រាជធានីភ្នំពេញ ៖ ជនសង្ស័យ ម្នាក់បានក្លែងជាសង្ឃ ក្រោយពេលធ្វើ សកម្មភាពបោកយក ម៉ូតូ១គ្រឿង ពីលោកតា អាចារ្យវត្តម្នាក់ បានសម្រេច ហើយយកទៅបញ្ចាំ ប៉ុន្តែត្រូវបានម្ចាស់ម៉ូតូ តាមរកឃើញ និងបានប្ដឹងប៉ូលិស ឲ្យធ្វើការឃាត់ខ្លួន ទាំងស្បង់ចីវរជាប់ខ្លួន ក្នុងខណៈពេល ដែលជននោះ កំពុងស្ថិតនៅ ចំណតរថយន្តចោមចៅ ប្រុងឡើងជិះ រថយន្តឈ្នួល ទៅផ្ទះម្ដាយធម៌នៅ ក្នុងសង្កាត់ច្បារអំពៅ ។

ការចាប់ខ្លួននោះ បានធ្វើឡើង កាលពីវេលាម៉ោង៤ និង២៥នាទីល្ងាច ថ្ងៃទី០៩ ខែតុលា ឆ្នាំ២០១៤ នៅចំណតរថយន្ត ចោមចៅ ស្ថិតក្នុងភូមិ ថ្នល់បំបែក សង្កាត់ចោមចៅ ខណ្ឌពោធិ៍សែនជ័យ រាធានីភ្នំពេញ។ ជនសង្ស័យខាងលើនោះ ឈ្មោះ ហង្ស ជឿន អាយុ៣១ឆ្នាំ មានទីលំនៅក្នុង ភូមិរលាំងគ្រើល ឃុំត្រពាំងសាប ស្រុកបាទី ខេត្តតាកែវ ។ ជននេះបានធ្វើ សកម្មភាពបោកយក ម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០០៦ ពណ៌ខ្មៅ ពាក់ស្លាកលេខ ភ្នំពេញ 1I-5388 ដែលជាកម្មសិទ្ធិ របស់លោកតាម្នាក់ ឈ្មោះ ប៉ាង ណែន អាយុ៦០ឆ្នាំ ជាអាចារ្យវត្ត ព្រះជ្រោះគន្លង និងមានទីលំនៅ ក្នុងភូមិដូនកុក ឃុំក្រាំងអំពិល ស្រុកសំរោងទង ខេត្តកំពង់ស្ពឺ។

លោកតាអាចារ្យខាងលើ បានរៀបរាប់ ប្រាប់ប៉ូលិសថា កាលពីអំឡុងមុនថ្ងៃ បុណ្យភ្ជុំបិណ្ឌ៣ថ្ងៃ ខណៈពេលដែល លោកតា កំពុងស្ថិតនៅក្នុង វត្តខាងលើ ជនសង្ស័យម្នាក់នោះ បានខ្ចីម៉ូតូ របស់គាត់ជិះ ដោយប្រាប់ថាទៅ រកទិញម្ហូបតែ មួយភ្លែតប៉ុណ្ណោះ យកឲ្យវិញហើយ ។ ដោយសារតែ ជាមនុស្សស្គាល់គ្នា ហើយជននោះ បានទៅនៅ វត្តខាងលើនោះដែរ និងប្រាប់ថាបួស ជាសង្ឃនៅ ក្រោយថ្ងៃចេញ ព្រះវស្សាទៀតនោះ ទើបលោកតាព្រមឲ្យខ្ចីជិះ ដោយមិនបាន ដឹងថាជននោះ មានគំនិតអាក្រក់ នោះឡើយ ។ ប៉ុន្តែក្រោយពេល គាត់បាត់ម៉ូតូ តាមរកនៅម្ដុំ ឃុំដើមឫស្ស ស្រុកកណ្ដាលស្ទឹង ខេត្តកណ្ដាល ត្រូវបានអ្នកស្រុកប្រាប់ថា ជននោះធ្លាប់បួស ជាសង្ឃច្រើនវស្សាដែរ ប៉ុន្តែក្រោយពេល ចាកសិក្ខាបទវិញ ក្លាយជាមនុស្សម្នាក់ ខូចកំពូល គឺជាមុខសញ្ញាដើរលួច និងបោកប្រាស់ យ៉ាងជំនាញ ។

ប្រភពដដែលបានបន្តថា ក្រោយពេលបានម៉ូតូដល់ដៃ ក៍ស្រាប់តែបាត់ ជននោះរហូតតែម្ដង មិនឃើញត្រឡប់ យកម៉ូតូទៅប្រគល់ គាត់វិញឡើយ ពេលនោះលោកតា បានតាមរកគ្រប់ច្រកល្ហក ។ ប៉ុន្តែមិនបានជួបនោះទេ លុះក្រោយមក ទើបទទួលបាន ដំណឹងថាជននោះ បួសជាសង្ឃ ក៍បានតាមរកម្ដងទៀត ហើយបានប្រទះឃើញកំពុង ស្ថិតនៅចំណតរថយន្ត ក៍បានប្ដឹងប៉ូលិស ឲ្យធ្វើការឃាត់ខ្លួន វ៉ៃខ្នោះដៃទាំង គ្រងស្បង់ចីវរតែម្ដង៕

ផ្តល់សិទ្ធដោយ កោះសន្តិភាព