កាណាដា៖ គូស្នេហ៍មួយគូ មកពី Colorado សហរដ្ឋអាមេរិក បានប្រៀបធៀប សេចក្តីស្រឡាញ់ ដែលត្រូវតស៊ូ ដូចទៅនឹងការឡើងភ្នំនោះ បានសម្រេចក្តីស្រមៃ ឡើងទៅរៀបការ លើកំពូលភ្នំ Stawamus Chief ស្ថិតនៅក្នុង British Columbia ប្រទេសកាណាដា។

Jamie Halperin ជាអ្នកឯកទេស របបអាហារ មិនដែលធ្លាប់ចង់រៀបការ នៅវ័យក្មេងពេកទេ ប៉ុន្តែនាងបាន ផ្លាស់ប្តូរចិត្ត បន្ទាប់ពីបានមើលវីដេអូ របស់មិត្តភក្តិនាង ដែលធ្វើដំណើរផ្សងព្រេង ក្លែងក្លាយ ដើម្បីថតសម្រាប់ ក្រុមហ៊ុនអាពាហ៍ពិពាហ៍ បែបដំណើរផ្សងព្រេងមួយ។ ចំណែកឯ គូដណ្តឹងរបស់នាង លោក David Lamb ដំបូងឡើយ គឺគ្រាន់តែចង់បាន ពិធីអាពាហ៍ពិពាហ៍ ដែលសាមញ្ញមួយប៉ុណ្ណោះ ប៉ុន្តែបានសម្រេចចិត្ត ធ្វើការឡើងទៅលើ កំពូលភ្នំរៀបការ ដើម្បីបង្ហាញឲ្យឃើញ ពីក្តីស្នេហ៍ដ៏ស្មោះស្ម័គ្រ ដែលជំនះរាល់ឧបសគ្គ ទាំងអស់ដូចជាការឡើងភ្នំ ដើម្បីបានរស់នៅ ជាមួយគ្នា។

ជាមួយគ្នានេះដែរ ពួកគេក៏បានសម្រេចចិត្ត ឡើងទៅលើ ភ្នំ Stawamus Chief នៅប្រទេសកាណាដា ដើម្បីរៀបការ នៅលើកំពូលភ្នំ ដែលមានកម្ពស់ រហូតដល់ទៅ ៧០០ម៉ែត្រ។ ការរៀបការ ដ៏រ៉ូមែនទិច និងអស្ចារ្យមួយនេះ ត្រូវបានថតដោយ លោក John Lloyd និង ថតជាវីដេអូដោយ លោក Dominic Gill ដែលបង្ហាញឲ្យឃើញពី ការរៀបការបែប ដំណើរផ្សងព្រេង ដ៏ល្អឥតខ្ចោះមួយ ដែលពោរពេញដោយ ស្នាមញញឹម។

យ៉ាងណាមិញ ពួកគេបាន ចំណាយប្រាក់ ៧,០០០ផោន (១១,៣៣៩ដុល្លារ អាមេរិក) ដើម្បីរៀបចំ ពិធីមង្គលការមួយនេះ ថ្វីបើពួកគេចំណាយ អស់ប្រាក់ច្រើនក៏ពិតមែន ប៉ុន្តែពួកគេបាននិយាយថា បទពិសោធន៍នៃ ការរៀបការមួយនេះ គឺមានតម្លៃសម្រាប់គេ មិនអាចកាត់ថ្លៃបាននោះទេ៕

ប្រភព៖ Asiantown

ដោយ និមល

ខ្មែរឡូត