ខេត្តបន្ទាយមានជ័យ ៖ គ្រាប់បេប្រភេទ ៤០.៥ ចំនួន៤គ្រាប់ ត្រូវបានក្មេងប្រុស អាយុ១០ឆ្នាំ ប្រទះឃើញកាលពី វេលាម៉ោង១០ និង៣០នាទីព្រឹក ថ្ងៃទី០២ តុលា ២០១៤ នៅចំណុច មាត់អាងបារាយណ៍ ស្ថិតក្នុងភូមិ បារាយណ៍ ឃុំតាផូ ស្រុកស្វាយចេក ខេត្តបន្ទាយមានជ័យ ។

បើតាមលោកអនុសេនីយ៍ សុខ សុខុន អធិការរង នគរបាលស្រុក ស្វាយចេក បានឱ្យដឹងថា ក្មេងប្រុសដែល រើសបានគ្រាប់បេ ខាងលើមាន ឈ្មោះ សៀ តក់ អាយុ១០ឆ្នាំ រស់នៅក្នុង ភូមិបារាយណ៍ ឃុំតាផូ ស្រុកស្វាយចេក ខេត្តបន្ទាយមានជ័យ។ បើតាមការរៀបរាប់ របស់ក្មេងប្រុស ខាងលើ បានឱ្យដឹងថា មុនពេលប្រទះ ឃើញគ្រាប់បេ ខាងលើរូបគេ បានដើរលូករន្ធក្តាម នៅតាមមាត់អាង ដំបូងប្រទះឃើញ តែមួយគ្រាប់ទេ ហើយពេលដែលគេ កាយតទៅទៀត ក៏ឃើញជាបន្តបន្ទាប់ រហូតដល់ទៅ៤គ្រាប់ រួចក៏បានរត់ មកប្រាប់សមត្ថកិច្ច ។

លោកអធិការរង បានបន្តឱ្យដឹងថា គ្រាប់បេដែល ក្មេងប្រទះឃើញ ខាងលើនេះ គឺជាគ្រាប់បេ ប្រភេទ៤០.៥ ហើយមានគុណភាព ៦០ភាគរយ ។ បច្ចុប្បន្នគ្រាប់បេ ទាំង៤គ្រាប់នេះ ត្រូវបានយកទៅ រក្សាទុកនៅប៉ុស្តិ៍ នគរបាលរដ្ឋបាលតាផូ រងចាំបញ្ជា ពីថ្នាក់លើ ឱ្យយកទៅប្រគល់ ដល់អង្គការស៊ីម៉ាក ដើម្បីកំទេចចោល ៕

ផ្តល់សិទ្ធដោយ កោះសន្តិភាព