដ្ឋបាលអាចារ្យលាក់ ឱ្យដឹងថា ស្ត្រីរងគ្រោះឈ្មោះ ព្រឿង ឡោ អាយុ៤៧ឆ្នាំ រស់នៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ជាអ្នកដាំបាយ និងថែរក្សាក្មេងៗនៅមណ្ឌលកុមារកំព្រាកំពង់ធំ ។

ក្រោយពីកើតហេតុអ្នកបើករថយន្តបង្កដាក់មេប្រូចបាត់ស្រមោល ចំណែករថយន្តនិងកង់ត្រូវ សមត្ថកិច្ចយក ទៅរក្សាទុកនៅ អធិការដ្ឋាននគរបាល ក្រុងស្ទឹងសែន រង់ចាំការដោះស្រាយ ឯសពសមត្ថកិច្ចប្រគល់ ឱ្យបងប្អូនសាច់ ញាតិយកទៅធ្វើបុណ្យតាមប្រពៃណី ៕

ផ្តល់សិទ្ធដោយ កោះសន្តិភាព